வெற்றிமாறன் இயக்கத்தில் உருவாகிவரும் புதிய படத்தில் இருந்து பிரபல நடிகர் விலகியதால், அவருக்கு பதில் விஜய் சேதுபதி நடிக்க உள்ளாராம்.

தமிழ் சினிமாவில் முன்னணி இயக்குனராக வலம்வருபவர் வெற்றிமாறன். இவர் இயக்கிய பொல்லாதவன், ஆடுகளம், விசாரணை, வட சென்னை, அசுரன் என இவர் எடுத்த படங்கள் அனைத்தும் பிளாக்பஸ்டர் ஹிட்டானது.

இவர் அடுத்ததாக சூரி நாயகனாக நடிக்கும் படத்தை இயக்க உள்ளார். எல்ரெட் குமார் தயாரிக்கிறார். எழுத்தாளர் ஜெயமோகனின் துணைவன் என்கிற சிறுகதையை மையமாக வைத்து இப்படம் தயாராக உள்ளது. இளையராஜா இப்படத்திற்கு இசையமைக்க உள்ளார்.

இப்படத்தில் முக்கிய கதாபாத்திரத்தில் நடிக்க ஒப்பந்தமாகி இருந்த பாரதிராஜா, திடீரென விலகியதால் அவருக்கு பதில் கிஷோர் நடிப்பதாக கூறப்பட்டது. பின்னர் அவரும் விலகியதால், அந்தக் கதாபாத்திரத்தில் அடுத்ததாக நடிக்கப்போவது யார் என்கிற எதிர்பார்ப்பு நிலவியது.

இந்நிலையில், பாரதிராஜா நடிக்கவிருந்த வயதான கதாபாத்திரத்தில் விஜய் சேதுபதி நடிக்க ஒப்பந்தமாகியுள்ளாராம். இதற்காக அவருக்கு லுக் டெஸ்ட் எடுக்கப்பட்டு படப்பிடிப்பிலும் கலந்து கொண்டுள்ளாராம்.

முதலில் ‘வடசென்னை’ படத்திலேயே விஜய் சேதுபதி – வெற்றிமாறன் கூட்டணி இணைந்தது. பின்னர், அந்தப் படத்திலிருந்து விஜய் சேதுபதி விலகியது குறிப்பிடத்தக்கது.

இலங்கைக்கு எதிரான 2ஆவது டெஸ்டிலும் தென்னாபிரிக்கா வெற்றிபெற்று தொடரையும் கைப்பற்றியது.

தென்னாபிரிக்கா – இலங்கை அணிகளுக்கிடையிலான 2ஆவது மற்றும் கடைசி டெஸ்ட் கிரிக்கெட் போட்டி ஜோகன்னஸ்பர்க்கில் கடந்த 3 ஆம் திகதி ஆரம்பமானது.

இதில் முதல் இன்னிங்சில் முறையே இலங்கை 157 ஓட்டங்களையும், தென்னாபிரிக்கா 302 ஓட்டங்களையும் எடுத்தன. அடுத்து 145 ஓட்டங்கள் பின்தங்கிய நிலையில் 2ஆது இன்னிங்சை ஆடிய இலங்கை அணி, 2ஆவது நாள் முடிவில் 4 விக்கெட்டுக்கு 150  ஓட்டங்கள் எடுத்திருந்தது.

இந்த நிலையில் 3ஆவது நாளான நேற்று தொடர்ந்து ஆடிய இலங்கை அணி 2-வது இன்னிங்சில் 211 ஓட்டங்களுக்கு சகல விக்கெட்டுகளையும் இழந்தது. அதிகபட்சமாக 10ஆவது சதத்தை நிறைவு செய்த அணித் தலைவர் கருணாரதன, 103 ரன்களில் (128 பந்து, 19 பவுண்டரி) கேட்ச் ஆனார்.

இதன் மூலம் நிர்ணயிக்கப்பட்ட 67 ஓட்டங்கள் இலக்கை தென்ஆப்பிரிக்க அணி 13.2 ஓவர்களில் விக்கெட் இழப்பின்றி எட்டிப்பிடித்து 10 விக்கெட் வித்தியாசத்தில் மெகா வெற்றி பெற்றது. இந்த வெற்றியையடுத்து தொடரை தென்ஆப்பிரிக்கா 2-0 என்ற கணக்கில் முழுமையாக கைப்பற்றியது.

2019ஆம் ஆண்டு தென்னாபிரிக்கா அணி சொந்த மண்ணில் இலங்கையிடம் 0-2 என்ற கணக்கில் டெஸ்ட் தொடரை இழந்தது. அதற்கு தற்போது பழிதீர்த்துக் கொண்டது.

சர்வதேச ஒரு நாள் போட்டி அறிமுகமாகி நேற்று 50 ஆவது ஆண்டு தினம் கொண்டாடப்பட்டது.

