தரம் 6 முதல் 13 வரையான மாணவர்களுக்கு மூன்றாம் தவணை கல்வி நடவடிக்கைகளுக்காக பாடசாலைகள் இன்று (23.11.2020) காலை ஆரம்பமான நிலையில், மலையகத்திலுள்ள பாடசாலைகளிலும் கல்விச் செயற்பாடுகள் சுகாதார பாதுகாப்பு ஏற்பாடுகளுக்கு மத்தியில் ஆரம்பித்துள்ளன.

மாணவர்கள் முகக்கவசம் அணிந்து, சமூகஇடைவெளியைப் பின்பற்றி அச்சமின்றி வழமைபோல் பாடசாலைகளுக்கு வந்திருந்தாலும், மாணவர்களின் வருகையில் வீழ்ச்சி ஏற்பட்டிருந்தது என ஆசிரியர்கள் தெரிவித்தனர்.

மாணவர்கள் பாடசாலை வளாகத்துக்குள் வந்ததும் அவர்களின் உடல் வெப்பநிலை பரிசோதிக்கப்பட்டு, கைகளை கழுவிய பின்னர் வகுப்பறைக்கு செல்ல அனுமதிக்கப்பட்டனர். வகுப்பறையில் சமூகஇடைவெளியைப் பின்பற்றும் விதத்தில் ஆசனங்கள் ஒதுக்கப்பட்டிருந்தன. எனினும், ஒரு சில பாடசாலைகளில் இதனை காணமுடியவில்லை. வளப்பற்றாக்குறையே இதற்கு காரணம்.

நாட்டில் 10 ஆயிரத்து 165 அரச பாடசாலைகளில் தரம் 6 முதல் தரம் 13 வரை உள்ள 5 ஆயிரத்து 233 பாடசாலைகள் உள்ளன. மேல் மாகாணம் மற்றும் தனிமைப்படுத்தப்பட்ட பொலிஸ் பகுதிகள் தவிர்ந்த ஏனைய பகுதிகளில் உள்ள பாடசாலைகள் இன்று திறக்கப்பட்டன. ஆரம்பப்பிரிவு பாடசாலைகள் மூடப்பட்டிருந்தன.

அதேவேளை, ஹட்டன் கல்வி வலயத்தில் உள்ள, ஹட்டன் வெளிஓயா மலைமகள் தமிழ் வித்தியாலயம், ஆக்ரோயா தமிழ் வித்தியாலயம் ஆகிய இரண்டு பாடசாலைகளும் இன்று திறக்கப்படவில்லை.

இப்பகுதிகளில் நேற்று (22) கொரோனா தொற்றாளர்கள் மூவர் அடையாளம் காணப்பட்டுள்ளனர். இதனையடுத்து அவர்களுடன் தொடர்பில் இருந்தவர்கள் தனிமைப்படுத்தப்பட்டுள்ளனர். இந்நிலையிலேயே பாடசாலைகள் திறக்கப்படவில்லை. அத்துடன், இப்பகுதிகளில் இருந்து வேறு பாடசாலைகளுக்கு செல்லும் மாணவர்களை வீட்டில் இருந்தே கல்வி நடவடிக்கைகளை தொடருமாறு கோரப்பட்டுள்ளது.

2021 வரவு செலவுத் திட்டம் மீதான குழுநிலை விவாதம் பாராளுமன்றத்தில் இன்று முதல் டிசம்பர் 10ஆம் திகதி வரை இடம்பெறவுள்ளது.

நிதி அமைச்சரும் பிரதமருமான மஹிந்த ராஜபக்சவினால் கடந்த 17 ஆம் திகதி 2021 ஆம் ஆண்டுக்கான வரவு செலவுத் திட்ட யோசனை பாராளுமன்றில் சமர்ப்பிக்கப்பட்டது.

2ஆம் வாசிப்பு மீதான வாக்கெடுப்பு 21 ஆம் திகதி நடைபெற்றது. இதன்போது வரவு செலவுத் திட்டம் 99 மேலதிக வாக்குகளால் நிறைவேற்றப்பட்டது.குறித்த வாக்கெடுப்பின்போது இதற்கு ஆதரவாக 151 வாக்குகளும் எதிராக 52 வாக்குகளும் கிடைக்கப்பெற்றன.

இந்த நிலையிலேயே 2021ஆம் ஆண்டுக்கான வரவு செலவுத் திட்டத்தின் குழுநிலை விவாம் இன்று முதல் டிசம்பர் மாதம் 10ஆம் திகதி வரையில் நடைபெறவுள்ளது. டிசம்பர் மாதம் 10ஆம் திகதி வாக்கெடுப்பும் நடைபெறவுள்ளமை குறிப்பிடத்தக்கது.

கொரோனா வைரஸ் தொற்றால் ஏற்படும் மரணங்கள் தொடர்பான தகவல்கள் ஏன் நள்ளிரவில் வெளியிடப்படுகின்றன என்று ஐக்கிய மக்கள் சக்தியின் கொழும்பு மாவட்ட நாடாளுமன்ற உறுப்பினர் முஜிபூர் ரஹ்மான் கேள்வி எழுப்பினார்.

