மக்கள் எதிர்பார்ப்புகளைச் சிதறடித்த வரவு செலவுத் திட்டம்; மக்கள் எழுச்சியை அடக்க கைது வேட்டை

மக்களின் எதிர்பார்ப்புகளைச் சிதறடிக்கும் வகையில் வரவு செலவுத் திட்டத்தை முன்வைத்துவிட்டு, அதற்கு எதிராக மக்கள் மத்தியில் எழுந்துள்ள எதிர்ப்பையும் எழுச்சியையும் அடக்குவதற்காகத் தொழிற்சங்கத் தலைவர்கள் கைது செய்யப்படுவதாக எதிர்க்கட்சித் தலைவர் சஜித் பிரேமதாச குற்றஞ்சாட்டியுள்ளார்.
தொழிற்சங்கத் தலைவர் ஆனந்த பாலித்த கைது செய்யப்பட்டமை தொடர்பில் கருத்துத் தெரிவிக்கும்போதே அவர் இதனைத் தெரிவித்துள்ளார்.
பெட்ரோலியம், மின்சார உற்பத்தி மற்றும் வலுசக்தித் துறைகள் தொடர்பில் தொடர்ச்சியாகக் கருத்துகளை முன்வைத்து வருபவரும், நாட்டின் குடிமக்கள் மற்றும் நுகர்வோரின் உரிமைகளுக்காகக் குரல் கொடுத்து வருபவருமான ஆனந்த பாலித்த, நேர்மையும் துணிச்சலும் கொண்ட தொழிற்சங்கத் தலைவர் என சஜித் பிரேமதாச குறிப்பிட்டுள்ளார்.
அவர் ஐக்கிய மக்கள் சக்தியின் உறுப்பினரும் ஆவார். அவரது திடீர் கைது தொடர்பில் அறிந்துகொண்டதையடுத்து, இன்று (17) புதுக்கடை நீதவான் நீதிமன்றத்துக்கு வருகை தந்ததாகவும் அவர் தெரிவித்துள்ளார்.
அத்துடன், ஆனந்த பாலித்தவின் உரிமைகளைப் பாதுகாப்பதற்காக, ஐக்கிய மக்கள் சக்தியின் செயற்குழு உறுப்பினரும் ஜனாதிபதி சட்டத்தரணியுமான உபுல் ஜயசூரிய தலைமையிலான சட்டத்தரணிகள் குழுவொன்று நீதிமன்றத்தில் முன்னிலையாகியுள்ளதாகவும், அவர்கள் சுயமாக முன்வந்து இந்த சட்ட உதவியை வழங்குவதாகவும் அவர் குறிப்பிட்டுள்ளார்.
நாட்டில் ஜனநாயகத்துக்கான வெளியும், ஜனநாயக உரிமைகளும் நாளுக்கு நாள் மோசமடைந்து வருவதாகச் சுட்டிக்காட்டிய சஜித் பிரேமதாச, நாடாளுமன்றத்துக்குள் காணப்படும் உரிமைகள்கூட தற்போது பாதிக்கப்பட்டு வருவதாகத் தெரிவித்துள்ளார்.
220 இலட்சம் மக்களின் சார்பாகக் கேள்விகளை எழுப்ப முடியாத நிலை நாடாளுமன்றத்தில் உருவாகியுள்ளதாகவும் அவர் குற்றஞ்சாட்டியுள்ளார்.
மக்களின் பிரச்சினைகள் தொடர்பில் நாடாளுமன்றத்தில் உரையாற்றும்போது, அவற்றை ஹன்சார்ட் பதிவிலிருந்து நீக்குவதற்கும், உரிய முறையில் பதிவு செய்யாமல் விடுவதற்கும் சபாநாயகர் தலைமையிலான குழுவொன்று செயற்பட்டு வருவதாகவும் அவர் தெரிவித்துள்ளார்.
