நகைச்சுவை நடிகர் வடிவேல் இம்சை அரசன் 23 ஆம் புலிகேசி படத்தின் இரண்டாம் பாகத்தில் நடிக்க மறுத்து விலகியதால் அவர் புதிய படங்களில் நடிக்க பட அதிபர்கள் சங்கம் தடை விதித்தது.

இதனால் பல வருடங்களாக அவர் நடிக்கவில்லை. இந்த நிலையில் மீண்டும் நடிக்க தயாராகி வருவதாக சில மாதங்களுக்கு முன்பு வடிவேல் தெரிவித்து இருந்தார். பாண்டிராஜ் இயக்கத்தில் சூர்யா நடிக்கும் படத்தில் வடிவேலுவை நடிக்க வைக்க பேச்சுவார்த்தைகள் நடப்பதாக தகவல் வெளியாகி உள்ளது.

வடிவேல் ஏற்கனவே சூர்யாவுடன் வேல், பிரண்ட்ஸ், ஆறு, ஆதவன், சில்லுனு ஒரு காதல் ஆகிய படங்களில் நடித்து இருக்கிறார். 12 ஆண்டுகளுக்கு பிறகு மீண்டும் இவர்கள் கூட்டணியை உருவாக்கும் முயற்சிகள் நடக்கின்றன. இந்த படத்தில் சூர்யா ஜோடியாக பிரியங்கா மோகன் நடிக்கிறார். இவர் சிவகார்த்திகேயனுடன் டாக்டர் படத்தில் நடித்துள்ளார்.

சூர்யா கொரோனாவில் சிக்கி குணமாகி தற்போது வீட்டில் தனிமைப்படுத்திக்கொண்டு இருப்பதால் அவர் இல்லாமல் படப்பிடிப்பை தொடங்கி உள்ளனர். விரைவில் படப்பிடிப்பில் அவர் பங்கேற்கிறார்.

இலங்கையைப் பிறப்பிடமாகக் கொண்ட ஷஸ்னா முஸம்மில் இங்கிலாந்தில் நடைபெறவுள்ள மில்டன் கெய்ன்ஸ் கவுன்சில் (Milton Keynes Council) தேர்தலில் போட்டியிட வேட்பாளராகத் தெரிவு செய்யப்பட்டுள்ளார்.

எதிர்வரும் மே மாதம் 6ஆம் திகதி நடைபெற்றவுள்ள குறித்த தேர்தலில் கன்சர்வேடிவ் (Conservative Party) கட்சி சார்பில் ஷஸ்னா முஸம்மில் பரிந்துரைக்கப்பட்டுள்ளார்.

ஐக்கிய தேசியக் கட்சியின் தேசியப்பட்டியல் பாராளுமன்ற உறுப்புரிமைக்காக கட்சியின் தலைவர் ரணில் விக்கிரமசிங்க அடுத்த மாதத்தின் முதல் வாரத்தில் பாராளுமன்றத்தில் பதவியேற்கவுள்ளதாக கட்சியின் உள்ளகத் தகவல்கள் தெரிவிக்கின்றன.

தேசியப் பட்டியல் பாராளுமன்ற உறுப்புரிமைக்காக அவரை பெயரிட வேண்டும் என ஐக்கிய தேசியக் கட்சி தீர்மானித்துள்ளது.

எனினும், ரணில் விக்கிரமசிங்கவின் தீர்மானம் கிடைக்கும் வரையில் அந்த நடவடிக்கை தாமதமடைவதாக தெரிவிக்கப்படுகிறது. இந்த நிலையில், இந்த மாத இறுதிக்குள் குறித்த தீர்மானம் கட்சிக்கு அறியப்படுத்தப்படும் என்றும தெரிவிக்கப்படுகிறது. கடந்த ஓகஸ்ட் மாதம் இடம்பெற்ற பொதுத்தேர்தலில், பொதுமக்கள் வாக்களிப்பின் மூலம் ஐக்கிய தேசியக் கட்சிக்கு எந்த ஒரு ஆசனமும் கிடைக்கப்பெறவில்லை.

