ஐக்கிய மக்கள் சக்தியின் யாப்பின் பிரகாரம் முதலாவது வருடாந்த மாநாடு (சம்மேளனம்) மார்ச் 6 ஆம் திகதி நடைபெறவுள்ளது.

அதற்கு முன்னர் கட்சியின் அனைத்து கட்டமைப்புகளும் கட்டியெழுப்படும் எனவும், கூட்டணிகூட உருவாக்கப்பட்டிருக்கும் எனவும் ஐக்கிய மக்கள் சக்தியின் உறுப்பினர் ஒருவர் தெரிவித்தார்.

அத்துடன், ஐக்கிய மக்கள் சக்தியின் சம்மேளனத்தின்போதே சம்பிக்க ரணவக்க உட்பட ஹெல உறுமய உறுப்பினர்கள் 21 பேர் அக்கட்சியில் அதிகாரப்பூர்வமாக இணைவார்கள் என எதிர்ப்பார்க்கப்படுகின்றது.  சம்பிக்கவுக்கு பிரதித் தலைவர் பதவி வழங்கப்படவுள்ளது.

சம்பிக்க ரணவக்கவுக்கான பதவி குறித்து ஐக்கிய மக்கள் சக்திக்குள் தற்போது முறுகல் நிலை ஏற்பட்டுள்ளது. கட்சி மாநாட்டுக்கு முன்னர் அப்பிரச்சினைக்கும் தீர்வு காணப்படும் என எதிர்ப்பார்க்கப்படுகின்றது.

தோட்டத் தொழிலாளர்களின் சம்பள விடய கூட்டொப்பந்தத்ததை கூட்டு ஒப்பந்த தொழிற்சங்கங்கள் சிலவும் அடிமை சாசனமாக கருத தொடங்கியுள்ளது என்று தொழிலாளர் தேசிய சங்கத்தின் பிரதி நிதிச் செயலாளரும் மத்திய மாகாண சபை முன்னாள் உறுப்பினருமான சோ. ஸ்ரீதரன் கருத்துத் தெரிவித்தார்.

இந்த விடயம் தொடர்பாக அவர் மேலும் வெளியிட்டுள்ள அறிக்கையில் குறிப்பிட்டுள்ளதாவது :

கூட்டொப்பந்தத்தை அடிமை சாசனமாக விமர்சித்தவர்கள் இன்று அதனை புகழ்வதாக தொழிற்சங்கவாதி ஒருவர் வக்காலத்து வாங்கியுள்ளார். இதனை மலையகம் எள்ளி நகையாடுகிறது. கூட்டு ஒப்பந்தத்தைச்சேர்ந்த மூன்று தொழிற்சங்கங்களில் இரண்டு தொழிற்சங்கங்கள் இந்த ஒப்பந்தத்தில் கைச்சாத்திடும் அதற்கு தயக்கம் காட்டி வருகின்றன.

அதில் ஒரு தொழிற்சங்கம் கடந்த கூட்டு ஒப்பந்தத்தில் கையொப்பம் இடவில்லை.
மேலும் ஒரு தொழிற்சங்கம் இம் முறை கூட்டு ஒப்பந்தத்தில் கைச்சாத்திடுவதற்கு தயக்கம் காட்டி வருவது மலையகம் அறிந்த விடயம். இந்த விடயம் அறிந்தும் கடந்த பொதுத்தேர்தலில் திட்டமிட்டு தோற்கடிக்கப்பட்ட ஒருவர் கட்சியில் தனது பெயர் அடிபட வேண்டும் என்பதற்காக மலையக மக்களை பிழையாக வழி நடத்த வேண்டாம் என்று கேட்டுக் கொள்ளுகின்றேன்.” – என்றார்.

பதுளை மாவட்டத்தில் கொரோனா தொற்றாளர்கள் நால்வர் இதுவரை பலியாகியுள்ளனர்.

கொரோனா அச்சுறுத்தல் காரணமாக இரு ஆடைத்தொழிற்சாலைகளும் மறுஅறிவித்தல்வரை மூடப்பட்டுள்ளன.

கடந்த வருடம் அக்டோபர் மாதம் ஆம் திகதி முதல் இதுவரையில் பதுளை மாவட்டத்தில் பல்வேறு இடங்களில் மொத்தமாக 584 பேர் கொரோனா தொற்றாளர்களாக ஊர்ஜிதப்படுத்தப்பட்டுள்ளதாக, பதுளை மாவட்ட கோவிட் 19தடுப்பு செயலணியினர் தெரிவித்தனர்.

வெலிமடையில் ஒரு மரணமும், தியத்தலாவையில் இரு மரணங்கள், மகியங்கனையில் ஒருமரணம் உள்ளிட்டு நான்கு பேர், கொரோனா தொற்றினால் மரண மாகியுள்ளனர்.