பேச்சுச் சுதந்திரம் மற்றும் கருத்து வெளிப்பாட்டுச் சுதந்திரம் பாதிக்கப்படும் சூழல் உருவாகியுள்ளதாகவும், இதற்கு எதிராகக் குரல் கொடுக்க முடியாத வகையில் சர்வாதிகாரப் போக்கிலான ஆட்சிக் கட்டமைப்பு உருவாக்கப்பட்டு வருவதாகவும் அவர் மேலும் தெரிவித்துள்ளார்.
மக்களின் எதிர்பார்ப்புகளைச் சிதறடிக்கும் வகையில் வரவு செலவுத் திட்டம் முன்வைக்கப்பட்டுள்ளதால், உழைக்கும் மக்கள் வீதிகளில் இறங்கிப் போராடும் நிலை ஏற்பட்டுள்ளது. இந்நிலையில், அவர்களின் குரல்களை ஒடுக்குவதற்காகத் தொழிற்சங்கத் தலைவர்கள் கைது செய்யப்பட்டு வருவதாகவும் சஜித் பிரேமதாச குற்றஞ்சாட்டியுள்ளார்.
நாட்டின் ஜனநாயகக் கட்டமைப்புகள், அரச நிறுவனங்கள் மற்றும் ஜனநாயகச் செயற்பாடுகள் இல்லாதொழிக்கப்படுவதற்கு ஒருபோதும் இடமளிக்க முடியாது என்றும் அவர் வலியுறுத்தியுள்ளார்.
……………..
சர்வதேச நீதியை வலியுறுத்தி யாழில் மாபெரும் போராட்டம்

செம்மணி மனிதப் புதைகுழி தொடர்பான விசாரணைகளின்போது நீதிமன்றத்தில் சமர்ப்பிக்கப்பட்ட இடைக்கால அறிக்கையை முற்றாக நிராகரிப்பதாகத் தெரிவித்து, யாழ்ப்பாணம் மாவட்ட வலிந்து காணாமல் ஆக்கப்பட்டவர்களின் உறவுகள் சங்கத்தினரால் சர்வதேச நீதியை வலியுறுத்தி மாபெரும் கவனயீர்ப்புப் போராட்டம் இன்று செவ்வாய்க்கிழமை முன்னெடுக்கப்பட்டது.
யாழ்ப்பாணம் – அரியாலை தபால்கட்டைச் சந்தியில் முற்பகல் 10.30 மணியளவில் ஆரம்பமான இந்தப் போராட்டத்தில், நாடாளுமன்ற உறுப்பினர்கள், உள்ளூராட்சி மன்ற உறுப்பினர்கள் உள்ளிட்ட அரசியல் பிரமுகர்கள் மற்றும் வலிந்து காணாமல் ஆக்கப்பட்டவர்களின் உறவினர்கள் என நூற்றுக்கணக்கானோர் கலந்துகொண்டனர்.
செம்மணி மனிதப் புதைகுழி தொடர்பான விசாரணைகள் வெளிப்படைத்தன்மையுடனும் சுயாதீனமான முறையிலும் முன்னெடுக்கப்பட வேண்டும் என்றும், பாதிக்கப்பட்ட மக்களுக்கு உண்மையான நீதி கிடைப்பதற்குச் சர்வதேச விசாரணைப் பொறிமுறையே அவசியம் என்றும் போராட்டத்தில் கலந்துகொண்டவர்கள் வலியுறுத்தினர்.
நீதிமன்றத்தில் சமர்ப்பிக்கப்பட்ட இடைக்கால அறிக்கை தொடர்பில் தமது கடும் அதிருப்தியை வெளிப்படுத்திய போராட்டக்காரர்கள், அதனை முற்றாக நிராகரிப்பதாக அறிவித்தமையுடன், செம்மணி விவகாரத்தில் உண்மைகள் முழுமையாக வெளிக்கொணரப்பட்டுப் பாதிக்கப்பட்ட குடும்பங்களுக்கு நீதி நிலைநாட்டப்பட வேண்டும் என்றும் கோரிக்கை விடுத்தனர்.