ஆஸ்திரேலியா-இங்கிலாந்து அணிகள் இடையே மெல்போர்னில் 1970ஆம் ஆண்டு டிசம்பர் 31 ஆம் திகதி முதல் 1971 ஆம் ஆண்டு ஜனவரி 5ஆம் திகதிவரை நடக்க இருந்த ஆஷஸ் டெஸ்ட் கிரிக்கெட் போட்டி மழையால் ஒரு பந்து கூட வீசப்படாமல் கைவிடப்பட்டது.

ரசிகர்களை ஏமாற்றக்கூடாது என்பதற்காக இவ்விரு அணிகள் இடையே 40 ஓவர் அடிப்படையில் சர்வதேச போட்டி ஒன்றை 1971ஆம் ஆண்டு ஜனவரி 5 ஆம் திகதியில் இருந்தே மெல்போர்னில் ஆஸ்திரேலிய கிரிக்கெட் வாரியம் நடத்தியது.

இதில் முதலில் துடுப்பெடுத்தாடிய இங்கிலாந்து 190 ஓட்டங்களுக்குள் சகல விக்கெட்டுகளையும் இழந்தது.  இந்த இலக்கை ஆஸ்திரேலியா 35 ஓவர்களில் எட்டிப்பிடித்து 5 விக்கெட் வித்தியாசத்தில் வெற்றி பெற்றது.

40 ஆயிரத்திற்கும் மேற்பட்ட ரசிகர்கள் இந்த போட்டியை ஆரவாரத்துடன் உற்சாகமாக கண்டுகளித்தனர். இது தான் சர்வதேச ஒரு நாள் கிரிக்கெட் உதயமாவதற்கு அடித்தளமாக அமைந்தது.

அத்துடன் அது முதலாவது ஒரு நாள் போட்டியாக சர்வதேச கிரிக்கெட் கவுன்சிலால் (ஐ.சி.சி.) ஏற்றுக்கொள்ளப்பட்டது. ஒரு நாள் போட்டி அறிமுகமாகி நேற்று 50-வது ஆண்டு தினம் கொண்டாடப்பட்டது.

தொடக்கத்தில் ஒரு நாள் போட்டி 60 ஓவர், ஓவருக்கு 8 பந்து என்ற வகையில் நடத்தப்பட்டது. காலப்போக்கில் 50 ஓவர் என்பது நிரந்தரமானது. வீரர்கள் வெள்ளை நிற சீருடையில் இருந்து வண்ண உடைக்கு மாறினர்.

சுவாரஸ்யத்தையும், விறுவிறுப்பையும் அதிகரிக்க பவர்-பிளே, பிரிஹிட், டி.ஆர்.எஸ். தொழில்நுட்பம் என்று பல புதுமைகள் புகுத்தப்பட்டன. இதுவரை 4,267 ஒரு நாள் போட்டிகள் நடந்துள்ளன. இதில் அதிகபட்சமாக இந்தியா 990 ஒரு நாள் போட்டிகளில் விளையாடி சாதனை படைத்துள்ளது.

இலங்கைத் தொழிலாளர் காங்கிரஸின் முக்கியஸ்தர் அமரர் அருள்சாமியின் இரண்டாவது சிரார்த்த தினம் இன்றாகும்.

தனது 16 வயதில் இ.தொ.காவில் கால் பதித்தவர் அமரர் அருள்சாமி. இ.தொ.காவில் இணைந்து கொண்ட அருள்சாமி தனது இறுதிக் காலம் வரை தோட்டத் தொழிலாளர்களின் நலனுக்காக உழைத்தார்.

43 ஆண்டுகள் அரசியல், தொழிற்சங்க பணிகளில் சேவையாற்றி வந்த அமரர் அருள்சாமி அமரர் தொண்டமானின் அரசியல் பாசறையில் வளர்ந்தவர்.

1977ஆம் ஆண்டு பாராளுமன்ற பொதுத் தேர்தலில் நுவரெலியா – மஸ்கெலியா தொகுதியில் அமரர் சௌமியமூர்த்தி தொண்டமான் போட்டியிட்ட வேளையில், அவரது வெற்றிக்கான உழைத்தவர். மலையக சமுதாயதுக்காக இறுதி வரை அவர் பாடுபட்டார். மனிதத்துவம் என்ற ரீதியில் சிறியோரையும் பெரியோரையும் சமமாக உயர்ந்த நிலையில் மதிக்கும் உயரிய பண்பு இவரிடம் நிறையவே காணப்பட்டது.

மும்மொழியிலும் சரளமாகப் பேசக் கூடிய புலமையைப் பெற்றிருந்தவர் அவர். தொழிற்சங்க போராட்டங்களில் தன்னை முழுமையாக அர்ப்பணித்து சேவையாற்றிய செயல் வீரர் எனலாம்.