மகியங்கனைப் பகுதியில் இரு ஆடைத்தொழிற்சாலைகள் மூடப்பட்டுள்ளன.

எம். செல்வராஜா

நடிகர் சூர்யா, தனக்கு கொரோனா வைரஸ் தொற்று உறுதி செய்யப்பட்டதாகவும், சிகிச்சை பெற்று நலமுடன் இருக்கிறேன் எனவும் தெரிவித்துள்ளார்.

நடிகர் சூர்யா டுவிட்டர் பக்கத்தில் ஒரு பதிவை வெளியிட்டுள்ளார். அதில் ‘‘’கொரோனா பாதிப்பு ஏற்பட்டு, சிகிச்சை பெற்று நலமுடன் இருக்கிறேன். வாழ்க்கை இன்னும் இயல்பு நிலைக்கு திரும்பவில்லை என்பதை அனைவரும் உணர்வோம்.

அச்சத்துடன் முடங்கிவிட முடியாது. அதேநேரம் பாதுகாப்பும், கவனமும் அவசியம். அர்ப்பணிப்புடன் துணைநிற்கும் மருத்துவர்களுக்கு அன்பும், நன்றிகளும்.’’ எனத் தெரிவித்துள்ளார்.

தமிழ் தேசியக் கூட்டமைப்பின் நாடாளுமன்ற உறுப்பினர் எம்.ஏ.சுமந்திரனின் பாதுகாப்புக்கு வழங்கப்பட்டிருந்த சிறப்பு அதிரடிப் படை மீளப்பெறப்பட்டுள்ளது.

“நேற்றிரவு கிடைத்த திடீர் பணிப்பில் சிறப்பு அதிரடிப் படை பாதுகாப்பு மீளப்பெறப்பட்டுள்ளது. காரணம் அறிவிக்கப்படவில்லை” என்று நாடாளுமன்ற உறுப்பினர் எம்.ஏ.சுமந்திரன் தெரிவித்தார்.

சிறப்பு அதிரடிப் படையினரை வைத்து பேரணியில் பங்கேற்றமை உள்ளிட்ட சில நடவடிக்கைகள் தொடர்பில் ஆராய்வதற்கு இவ்வாறு மீளப்பெற்றுள்ளதாக பொலிஸ் தகவல்கள் தெரிவிக்கின்றன.

எனினும் பிரமுகர் பாதுகாப்பு பிரிவு உத்தியோகத்தர்கள் நாடாளுமன்ற உறுப்பினர் எம்.ஏ.சுமந்திரனுக்கு பாதுகாப்பு கடமையில் இருப்பர் என்று தெரிவிக்கப்பட்டுள்ளது.

கொரோனா வைரஸ் தாக்கத்தின் 2 ஆவது அலைமூலம் கடந்த ஒக்டோபர் 4 ஆம் திகதி முதல் நேற்றுவரை மத்திய மாகாணத்தில் 5 ஆயிரத்து 226 பேருக்கு கொரோனா வைரஸ் தொற்றியுள்ளது.

மினுவாங்கொட, பேலியகொட கொத்தணிகள்மூலமே இவர்களுக்கு இவ்வாறு வைரஸ் பரவியது.

கண்டி மாவட்டத்தில் கடந்த ஒக்டோபர் 4 ஆம் திகதி முதல் நேற்றுவரை 3,839 பேருக்கு வைரஸ் தொற்றியுள்ளது. மாத்தளை மாவட்டத்தில் 720 தொற்றாளர்கள் அடையாளம் காணப்பட்டுள்ளனர்.

அரசாங்கம் தீர்மானத்தின்படி 27 அத்தியாவசிய பொருட்களின் விலைகளை இன்று முதல் குறைப்பதற்கு நடவடிக்கை எடுக்கப்பட்டுள்ளதுடன் நாட்டு மக்களின் நலன் கருதி சுப்பர் மார்க்கெட் உள்ளிட்ட பாரிய அத்தியாவசியப் பொருள் விற்பனை நிலையங்கள் இந்த விலைக் குறைப்பை பின்பற்ற முடியும் என வர்த்தக அமைச்சர் பந்துல குணவர்தன தெரிவித்தார்.

அது தொடர்பில் கருத்து தெரிவித்த அமைச்சர் பந்துல குணவர்தன, மக்களின் வாழ்க்கைச் சுமையை குறைக்கும் வகையில் மேற்படி விற்பனை நிறுவனங்கள் மக்களுக்கு சலுகை வழங்குமானால் அதனை வரவேற்பதாகவும் தெரிவித்துள்ளார்.