சர்வதேச நீதிக்கான கோரிக்கையை முன்வைத்து முன்னெடுக்கப்பட்ட இந்தப் போராட்டத்தில் பல்வேறு தரப்பினரும் ஒன்றிணைந்து தமது கவனயீர்ப்பை வெளிப்படுத்தியமை குறிப்பிடத்தக்கது.
……………..
ஏமாற்று அரசியல்வாதிகளுக்கு மலையக மக்கள் மீண்டும் இடமளிக்கமாட்டார்கள்

தேசிய மக்கள் சக்தி அரசாங்கத்தின் மூன்றாவது வரவு செலவுத் திட்டம் உண்மையான மற்றும் நிலையான அபிவிருத்தியை நோக்கமாகக் கொண்டு, மக்களுக்காகத் தயாரிக்கப்பட்ட மக்கள் வரவு செலவுத் திட்டமாக உருவாக்கப்பட்டுள்ளது என பிரதி அமைச்சர் சுந்தரலிங்கம் பிரதீப் அவர்கள் இன்றைய தினம் தனது நாடாளுமன்ற உரையில் தெரிவித்தார்.
வீழ்ச்சியிலிருந்து மீட்சியை நோக்கிச் செல்லும் இத்திட்டம் அனைத்து நாட்டு மக்களுக்கும் நன்மை பயப்பதாக அமையும் என்று குறிப்பிட்ட அவர், குறிப்பாக மலையக மக்களுக்கு இத்திட்டம் எத்தகைய முக்கியத்துவம் வாய்ந்தது என்பது குறித்து விரிவாகச் சுட்டிக்காட்டினார்.
இந்த வரவு செலவுத் திட்டத்தில் பெருந்தோட்டத்துறைக்காக சுமார் 13,000 மில்லியன் ரூபாயும், மலையக மக்களின் உட்கட்டமைப்பு வசதிகளை மேம்படுத்துவதற்காக சுமார் 3,000 மில்லியன் ரூபாயும் ஒதுக்கீடு செய்யப்பட்டுள்ளன.
கடந்த கால அரசாங்கங்களால் கட்டப்பட்டு இடைநிறுத்தப்பட்ட வீடுகளை மீள்நிர்மாணம் செய்து மீண்டும் மக்களுக்கு வழங்குவதற்காக 100 மில்லியன் ரூபாயும், அனர்த்தங்களால் பாதிக்கப்பட்ட மக்களுக்கு வீடுகள் கட்டுவதற்காக 1,200 மில்லியன் ரூபாயும், இந்திய வீடமைப்புத் திட்டத்தை முன்னெடுத்துச் செல்வதற்காக 2,800 மில்லியன் ரூபாயும் ஒதுக்கப்பட்டுள்ளன.
கடந்த காலத்தை விட மலையக மக்களுக்குச் சம்பள உயர்வு வழங்கப்பட்டுள்ளதுடன், 2027 ஆம் ஆண்டும் அந்தச் சம்பள உயர்வை வழங்குவதற்காக 3,800 மில்லியன் ரூபாயும், பனை அபிவிருத்திக்காக 100 மில்லியன் ரூபாயும் உயர்த்தப்பட்டுள்ளன.
மேலும், மலையகத்தில் கோவில்கள் நிர்மாணிப்பதற்காக 50 மில்லியன் ரூபாயும், அஸ்வெசும கொடுப்பனவு ஊடாக அநேகமான மலையக மக்களுக்கும் நன்மைகள் கிடைக்கவுள்ளதுடன், பெருந்தோட்டப் பாடசாலைகள் அபிவிருத்திப் பிரிவிற்காக கல்வி அமைச்சு மூலம் 360 மில்லியன் ரூபாயும், பாடசாலை அபிவிருத்திக்காக 245 மில்லியன் ரூபாயும் ஒதுக்கீடு செய்யப்பட்டுள்ளன.