எனினும், அந்த சந்தர்ப்பங்களில் தேசிய பட்டியல் தொடர்பில் இணக்கப்பாட்டை ஏற்படுத்திக் கொள்ள முடியாமல் போனதுடன், கட்சியை மறுசீரமைப்பு செய்வது குறித்து அதிக அவதானம் செலுத்தப்பட்டது.

இவ்வாறான பின்னணியில் அண்மையில் ஐக்கிய தேசியக் கட்சியின் முக்கிய பதவிகளுக்கு புதிய நியமனங்கள் மேற்கொள்ளப்பட்டதுடன், தேசியப்பட்டியல் பாராளுமன்ற உறுப்புரிமைக்காக கட்சித் தலைவர் ரணில் விக்கிரமசிங்கவை பெயரிட வேண்டுமென்றும் இணக்கம் காணப்பட்டிருந்தது.இதன்படி, அதுகுறித்து கட்சித் தலைவரின் கருத்து கோரப்பட்டுள்ள நிலையில், அவரின் தீர்மானம் கிடைத்ததை அடுத்து, அதனை சபாநாயகருக்கு பெயரிட்டு அனுப்புவதற்கும் நடவடிக்கை மேற்கொள்ளப்படவுள்ளது.

ரஜினிகாந்த் உடல் நிலையை கருதி அரசியலுக்கு வரவில்லை என்று அறிவித்து மீண்டும் சினிமாவில் தீவிரமாக ஈடுபட முடிவு செய்துள்ளார்.

அவரது அண்ணாத்த படப்பிடிப்பு 60 சதவீதத்துக்கு மேல் முடிந்து விட்டது. மீதியையும் முடிக்க இந்த மாதம் இறுதியில் அல்லது அடுத்த மாதம் தொடக்கத்தில் படப்பிடிப்பை தொடங்க உள்ளனர்.

முந்தைய படப்பிடிப்பில் படக்குழுவினருக்கு கொரோனா தொற்று ஏற்பட்டதால் கொரோனா தடுப்பு பாதுகாப்பை மேலும் வலுப்படுத்த முடிவு செய்துள்ளனர். ஓரிரு மாதங்களில் முழு படத்தையும் முடித்து தீபாவளிக்கு திரைக்கு கொண்டு வருகிறார்கள். இந்த படத்தை முடித்த பிறகு ரஜினி மேலும் 2 புதிய படங்களில் நடிக்க ஆலோசிப்பதாக தகவல் கசிந்துள்ளது.

ஏற்கனவே ரஜினியை வைத்து பேட்ட படத்தை எடுத்த கார்த்திக் சுப்புராஜ் இயக்கத்தில் ரஜினி நடிக்க வாய்ப்பு இருப்பதாக கூறப்படுகிறது. இதுபோல் கண்ணும் கண்ணும் கொள்ளையடித்தால் வெற்றிப்படத்தை இயக்கிய தேசிங்கு பெரியசாமியை அழைத்து ரஜினி பாராட்டியதுடன் தனக்கு கதை தயார் செய்யும்படி கூறியுள்ளார்.

இதுபோல் மேலும் சில இயக்குனர்களும் ரஜினிக்கு கதை வைத்துள்ளனர். அண்ணாத்த படப்பிடிப்பை முடித்ததும் ரஜினி நடிக்க உள்ள புதிய படங்கள் பற்றிய அறிவிப்பு வரலாம் என்று எதிர்பார்க்கப்படுகிறது.