எதிர்க்கட்சித் தலைவர் அலுவலகத்தில்  நடைபெற்ற ஊடகவியலாளர் சந்திப்பில் கலந்துகொண்டு உரையாற்றுகையிலேயே அவர் இவ்வாறு வினா எழுப்பினார்.

இது தொடர்பில் அவர் மேலும் கூறியவை வருமாறு,

” ஜனாதிபதி கோட்டாபய ராஜபக்ச தலைமையிலான இந்த அரசாங்கத்துக்கு எந்தவொரு விடயத்திலும் வெளிப்படைதன்மை இல்லை. இன்று கொரோனா வைரஸ் தொற்றால் ஏற்படும் மரணங்கள் தொடர்பான தகவல்கள்கூட நள்ளிரவில்தான் வெளியிடப்படுகின்றன.

அதாவது இரவு 10.30 மணி செய்தியும் முடிவடைந்த பின்னரே அறிக்கை வெளியாகின்றது. அதுவும் நள்ளிரவு பார்த்து வெளியிடப்படுகின்றது. கடந்த சில நாட்களாக இவ்வாறுதான் நடைபெறுகின்றது. எனவே, மக்களுக்கு  உரிய வகையில் தகவல்கள் சென்றடையக்கூடாது என்ற நோக்கிலா இவ்வாறான நடவடிக்கை முன்னெடுக்கப்படுகின்றது என்ற சந்தேகம் எமக்கு ஏற்படுகின்றது. அத்துடன், பாரதூரத்தன்மையை மூடிமறைக்கும் முயற்சியாகக்கூட இருக்கலாம் என்ற அச்சம் ஏற்பட்டுள்ளது.

நள்ளிரவில் வெளியிடாமல் காலைவேளையில் வெளியிட்டால் என்ன எனவும் கேட்கவிரும்புகின்றேன்.” – என்றார்.

இலங்கையில் கொரோனா வைரஸ் தொற்றாளர்களின் எண்ணிக்கை 20 ஆயிரத்து 171 ஐ தாண்டியுள்ளது. நேற்று மாத்திரம் 391 பேருக்கு வைரஸ் தொற்று உறுதிப்படுத்தப்பட்டுள்ளது.

வைரஸ் தொற்றுக்கு இலக்கானவர்களில் 14 ஆயிரத்து 69 பேர் நேற்றுவரை குணமடைந்துள்ளனர். 6 ஆயிரத்து 15 பேருக்கு தொடர்ந்தும் சிகிச்சையளிக்கப்பட்டுவருகின்றது. இதுவரை 87 பேர் உயிரிழந்துள்ளனர்.

ஊவா மாகாணத்தில் விளையாட்டுத்துறையை மேம்படுத்துவதற்காக முக்கியமான சில வேலைத்திட்டங்களை முன்னெடுப்பதற்கு தீர்மானிக்கப்பட்டுள்ளது.

ஊவா மாகாணத்தில் விளையாட்டுத்துறையை மேம்படுத்துவது தொடர்பான விசேட கலந்துரையாடல் பதுளை மாவட்ட செயலகத்தில் அண்மையில் நடைபெற்றது.

விளையாட்டுத்துறை அமைச்சர் நாமல் ராஜபக்சவால் ஏற்பாடு செய்யப்பட்டிருந்த இக்கூட்டத்தில் நாடாளுமன்ற உறுப்பினர் தேனுக்க விதானகமே, பிரதமரின் இணைப்புச்செயலாளர் செந்தில் தொண்டமான் , மேஜர் தெனிபிட்டிய எம்.பி., ஆகியோருடன் விளையாட்டு துறை அதிகாரிகளுக்கும், விளையாட்டுக் கழகங்களின் பிரதிநிதிகளுக்கும் கலந்துகொண்டனர்.

இக்கலந்துரையாடலின்போது ஊவா மாகாணத்தில் விளையாட்டுத் துறையை மேம்படுத்துவதற்கு பல்வேறு திட்டங்கள் நாமல் ராஜபக்சவால் முன்வைக்கப்பட்டன.

1. புதிய விளையாட்டு மைதானங்களை ஏற்படுத்துதல்.

2. விளையாட்டு மைதானங்களை மேம்படுத்துதல்.

3. சிறப்பு விளையாட்டு பயிற்சி முகாம்கள் நிறுவுதல்.

4. விளையாட்டுக் கழகங்களையும், விளையாட்டு வீரர்கள் மற்றும் விளையாட்டுப் வீராங்கனைகளையும் மேம்படுத்துதல்.

5. பயிற்சி மையங்களுக்கு பல்வேறு விளையாட்டு உபகரணங்களை வழங்குதல்.

திடீர் சுகயீனம் காரணமாக உயிரிழந்த ஊடகவியலாளர் சந்திரமதி குழந்தைவேலின் இறுதிக் கிரியைகள் நாளை (23) இடம்பெறவுள்ளன. அவரது சொந்த ஊரான கண்டியில் நாளை இறுதிக் கிரியைகள் இடம்பெறவுள்ளதாக உறவினர்கள் தெரிவித்தனர்.