உரையின் போது மலையகக் கட்சிகளைச் சார்ந்தவர்கள் எழுப்பிய விமர்சனங்களுக்குப் பதிலளித்த பிரதி அமைச்சர், கடந்த காலங்களில் மலையகக் காணிகள் மற்றும் மக்கள் எவ்வாறு ஒப்பந்தங்கள் மூலம் ஏமாற்றப்பட்டார்கள் என்பதை அம்பலப்படுத்தினார்.
1992 மற்றும் 1995 ஆம் ஆண்டுகளில் பெருந்தோட்டக் காணிகள் தனியார்மயப்படுத்தப்பட்ட கொள்கைகளின் கீழ் ஒப்பந்தங்கள் மேற்கொள்ளப்பட்ட போது, அன்றைய ஆட்சியாளர்களுடன் இணைந்து கொண்டு மலையகக் காணிகளையும் மக்களையும் அடகு வைத்தவர்கள் யார் என்பதைச் சிந்திக்க வேண்டும் என அவர் கேள்வி எழுப்பினார்.
அன்று மலையக மக்களைக் காட்டிக் கொடுத்த தலைவர்களின் சந்ததியினரே இன்று குத்தகை ஒப்பந்தத்தைக் கிழித்தெறியப் போவதாகக் கூறுகின்றனர்.
ஆனால், அந்தந்தக் கூட்டு ஒப்பந்தங்களிலும், குத்தகை ஒப்பந்தங்களிலும் மலையக மக்களை அடகு வைத்தது அவர்களது தந்தையர், பாட்டன், முப்பாட்டன்மார்களே என்பதை அவர் சுட்டிக்காட்டியதுடன், தேசிய மக்கள் சக்தி அரசாங்கம் மலையக மக்களின் காணி உரிமை, வீட்டு உரிமை, கல்வி மற்றும் சுகாதாரம் உள்ளிட்ட அனைத்து உரிமைகளுக்காகவும் தொடர்ந்தும் போராடி வருவதாக உறுதியளித்தார்.
எதிர்காலத் திட்டங்கள் குறித்துத் தெரிவித்த அவர், மலையகப் பாடசாலைகளின் பாதைகளைச் சீரமைத்தல், ஆசிரியர் நியமனங்களை வழங்குதல் மற்றும் தரமான கல்வியை வழங்குவதற்கான நடவடிக்கைகளை அரசாங்கம் முன்னெடுத்து வருவதாகத் தெரிவித்தார்.
பனை உற்பத்தித் துறையில் பெண்களுக்கும் தொழிலாளர்களுக்கும் சிறப்புப் பயிற்சிகள் மற்றும் நிதி உதவிகள் வழங்கப்பட்டு ஏற்றுமதித் தரம் உயர்த்தப்படும் என்றும், யாழ்ப்பாணத்தில் பல வருடங்களாக மூடப்பட்டிருக்கும் திக்கம் வடிசாலை விரைவில் திறக்கப்பட்டு பொருளாதார நன்மைகள் வழங்கப்படும் என்றும் கூறினார்.
மலையக மக்கள் ஒருபோதும் தங்களை ஏமாற்றிய அரசியல்வாதிகளை மீண்டும் ஆட்சிக்குக் கொண்டுவர இடமளிக்க மாட்டார்கள் என்றும், தேசிய மக்கள் சக்தி அரசாங்கம் மலையக மக்களின் உரிமைகளை முழுமையாகப் பாதுகாத்து மேம்படுத்தும் என்றும் பிரதி அமைச்சர் சுந்தரலிங்கம் பிரதீப் தனது உரையை நிறைவு செய்தார்.
……………..