பெருந்தோட்டத் தொழிலாளர்களுக்கு ஆயிரம் ரூபாய் நாள் சம்பளத்தைப் பெற்றுக்கொடுப்பதற்கு அப்பால், அம்மக்களைச் சுயகௌரவத்துடன் வாழ வைப்பதே, இலங்கைத் தொழிலாளர் காங்கிரஸின் நோக்கம் என தெரிவித்த இதொகாவின் பொதுச் செயலாளரும் இராஜாங்க அமைச்சருமான ஜீவன் குமாரவேல் தொண்டமான், யாருக்கும் பயந்து வாழும் சூழ்நிலை எம்மக்களுக்கு இனி வராது எனவும் அனைவரும் ஒன்றுசேர்ந்தால், நம்மை அசைக்கவோ அல்லது சீண்டிப் பார்க்கவோ யாராலும் முடியாது எனவும் தெரிவித்தார்.

இந்திய அரசாங்கத்தின் நிதியுதவியுடன் கூடிய தனி வீட்டுத் திட்டத்துக்கான அடிக்கல் நாட்டும் நிகழ்வு, காலி – வலஹன்தூவ தோட்டத்தில், இன்று இடம்பெற்றது. 50 தனி வீடுகளை நிர்மாணிக்கும் இந்த வேலைத்திட்டத்தின் ஆரம்ப நிகழ்வில் கலந்துகொண்டு உரையாற்றும் போதே, அவர் மேற்கண்டவாறு தெரிவித்தார்.

அங்கு தொடர்ந்துரையாற்றிய இராஜாங்க அமைச்சர், நுவரெலியா மாவட்டத்துக்கு அப்பால் காணப்படும் வெளி மாவட்ட மலையகப் பெருந்தோட்டப் பகுதிகள் பல, அபிவிருத்தியில் ஒதுங்கியே உள்ளன. இதற்கு, வெளிமாவட்ட மக்களுக்கிடையிலான தொடர்புகள் விடுபட்டுள்ளமையே காரணமாகும்” என்றார்.

“சௌமியமூர்த்தி தொண்டமான் ஐயா காலத்தில் இருந்த தோட்டத் தலைவர்கள், தலைவிகள், இன்றும் இத்தோட்டத்தில் உள்ளனர். அன்றைய கால தொடர்புகள், காலம்போக மாறிவிட்டது. ஆகையால், மக்கள் இன்று பயந்து வாழும் சூழ்நிலைக்கு வந்துள்ளனர்.

“இன்றைய நிலையில், நாம் யாருக்கும் பயந்து வாழும் அவசியம் இல்லை. ஒற்றுமையாக இருக்கும் பட்சத்தில், மற்றவர்கள் நம்மைப் பார்த்துப் பயப்பட வேண்டும்” எனத் தெரிவித்தார்.

“உங்களில் சிலர் பேசிய விடயம், எனது அதிகாரிகள் ஊடாக எனது காதுக்கு எட்டியது. “ இவருடைய மாவட்டம் நுவரெலியா. இவர் ஏன் இங்கு அபிவிருத்தி செய்ய வேண்டும்” என்று நீங்கள் தெரிவித்ததாகக் கூறியிருந்தீர்கள். மறுபுறத்தில், நுவரெலியா மாவட்டத்தில் தமிழர்களுக்குச் செய்யும் அபிவிருத்தி, வெளி மாவட்ட மலையகத் தமிழ் மக்களுக்கும் செய்யலாம் தானே என்றும் பேசுகின்றனர்.

“குறை சொல்ல நிறைய பேர் இருப்பார்கள். கடைசியில், நாம் இந்தப் பதவிக்கு வந்துள்ளமை உங்களுக்குச் சேவை செய்யவே. இச்சேவையை, நாம் உங்களுக்கு உண்மையாகச் செய்யமுடியும் என்பதை மறந்துவிடக் கூடாது” என, நம்பிக்கை தெரிவித்தார்.

