ஐக்கிய மக்கள் சக்திக்குள் எவ்வித முரண்பாடும் கிடையாது எனவும், கட்சித் தலைவர் சஜித் பிரேமதாச தலைமையில் புதியதொரு அரசை உருவாக்க நடவடிக்கை எடுக்கப்படும் எனவும் அக்கட்சியின் உறுப்பினர்கள் அறிவித்துள்ளனர்.

ஐக்கிய மக்கள் சக்தியின் பாராளுமன்றக்குழுக் கூட்டம் இன்று நடைபெற்றது.

இதன்போது பாராளுமன்ற உறுப்பினர் ரவூப் ஹக்கீமால் யோசனையொன்று முன்வைக்கப்பட்டுள்ளது.

இதில் சஜித் தலைமையில் தொடர்ந்தும் இயங்குவதென்றும், புதியதொரு அரசை உருவாக்குவதே இலக்கு எனவும் குறிப்பிடப்பட்டிருந்தது. அந்த யோசனை ஏகமனதாக ஏற்றுக்கொள்ளப்பட்டுள்ளது.

ஐக்கிய மக்கள் சக்திக்குள் முரண்பாடு ஏற்பட்டுள்ளது எனவும், பங்காளிக்கட்சிகளின் தலைவர்கள் வெளியேறவுள்ளனர் எனவும் தகவல்கள் வெளியாகியிருந்தமை குறிப்பிடத்தக்கது.

பல்வேறு நாடுகள் நடத்தும் டி20 லீக் தொடர்கள் சர்வதேச கிரிக்கெட் போட்டிகளுக்கு ஆபத்தானவை என்று தென் ஆப்பிரிக்க அணியின் துடுப்பாட்ட வீரர் பாப் டூப்ளசிஸ் தெரிவித்துள்ளார்.

இது தொடர்பில் கருத்து வெளியிட்ட அவர்,

“10 ஆண்டுகளுக்கு முன்பு ஆண்டுக்கு 2 டி20 லீக் தொடர்களே நடந்து வந்தது. ஆனால் இப்போது பல்வேறு நாடுகளில் 7 டி20 லீக் தொடர்கள் இப்போது நடக்கிறது. இது சர்வதேச கிரிக்கெட் போட்டிகளுக்கு ஆபத்தானது. மேலும் இது சர்வதேச கிரிக்கெட் போட்டிகளுக்கு பல்வேறு நெருக்கடியை கொடுக்கும்” என்றார் டூப்ளசிஸ்.

 ” வெஸ்ட் இண்டீஸில்தான் முதல் முதலில் டி20 லீக் போட்டிகள் நடக்க ஆரம்பித்தது. அப்போது அந்நாட்டு வீரர்கள் உள்நாட்டு டி20 லீக் தொடர்களில் கவனம் செலுத்த ஆரம்பித்தனர். அதனால் வெஸ்ட் இண்டீஸ் அணி பல திறமையான வீரர்களை இழந்தது. இப்போது தென் ஆப்பிரிக்காவிலும் இதே நிலைதான் நடக்கிறது” என்றார் டூப்ளசிஸ்.

பாகிஸ்தானின் தெற்கு சிந்து மாகாணத்தில் இரண்டு பயணிகள் ரயில்கள் மோதியதில் 30 பேர் உயிரிழந்தனர், 50க்கும் மேற்பட்டோர் காயமடைந்தனர்.

பாகிஸ்தானின் தெற்கு சிந்து மாகாணத்தின் கோட்கி மாவட்டத்தில் அமைந்துள்ள தர்கி என்ற நகரத்திற்கு அருகே கராச்சியில் இருந்து சர்கோதா செல்லும் வழியில் மில்லட் எக்ஸ்பிரஸ் ரயில் தடம் புரண்டு, லாகூரிலிருந்து கராச்சி செல்லும் சர் சையத் எக்ஸ்பிரஸ் ரயில் மீது மோதியது.

இந்த பயங்கரவிபத்தில் இதுவரை 30 பேர் உயிரிழந்தனர், 50 பேர் காயமடைந்தனர். இதன் காரணமாக கோட்கி, தர்கி, ஒபாரோ மற்றும் மிர்பூர் மாதெலோ ஆகிய மருத்துவமனைகளில் அவசரநிலை அறிவிக்கப்பட்டுள்ளது.

இந்த விபத்தில் 13 முதல் 14 பெட்டிகள் தடம் புரண்டன, ஆறு முதல் எட்டு பெட்டிகள் வரை முற்றிலுமாக சிதைந்தன.

ரோஹ்ரியிலிருந்து ஒரு நிவாரண ரயில் புறப்பட்டுள்ளது, ரயிலில் சிக்கிய மக்களை விடுவிக்க மீட்புப்பணிகளை முடுக்கிவிட்டுள்ளோம் என்று அதிகாரிகள் தெரிவித்தனர். விபத்தில் இறந்தவர்களின் எண்ணிக்கை உயரக்கூடும் என்றும் அதிகாரிகள் அச்சம் தெரிவித்தனர்.