ருமேஷ் தரங்கவுக்கு ஐந்து புதிய ஈட்டிகள் கையளிப்பு

இலங்கை ஈட்டி எறிதல் வீரர் ருமேஷ் தரங்கவின் தேவைகளுக்கு ஏற்ப விசேடமாகத் தயாரிக்கப்பட்ட ஐந்து ஈட்டிகள் ஸ்வீடனிலிருந்து இறக்குமதி செய்யப்பட்டு அவரிடம் கையளிக்கப்பட்டுள்ளன.
இளைஞர் விவகாரங்கள் மற்றும் விளையாட்டுத்துறை அமைச்சின் ஏற்பாட்டில் இந்த ஈட்டிகள் பெற்றுக்கொள்ளப்பட்டுள்ளன. அவர் முன்னர் பயன்படுத்திய ஈட்டி சேதமடைந்ததைத் தொடர்ந்து, சர்வதேசப் போட்டிகளுக்கான தயார்படுத்தலுக்கு ஆதரவளிக்கும் நோக்கில் புதிய உபகரணங்கள் கொள்வனவு செய்யப்பட்டுள்ளன.
இன்று (16) இடம்பெற்ற உத்தியோகபூர்வ கையளிப்பு நிகழ்வில், இளைஞர் விவகாரங்கள் மற்றும் விளையாட்டுத்துறை அமைச்சர் சுனில் குமார கமகே மற்றும் விளையாட்டுத்துறை பணிப்பாளர் நாயகம் எஸ். அச்சுதன் ஆகியோர் கலந்துகொண்டனர்.
ருமேஷ் தரங்கவின் தந்தையும் பயிற்றுவிப்பாளருமான டோனி பிரசன்னவும் இந்நிகழ்வில் பங்கேற்றிருந்தார்.
சர்வதேச மட்டத்தில் சாதனை படைக்கும் திறன்கொண்ட விளையாட்டு வீரர்கள் தமது முழுமையான திறமைகளை வெளிப்படுத்துவதற்கு அவசியமான விளையாட்டு உபகரணங்கள் மற்றும் வசதிகளை வழங்குவதே அமைச்சின் முன்னுரிமை என அமைச்சர் சுனில் குமார கமகே இதன்போது தெரிவித்தார்.
இதனிடையே, புதிய ஈட்டிகள் கிடைத்துள்ளதன் மூலம் அடுத்த ஆண்டு நடைபெறவுள்ள பல சர்வதேசப் போட்டிகளில் பங்கேற்பதற்கு தாம் முழுமையாகத் தயாராக இருப்பதாக ருமேஷ் தரங்க தெரிவித்தார்.
……………
2027ஆம் ஆண்டுக்கான தரம் 6 மாணவர் அனுமதி வெட்டுப்புள்ளிகள் வெளியீடு!

2026ஆம் ஆண்டு நடைபெற்ற தரம் 5 புலமைப்பரிசில் பரீட்சை பெறுபேறுகளின் அடிப்படையில், 2027ஆம் ஆண்டு தரம் 6 மாணவர் அனுமதிக்கான பாடசாலை வெட்டுப்புள்ளிகள் இன்று (17) வெளியிடப்பட்டுள்ளதாக கல்வி அமைச்சு அறிவித்துள்ளது.
பெற்றோர்களும் மாணவர்களும் குறித்த வெட்டுப்புள்ளி விபரங்களை கல்வி அமைச்சின் உத்தியோகபூர்வ இணையத்தளமான www.moe.gov.lk ஊடாகப் பார்வையிட முடியும் என அமைச்சு தெரிவித்துள்ளது.
அதேவேளை, தரம் 6 அனுமதிக்காக தமக்கு ஒதுக்கப்பட்டுள்ள பாடசாலையை அறிந்துகொள்ள, மாணவர்கள் https://g6application.moe.gov.lk என்ற இணையத்தளத்திற்குச் செல்ல முடியும் எனவும் அறிவிக்கப்பட்டுள்ளது.