“இன்று, மலையக மக்களின் நாள் சம்பளம் தொடர்பான பேச்சுவார்த்தைக்குத் தீர்வு கிட்டியுள்ளது. ஆயிரம் ரூபாயை வழங்குவதற்கு, கம்பனிகளுக்கு கஸ்டம் என்று சொன்னார்கள். ஆனால் இப்போது, ஆயிரத்தைத் தந்துதான் ஆகவேண்டும் எனச் சொல்லியுள்ளனர். இத்தொகையை வழங்கச் சட்டம் கொண்டுவரப்பட்டுள்ளது. அதை, வர்த்தமானி அறிவித்தல் விடுக்கப்பட்ட பின்னர், சம்பளம் வழங்கியாக வேண்டும். நாம் என்ன செய்தாலும், கடைசியில் குறைகூறும் ஒரு கூட்டம் இருக்கத்தான் செய்கிறது” எனத் தெரிவித்த ஜீவன், ஆயிரம் ரூபாய் சம்பளம் தொழிலாளர்களின் கரம் கிடைத்ததும், இன்றுள்ள விலைவாசிக்கு ஆயிரம் போதுமா என்றும் குறை கூறுவார்கள்” என்றார்.

“காலி மாவட்டத்தில், 21 ஆயிரம் பெருந்தோட்டத் தொழிலாளர்கள் இருக்கின்றனர். அவர்களில் 6 ஆயிரம் பேர், இந்திய வம்சாவளிக் குடும்பத்தினர். நாம் இந்த மாவட்டத்துக்கு, 500 வீடுகளை நிர்மாணித்துக் கொடுக்கவுள்ளோம். அதேநேரத்தில், கடந்த 200 வருடங்களாக, மலையக மண்ணில் உழைத்த எம் மக்களில் அதிகமானோர், காணி உரிமையின்றி வாழ்கின்றனர். அவர்களுக்குக் காணி உரிமை அவசியம். முதலில் இதை இவர்களுக்குப் பெற்றுத்தந்தாக வேண்டும் .

“இன்று, தோட்ட லயன் குடியிருப்பில் வாழும் ஒருவர், சுயமாகத் தனது பணத்தில் மலசலகூடம் ஒன்றை அமைத்தால், அதைப் பொலிஸாரைக் கொண்டு இடிக்கின்றனர். இதற்கு, அந்தக் காணி அவரின் உரிமையில்லை என்றே கூறப்படுகின்றது. இவ்வாண்டு ஏப்ரலில், 1,400 காணி உறுதிப் பத்திரங்கள், மலையக மக்களுக்கு வழங்கப்படவுள்ளன. அடுத்தவர்கள் உதவி செய்துதான் வீடொன்று அமைக்கப்பட வேண்டும் என்பதில்லை. நாம் சுயமாகச் சம்பாதித்து அமைத்துக் கொள்ளவும் முடியும். ஆனால், வீடு அமைக்க இடங்கொடுக்க மறுக்கிறார்கள். வெள்ளையர்கள் சென்றுவிட்டாலும், கம்பனிக்காரர்கள் வந்துவிட்டார்கள்.

“தவறுகள் திருத்தப்பட்டு, இதொகாவிலிருந்து விடுப்பட்ட தொழிலாளர் உறவுகளை இணைத்து, இ.தொ.காவை கட்டியெழுப்பி வருகின்றோம். அனைவரும் ஒன்றுசேர்ந்தால், நம்மை அசைக்கவோ அல்லது சீண்டிப் பார்க்கவோ யாராலும் முடியாது” என, ஜீவன் தொண்டமான் மேலும் தெரிவித்தார்.

இங்கிலாந்துக்கு எதிரான 2ஆவது டெஸ்ட் போட்டியில் அஸ்வின் சதம் விளாசி அசத்தினார்.

இந்தியா-இங்கிலாந்து அணிகள் இடையிலான 2ஆவது டெஸ்ட் கிரிக்கெட் போட்டி சென்னை சேப்பாக்கத்தில் உள்ள எம்.ஏ.சிதம்பரம் ஸ்டேடியத்தில் நேற்று முன்தினம் ஆரம்பமானது.