மத்திய மாகாணத்தில் 1988ஆம் ஆண்டு முதலாவது மாகாண சபைத் தேர்தலில் போட்டியிட்டு வெற்றி பெற்றவர். அடுத்து வந்த மாகாணசபைத் தேர்தல்களிலும் போட்டியிட்டு வெற்றி பெற்றதுடன், மத்திய மாகாண தமிழ்க் கல்வி அமைச்சராக பணி புரிந்தவர். இக்காலத்தில் மலையக பாடசாலைகளின் அபிவிருத்தியில் அர்ப்பணிப்புடன் உழைத்தவர் அருள்சாமி.

2009ம் ஆண்டு முன்னாள் ஜனாதிபதி மஹிந்த ராஜபக்சவின் பிரதேசத்திற்கான இணைப்பு பணிப்பாளர்களில் ஒருவராக நியமிக்கப்பட்டிருந்தார்.

காத்திருப்பு பட்டியல் மூலம் பாராளுமன்ற அங்கத்தவராக அங்கம் வகித்தவர். இ.தொ.கா தலைவர் அமரர் ஆறுமுகன் தொண்டமானால் 2018ஆம் ஆண்டு பெருந்தோட்ட மனிதவள நிறுவனத்தின் தலைவராக நியமிக்கப்பட்டார். தோட்டத் தொழிலாளர்களின் சம்பள உயர்வின் போது தன்னை முழுமையாக அர்ப்பணித்து சம்பள உயர்வை பெற்றுக் கொடுக்க பாடுபட்டவர்.

கலை, கலாசார ரீதியாகவும், சமூக மேம்பாட்டு விடயங்களிலும் அக்கறை கொண்டு செயற்பட்டு வந்திருக்கின்றார்.

இ.தொ.கா வின் வளர்ச்சியில் அருள்சாமிக்கு பெரும் பங்கு உண்டு. எத்தனை நெருக்கடிகள் வந்தாலும் அஹிம்சை வழியில் அமைதியாக போராடினால் வெற்றி கொள்ள முடியும் என்பதை எடுத்துக் காட்டியவர் அமரர் அருள்சாமி.

தொழிற்சங்கத் துறையில் மனிதரில் மாணிக்கமாக அமரர் அருள்சாமி விளகுகின்றார். அவர் மறைந்து இரு வருடங்கள் சென்றாலும், அன்னார் முழு மலையக மக்களின் உள்ளங்களில் என்றுமே வீற்றிருக்கின்றார்.

இ.தொ.காவின் ஊடகப் பிரிவு

மலையக பெருந்தோட்டத் தொழிலாளர்களுக்கு அடிப்படை நாட் சம்பளமாக ஆயிரம் ரூபாவை வழங்குமாறு வலியுறுத்தி ஹட்டன், மல்லியப்பு சந்தியில் இன்று கவனயீர்ப்பு போராட்டம் முன்னெடுக்கப்படவுள்ளது.

முற்பகல் 11 மணியளவில் நடைபெறவுள்ள இப்போராட்டத்தில் தொழிலாளர் தேசிய முன்னணியின் தலைவர் , முன்னாள் அமைச்சர் பழனி திகாம்பரமும் பங்கேற்கவுள்ளார்.

கொரோனா வைரஸ் தாக்கத்தைக்கருத்திற்கொண்டு, தனிமைப்படுத்தல் சட்டத்திட்டங்களுக்கமையவே இப்போராட்டத்தை முன்னெடுப்பதற்கு ஏற்பாடுகள் செய்யப்பட்டுள்ளன.

நாட்டில் மேலும் 255 பேருக்கு கொரோனா வைரஸ் தொற்று உறுதிப்படுத்தப்பட்டுள்ளது. இன்று மாத்திரம் 479 தொற்றாளர்கள் அடையாளம் காணப்பட்டுள்ளனர்.

இதன்படி மொத்த தொற்றாளர்களின் எண்ணிக்கை 45 ஆயிரத்து 726 ஆக அதிகரித்துள்ளது. இவர்களில் 38 ஆயிரத்து 262 பேர் குணமடைந்துள்ளனர்.

2 ஆவது அலைமூலம் ( பேலியகொட,சிறைச்சாலை கொத்தணிகள்) இதுவரையில் 41 ஆயிரத்து 977 பேருக்கு வைரஸ் தொற்றியுள்ளது.

அதேவேளை, கொரோனாவால் மேலும் இருவர் உயிரிழந்துள்ளனர்.

மாத்தளை மற்றும் களுத்துறை பகுதிகளைச் சேர்ந்த பெண்கள் இருவரே இவ்வாறு உயிரிழந்துள்ளனர். இருவரும் 65 வயதைக்கடந்தவர்கள். இதன்படி கொரோனாவால் இலங்கையில் உயிரிழந்தவர்களின் எண்ணிக்கை 217 ஆக அதிகரித்துள்ளது.