2026ஆம் ஆண்டு தரம் 5 புலமைப்பரிசில் பரீட்சையில் மாணவர்கள் பெற்றுக்கொண்ட பெறுபேறுகளின் அடிப்படையில், 2027ஆம் ஆண்டுக்கான தரம் 6 பாடசாலை அனுமதிகளைத் தீர்மானிப்பதற்கு இந்த வெட்டுப்புள்ளிகள் பயன்படுத்தப்படவுள்ளன.
…………….
தனிமையில் வாழும் முதியவர்களுக்கு பொலிஸார் எச்சரிக்கை

தனிமையில் வசிக்கும் முதியவர்கள் கொள்ளை மற்றும் கொலை போன்ற குற்றச்செயல்களுக்கு இலக்காகும் அபாயம் அதிகரித்துள்ளதாக இலங்கை பொலிஸார் எச்சரிக்கை விடுத்துள்ளனர்.
பணம், தங்க நகைகள் உள்ளிட்ட பெறுமதியான பொருட்களைக் கொள்ளையிடும் நோக்கில் தனிமையில் வசிக்கும் முதியவர்களை இலக்குவைத்து அண்மைக்காலமாகப் பல குற்றச்சம்பவங்கள் இடம்பெற்றுள்ளதைத் தொடர்ந்து, பொலிஸார் இன்று (17) இந்த எச்சரிக்கையை விடுத்துள்ளனர்.
தொழில் நிமித்தம் பிள்ளைகள் வெளியிடங்களுக்குச் சென்றுள்ள அல்லது வெளிநாடுகளில் குடியேறியுள்ள நிலையில், தனிமையில் வாழும் முதியவர்கள் இவ்வாறான குற்றச்செயல்களுக்கு இலகுவாக இலக்காகக்கூடும் என பொலிஸார் சுட்டிக்காட்டியுள்ளனர்.
குறிப்பாக, போதைப்பொருளுக்கு அடிமையான சிலர் இவ்வாறான வீடுகளுக்குள் புகுந்து பெறுமதியான பொருட்களைக் கொள்ளையிடுவதாகவும், அண்மையில் இடம்பெற்ற சில சம்பவங்களில் கொள்ளை முயற்சியின்போது கொலைகளும் இடம்பெற்றுள்ளதாகவும் தெரிவிக்கப்பட்டுள்ளது.
இதனையடுத்து, தனிமையில் வசிக்கும் முதியவர்களின் பாதுகாப்பை உறுதிப்படுத்துவதற்காகப் பொலிஸார் பல்வேறு பாதுகாப்பு வழிகாட்டல்களை வெளியிட்டுள்ளனர்.
அதன்படி, வீட்டு வேலைகள் அல்லது முதியவர்களைப் பராமரிப்பதற்காகப் பணியாளர்களை அமர்த்தும்போது, அவர்களின் பின்னணி குறித்து முழுமையாக ஆராய்வதுடன், சம்பந்தப்பட்ட பொலிஸ் பிரிவிலிருந்து பொலிஸ் நற்சான்றிதழையும் பெற்றுக்கொள்ளுமாறு அறிவுறுத்தப்பட்டுள்ளது.
மேலும், வீடுகளில் அவசர தொலைபேசி இலக்கங்களை அனைவருக்கும் தெளிவாகத் தெரியும் இடங்களில் காட்சிப்படுத்துமாறும் கேட்டுக்கொள்ளப்பட்டுள்ளது.
இதில் பொலிஸ் அவசர இலக்கம் 119, சுவசெரிய அவசர அம்புலன்ஸ் சேவை 1990, அருகிலுள்ள பொலிஸ் நிலையம், அயலவர்கள் மற்றும் குடும்ப வைத்தியர் ஆகியோரின் தொடர்பு இலக்கங்களையும் உள்ளடக்குமாறு அறிவுறுத்தப்பட்டுள்ளது.