இதில் நாணயச்சுழற்சியில் வெற்றிபெற்று முதலில் துடுப்பெடுத்தாடிய இந்திய அணி, முதல் இன்னிங்சில் 329 ஓட்டங்களுக்கு ஆட்டமிழந்தது. இந்திய அணியில் அதிகபட்சமாக ரோகித் சர்மா 161- ஓட்டங்களையும், ரகானே 67- ஓட்டங்களையு; எடுத்தனர். இங்கிலாந்து அணி தரப்பில் அதிகபட்சமாக மோயின் அலி 4 விக்கெட்டுகளை வீழ்த்தினார்.

இதையடுத்து, முதல் இன்னிங்சை ஆரம்பித்த இங்கிலந்து அணி, அஸ்வினின் மாயாஜால சுழலில் சிக்கியது. 59.5 ஓவர்கள் தாக்குப்பிடித்த இங்கிலாந்து அணி 134 ஓட்டங்களில் ஆல் அவுட் ஆனது. பந்து வீச்சில் அஸ்வின் 5 விக்கெட்டுகளை அள்ளினார்.

195 ஓட்டங்கள் முன்னிலையுடன் 2ஆவது இன்னிங்சை தொடங்கிய இந்திய அணி நேற்றைய ஆட்ட நேரம் முடிவில் 18 ஓவர்களில் ஒரு விக்கெட்டுக்கு 54 ஓட்டங்கள் எடுத்தது. 3- ஆம் நாள் ஆட்டம் இன்று தொடங்கியதும் இந்திய அணியின் பேட்ஸ்மேன்கள் அடுத்தடுத்து ஆட்டமிழந்து வெளியேறினர்.

எனினும் விராட் கோஹ்லி ஒருபுறம் சிறப்பான ஆட்டத்தை வெளிப்படுத்தினார். மறுமுனையில் ரிஷப் பண்ட், ரகானே என முன்னணி வீரர்கள் வெளியேறியதால், இந்திய அணி 86- ஓட்டங்களுக்குள் 5 விக்கெட்டுகளை இழந்தது. அடுத்து வந்த அக்சர் படேலும் 7 ஓட்டங்களுடன் வெளியேறினார்.

இதையடுத்து 7-வது விக்கெட்டுக்கு களம் இறங்கிய அஸ்வின், விராட் கோஹ்லி ஜோடி சிறப்பான ஆட்டத்தை வெளிப்படுத்தியது. குறிப்பாக அஸ்வின் துரிதமாக ஓட்டங்களை சேர்த்தார்.

விராட் கோஹ்லி, அஸ்வின் ஆகிய இருவரும் அடுத்தடுத்து அரைசதம் அடித்து அசத்தினர். கேப்டன் விராட் கோஹ்லி 62 ஓட்டங்கள் எடுத்திருந்த நிலையில் ஆட்டமிழந்தார். அவரைத்தொடர்ந்து களமிறங்கிய குல்தீப் யாதவ் 3 ரன்னும், இஷாந்த் சர்மா 7 ரன்னிலும் ஆட்டமிழந்து வெளியேறினர்.

அடுத்ததாக அஸ்வினுடன், சிராஜ் ஜோடி சேர்ந்தார். சிறப்பான ஆட்டத்தை வெளிப்படுத்தி வந்த அஸ்வின் 134 பந்துகளில் 1 சிக்ஸர், 14 பவுண்டரிகளுடன் தனது சதத்தை பதிவு செய்து அசத்தினார். இது அவருடைய 5-வது டெஸ்ட் சதமாகும். தொடர்ந்து ஆடிய அஸ்வின் 106 (148 பந்துகள்) ரன்களில் ஆட்டமிழந்தார். முடிவில் முகமது சிராஜ் 16 ரன்களுடன் இறுதிவரை ஆட்டமிழக்காமல் களத்தில் இருந்தார்.