27 பொருட்கள் மூன்று மாதங்களுக்கு விலைக் குறைப்பு செய்ய அரசாங்கம் தீர்மானித்துள்ளதுள்ள நிலையில் அவற்றை சதொச, கூட்டுறவு விற்பனை நிலையம் மற்றும் கியூசொப் ஆகியவற்றில் கொள்வனவு செய்ய முடியும் என்றும் அமைச்சர் தெரிவித்துள்ளார்.

அது தொடர்பில் மேலும் தெரிவித்த அமைச்சர்;

கீரி சம்பா 1kg : புதிய விலை 125 ரூபா – தற்போதைய விலை 140 ரூபா,

கோதுமை மா 1kg : புதிய விலை 84 ரூபா – தற்போதைய விலை 105 ரூபா,வௌ்ளை சீனி 1kg : புதிய விலை 99 ரூபா – தற்போதைய விலை 110 ரூபா ,

சிகப்பு சீனி 1kg : புதிய விலை 125 ரூபா – தற்போதைய விலை 140 ரூபா ,

தேயிலை 100g : புதிய விலை 95 ரூபா – தற்போதைய விலை 130 ரூபா ,

பருப்பு அவுஸ்திரேலியா 1kg : புதிய விலை 165 ரூபா – தற்போதைய விலை

188 ரூபா, பெரிய வெங்காயம் இந்தியா 1kg : புதிய விலை 120 ரூபா – தற்போதைய விலை 140 ரூபா,

உருளைக்கிழங்கு உள்நாடு 1kg : புதிய விலை 180 ரூபா – தற்போதைய விலை (216 – 220) ரூபா,

உருளைக்கிழங்கு பாகிஸ்தான் 1kg : புதிய விலை 140 ரூபா தற்போதைய விலை 190 ரூபா,

கடலை 1kg : புதிய விலை 175 ரூபா – தற்போதைய விலை 225 ரூபா,

காய்ந்த மிளகாய் 1kg : புதிய விலை 495 ரூபா – தற்போதைய விலை 550 ரூபா,

ரின் மீன் உள்நாடு 425g : புதிய விலை 220 ரூபா – தற்போதைய விலை 240 ரூபா,

ரின் மீன் இறக்குமதி 425g : புதிய விலை 265 ரூபா – தற்போதைய விலை 280 ரூபா,

நெத்தலி தாய்லாந்து 1kg : புதிய விலை 545 ரூபா – தற்போதைய விலை 700 ரூபா,

தோலுடன் கூடிய கோழி 1kg : புதிய விலை 400 ரூபா – தற்போதைய விலை 430 ரூபா,

கட்டி உப்பு 1kg : புதிய விலை 43 ரூபா – தற்போதைய விலை 55 ரூபா, பால்மா 400g : புதிய விலை 355 ரூபா – தற்போதைய விலை 380 ரூபா, ​

சோயா எண்ணை 500ml : புதிய விலை 310 ரூபா – தற்போதைய விலை 470 ரூபா, சவர்க்காரம் (BCC) 115g : புதிய விலை 43 ரூபா – தற்போதைய விலை 53 ரூபா,

சவர்க்காரம் 650g : புதிய விலை 260 ரூபா – தற்போதைய விலை 325 ரூபா, வாசனை சவர்க்காரம் 100g : புதிய விலை 56 ரூபா – தற்போதைய விலை 63 ரூபா,

கை சுத்தீகரிப்பு (Hand sanitizer) 100ml : புதிய விலை 250 ரூபா – தற்போதைய விலை 350 ரூபா, முகக்கவசம் (SLS தரச் சான்றிதழுடன் கூடிய) : புதிய விலை 14 ரூபா – தற்போதைய விலை 25 ரூபா எனவும் அமைச்சர் தெளிவுபடுத்தினார். 

கம்பளை கல்வி வலயத்துக்குட்பட்ட நாவலப்பிட்டிய வெஸ்ட்ஹோல் தமிழ் வித்தியாலயத்தில் 15 மாணவர்களுக்கு கொரோனா வைரஸ் தொற்றியுள்ளது.

குறித்த பாடசாலையில் கல்வி பயிலும் மாணவர்கள் சிலரும், ஆசிரியர்களும் கடந்த 2 ஆம் திகதி பிசிஆர் பரிசோதனைக்கு உட்படுத்தப்பட்டனர். பரிசோதனை முடிவுகள் நேற்று வெளியாகின.

இதன்படி 15 மாணவர்களுக்கும், ஆசிரியர் ஒருவருக்கும் வைரஸ் தொற்று உறுதிப்படுத்தப்பட்டுள்ளது. இவர்கள் சிகிச்சை நிலையங்களுக்கு அனுப்பிவைக்கப்பட்டுள்ளனர் என்று சுகாதார அதிகாரிகள் தெரிவித்தனர்.