சந்திரமதியின் பூதவுடல் கொழும்பு – புஞ்சி பொரள்ளையிலுள்ள லங்கா மலர்சாலையில், மக்கள் அஞ்சலிக்காக இன்றிரவு (22) வைக்கப்படவுள்ளது.

அதனைத் தொடர்ந்து, நாளை காலை அவரது சொந்த ஊருக்கு பூதவுடல் கொண்டு சென்று, அங்கு மக்கள் அஞ்சலிக்காக வைக்கப்படவுள்ளதுடன், மாலை இறுதிக் கிரியைகள் நடத்தப்படவுள்ளன.

சக்தி நியூஸ் பெஸ்ட் ஊடக நிறுவனத்தில் கடந்த 4 வருட காலமாக சந்திரமதி குழந்தைவேல் கடமையாற்றியிருந்தார்.

கொழும்பிலுள்ள அவரது வீட்டில் நேற்று முன்தினம் இரவு அவர் காலமானார்.

திடீர் சுகயீனம் ஏற்பட்ட நிலையிலேயே அவர் காலமானதாக அறிவிக்கப்பட்டது.

சந்திரமதியின் பூதவுடலில் நடத்தப்பட்ட பி.சி.ஆர் பரிசோதனையில், அவருக்கு கொவிட் தொற்று இல்லை என்பது உறுதிப்படுத்தப்பட்டிருந்தமை குறிப்பிடத்தக்கது.

“பிரதமர் அலுவலகம் மற்றும் அலரி மாளிகையில் பணியாற்றும் எந்தவொரு ஊழியரும் கொவிட்-19 தொற்றுக்கு உள்ளாகவில்லை என்பதை உறுதிபடுத்துகின்றோம். கொவிட்-19 தொற்று நிலைமை காரணமாக அலரி மாளிகை தற்காலிகமாக மூடப்பட்டுள்ளதாக தேசிய நாளிதழொன்றில் வெளியாகியுள்ள செய்தி உண்மைக்கு புறம்பானதும் ஆதாரமற்றதுமாகும்.”

இவ்வாறு பிரதம அமைச்சரின் அலுவலகம் தெரிவித்துள்ளது. இது தொடர்பில் விடுக்கப்பட்டுள்ள அறிக்கையில் மேலும் தெரிவிக்கப்பட்டுள்ளவை வருமாறு,

கொவிட்-19 நிலைமைக்கு மத்தியில் அரசாங்கம் மற்றும் சுகாதார பிரிவினரால் வெளியிடப்பட்டுள்ள அறிவுறுத்தல்களுக்கமைய பிரதமர் அலுவலகம் மற்றும் அலரி மாளிகையின் நாளாந்த பணிகள் எவ்வித தடையுமின்றி முறையான சுகாதார வழிகாட்டல்களுடன் முன்னெடுக்கப்பட்டு வருகின்றன.

பிரதமர் அலுவலகம் மற்றும் அலரி மாளிகையின் பணிகளுக்கென, ஏனைய அரச நிறுவனங்களை போன்று சேவைகளை நிறைவேற்றுவதற்கு அத்தியவசியமான மட்டுப்படுத்தப்பட்ட ஊழியர்களே பணியில் ஈடுபடுத்தப்பட்டுள்ளனர்.

அத்துடன், பஸில் ராஜபக்ச தலைமையில் முன்னெடுக்கப்படும் ஜனாதிபதி செயலணியின் பணிகளும் எவ்வித தடையுமின்றி அலரி மாளிகை வளாகத்தில் முன்னெடுக்கப்பட்டு வருகின்றன.

பிரதமரின் பாதுகாப்பு பிரிவுடன் தொடர்புடைய வெளிப்புற பிரிவினரே கொவிட் தொற்றாளர்களுடன் தொடர்புப்பட்டுள்ளனர்.

பிரதமர் அலுவலகம் மற்றும் அலரி மாளிகையில் கடமையில் ஈடுபட்டுள்ள பாதுகாப்பு பிரிவின் அதிகாரிகள் வழமைப்போன்று கடமையில் ஈடுபட்டுள்ளனர் என்றும் உறுதிபடுத்துகின்றோம்.

நாட்டில் மேலும் 175 பேருக்கு கொரோனா வைரஸ் தொற்று உறுதிப்படுத்தப்பட்டுள்ளது. பேலியகொடை கொரோனா தொற்றாளர்களுடன் தொடர்பில் இருந்தவர்களுக்கே இவ்வாறு வைரஸ் தொற்றியுள்ளது.

அதேவேளை, மொத்த தொற்றாளர்களின் எண்ணிக்கை 19 ஆயிரத்து 946 ஆக அதிகரித்துள்ளது.

கொரோனாவால் இதுவரையில் 83 பேர் உயிரிழந்துள்ளனர். 14 ஆயிரத்து 69 பேர் குணமடைந்துள்ளனர்.