இறுதியில் இந்திய அணி 85.5 ஒவர்களில் அனைத்து விக்கெட்டுகளையும் இழந்து 286 ரன்கள் எடுத்தது. இதன்படி இங்கிலாந்து அணியை விட இந்திய அணி 481 ரன்கள் முன்னிலை பெற்றுள்ளது. இங்கிலாந்து அணியின் சார்பில் மொயின் அலி மற்றும் ஜாக் லேஸ் ஆகியோர் தலா 4 விக்கெட்டுகளும், ஸ்டோன் ஒரு விக்கெட்டும் வீழ்த்தினர். இதன்படி இங்கிலாந்து அணிக்கு 482 ரன்கள் வெற்றி இலக்காக நிர்ணயிக்கப்பட்டுள்ளது.

பொகவந்தலாவ , சீனாகொலை (செப்பல்ட்டன்) தோட்ட எல்லை பகுதியில் இன்று (15.02.2021)  பொறியில் சிக்குண்ட சிறுத்தை ஒன்று கம்பிகளை அறுத்துக்கொண்டு தப்பி சென்றுள்ளமையினால் தோட்டத்தொழிலாளர்கள் மத்தியில் பதற்ற நிலை காணப்படுவதாக பொது மக்கள் தெரிவிக்கின்றனர்.

பொகவந்தலாவ மேல் பிரிவு தோட்டத்தில் சீனாகொலை எல்லையில் இன்று காலை தேயிலை கொழுந்து பறிப்பதற்காக சென்ற தொழிலாளர்கள் சிறுத்தை சீறும் சத்தத்தினை கேட்டு அப்பகுதியில் பார்த்த போது ஐந்து அடி நீளமான சிறுத்தைப்புலி ஒன்று பொறியில் சிக்குண்டு தவிப்பதனை கண்டுள்ளனர்.

அதனை தொடர்ந்து தொழிலாளர்கள் கூச்சலிட்டு ஓடி பொலிஸாருக்கு தெரிவித்ததனையடுத்து பொலிஸார் நல்லதண்ணீர் வன ஜீவராசி திணைக்களத்திற்கு தெரிவித்துள்ளனர்.

எனினும் வனஜீவராசிகள் அதிகாரிகள் வருவதற்கு முன் குறித்த சிறுத்தைப்புலி கம்பியினை அறுத்துக்கொண்டு காட்டுப்பகுதிக்கு ஓடியுள்ளது .

இதனால் இந்த சிறுத்தைப்புலி மீண்டும் வந்து மக்களை தாக்கலாம் என பொது மக்கள் அச்சம் தெரிவிக்கின்றனர்.

கடந்த சில தினங்களாக அப்பகுதியில் உள்ள நாய்களை சிறுத்தைப்புலிகள் கொண்டு சென்று தின்றுவிடுவதாகவும் தேயிலை மலைகளில் சிறுத்தைப்புலிகளின் நடமாற்றம் காணப்படுவதாகவும் இது குறித்து உரிய அதிகாரிகளிடம் அறிவித்த போதிலும் இதுவரை பாதுகாப்பான நடவடிக்கைகள் எதுவம் பெற்றுக்கொடுக்கவில்லை என்றும் இவர்கள் தெரிவிக்கின்றனர்.

எனவே தாங்கள் உயிரை கையில் பிடித்து கொண்டு தங்களுடைய தொழில் செய்ய வேண்டிய துர்பாக்கிய நிலை ஏற்பட்டுள்ளதாகவும் இவர்கள் தெரிவிக்கின்றனர்.

எனவே இது குறித்து உரியவர்கள் உரிய கவனமெடுத்து நிரந்தர தீர்வு பெற்றுக்கொடுக்க நடவடிக்கை எடுக்கப்பட வேண்டும் என இவர்கள் கோரிக்கை விடுக்கின்றனர்.

க.கிசாந்தன்