தனிமையில் வசிக்கும் முதியவர்கள் தொடர்பான தகவல்களை உரிய கிராம உத்தியோகத்தர் மற்றும் சமூக பொலிஸ் குழுவினருக்கு அறிவிப்பதன் மூலம் அவர்களின் பாதுகாப்பைக் கண்காணிக்க முடியும் எனவும் பொலிஸார் தெரிவித்துள்ளனர்.
அத்துடன், அவசரத் தொடர்பு இலக்கங்களை முன்கூட்டியே பதிவு செய்த எளிமையான கையடக்கத் தொலைபேசிகளை முதிய பெற்றோருக்கு வழங்குமாறும் குடும்பத்தினரிடம் கோரப்பட்டுள்ளது.
அந்நியர்கள் வீடுகளுக்குள் நுழையும்போது அவர்களின் அடையாளங்களை உறுதிப்படுத்துதல், இரவு நேரங்களில் வீடுகளின் சுற்றுப்புறங்களைப் போதிய வெளிச்சத்துடன் வைத்திருத்தல் மற்றும் அயலவர்களுடன் நெருக்கமான தொடர்பைப் பேணுதல் உள்ளிட்ட பாதுகாப்பு நடவடிக்கைகளையும் பின்பற்றுமாறு அறிவுறுத்தப்பட்டுள்ளது.
முதியவர்கள் சமூக ரீதியாகத் தனிமைப்படுத்தப்படுவதைத் தவிர்த்து, பிள்ளைகள் அவர்களுடன் அடிக்கடி தொடர்புகொள்வதுடன், நேரில் சென்று நலம் விசாரிக்க வேண்டியதன் அவசியத்தையும் பொலிஸார் வலியுறுத்தியுள்ளனர்.
அயலவர்கள் மற்றும் உள்ளூர் அதிகாரிகளுடன் நெருங்கிய தொடர்பைப் பேணுவதன் மூலம் சந்தேகத்திற்கிடமான நடவடிக்கைகளை முன்கூட்டியே அடையாளம் கண்டு குற்றச்சம்பவங்களைத் தடுக்க முடியும் எனவும் பொலிஸார் சுட்டிக்காட்டியுள்ளனர்.
எனவே, தனிமையில் வாழும் முதியவர்களின் பாதுகாப்பை உறுதிப்படுத்த பொதுமக்கள் விழிப்புடன் செயற்படுவதுடன், அவர்களுக்கு உரிய ஆதரவையும் பாதுகாப்பையும் வழங்க முன்வருமாறு பொலிஸார் கேட்டுக்கொண்டுள்ளனர்.
…………..
பி#ர#பா#க#ரனின் வீடு அமைந்திருந்த பகுதியை
நேரில் பார்வையிட்ட தொல். திருமாவளவன்

சிரேஷ்ட அரசியல்வாதி எம்.கே.சிவாஜிலிங்கத்தின் இறுதி நிகழ்வில் கலந்துகொள்வதற்காக யாழ்ப்பாணத்துக்கு வருகை தந்திருந்த இந்திய நாடாளுமன்ற உறுப்பினரும், விடுதலைச் சிறுத்தைகள் கட்சியின் தலைவருமான தொல்.திருமாவளவன், வல்வெட்டித்துறையில் அமைந்துள்ள தமிழீழ விடுதலைப் புலிகளின் தலைவர் வேலுப்பிள்ளை பிரபாகரனின் இல்லம் அமைந்திருந்த பகுதியை நேற்று நேரில் பார்வையிட்டார்.
அத்துடன், அங்கிருந்த மண்ணையும் அவர்
இந்தப் பகுதியில்தான் தலைவர் பிரபாகரனின் பிறந்த தினமான நவம்பர் 26ஆம் திகதி, மறைந்த முன்னாள் நாடாளுமன்ற உறுப்பினர் எம்.கே.சிவாஜிலிங்கம் வருடாந்தம் கேக் வெட்டிப் பிறந்த தினத்தைக் கொண்டாடுவது வழக்கமாக இருந்தமை குறிப்பிடத்தக்கது.
……………