விஜய் நடிப்பில் நெல்சன் திலீப்குமார் இயக்கத்தில் உருவாகிவரும் ‘விஜய் 65’ படத்தில் நடிகர் யோகிபாபு இணைந்துள்ளார்.

விஜய் ரசிகர் ஒருவர் ட்விட்டரில் யோகிபாபுவிடம் நீங்கள் “விஜய் 65” படத்தில் நடிக்கிறீர்களாக என்று கேள்வி எழுப்பினார். அதனைத்தொடர்ந்து தான் ’விஜய்’ 65 படத்தில் இருக்கிறேன் என்று அவர் பதில் அளித்துள்ளார்.

முன்னதாக ‘மெர்சல்’ ‘பிகில்’ உள்ளிட்ட படங்களில் விஜயுடன் இணைந்து யோகிபாபு நடித்திருந்தார். இந்த நிலையில் அவர் மீண்டும் விஜயுடன் இணைய இருக்கிறார்.

முன்னதாக, லோகேஷ் கனகராஜ் இயக்கத்தில் நடிகர் விஜய் நடிப்பில் வெளியான மாஸ்டர் படம் மக்களிடம் வரவேற்பை பெற்ற நிலையில், அதனைத்தொடர்ந்து நடிகர் விஜய் நெல்சன் திலீப் குமார் இயக்கத்தில் உருவாகிவரும் பெயரிடப்படாத படத்தில் நடித்து வருகிறார். இதனை அவரது ரசிகர்கள் ‘விஜய் 65’ என்று அழைத்து வருகின்றனர்.

இந்தப்படத்தில் விஜய்க்கு ஜோடியாக நடிகை பூஜா ஹெக்டே நடிக்கிறார். இசையமைப்பாளர் அனிருத் இசையமைக்கிறார். இந்தப் படத்திற்கு அடுத்தப்படியாக நடிகர் விஜய் தமிழில் ‘தோழா’ படத்தை இயக்கிய இயக்குநர் வம்சியுடன் இணைய இருப்பது குறிப்பிடத்தக்கது.

வாத்துவ – தல்பிட்டிய கடற்பரப்பில் உயிரிழந்த மற்றுமொரு டொல்பினின் உடல் இன்று (07) காலை கரையொதுங்கியுள்ளது.

கரையொதுங்கிய டொல்பின் உடல் தொடர்பிலான ஆரம்பகட்ட விசாரணைகள் வனஜீவராசிகள் திணைக்கள அதிகாரிகளினால் முன்னெடுக்கப்பட்டுவருகின்றது.

அதேவேளை, நாட்டின் மேற்கு கடற்பரப்பில் உயிரிழந்த 7 ஆமைகள் மற்றும் டொல்பின் ஒன்றின் உடல் நேற்று (06) கரையொதுங்கின என்பது குறிப்பிடத்தக்கது.

நன்றி – நியுஸ்பெஸ்ட்

நுவரெலியா மாவட்டத்துக்குட்பட்ட டயகம நகரிலிருந்து சுமார் 7 கிலோமீற்றர் தொலைவிலேயே நட்போன் தோட்டம் அமைந்துள்ளது.

மலையடிவாரத்தில் அமைந்துள்ள இத்தோட்டத்துக்கு செல்லும் பாதையும் குன்றும், குழியுமாக காணப்படுகின்றது.

நாட்டில் தற்போது நிலவும் சீரற்ற காலநிலையால் டயகம பகுதியும் பெரிதும் பாதிக்கப்பட்டுள்ளது. குறிப்பாக நட்போன் கிராமம் மண்சரிவு அபாயத்தை எதிர்கொண்டுள்ளது.

தோட்டத்துக்கு மேல்பகுதியில் உள்ள மலை சரியக்கூடிய அபாயம் இருப்பதாகவும், அவ்வாறு நடந்தால் முழு தோட்டமுமே மண்ணுக்குள் மூழ்கிவிடும் அபாயம் உள்ளது எனவும் தோட்ட மக்கள் அச்சம் வெளியிடுகின்றனர்.
இந்நிலையில் தம்மை சந்தித்து

கலந்துரையாடுவதற்காக இராஜாங்க அமைச்சர் ஜீவன் தொண்டமான் வருவதாக உறுதியளித்திருந்தார். எனினும், அவர் வரவில்லை. ஆனால் வேறு பகுதிகளுக்கு சென்றுள்ளார் என தோட்ட மக்கள் விசனம் வெளியிடுகின்றனர்.
” நாம் அரிசி, பருப்பு கேட்கவில்லை. பாதுகாப்பான இடங்களில் தங்கவைக்குமாறே கோருகின்றோம்.” – எனவும் பரிதேச மக்கள் குறிப்பிடுகின்றனர்.

ஜீவனை வரவேற்று, அவரிடம் குறைகளை எடுத்துரைப்பதற்கு ஆவலாக காத்திருந்த மக்களுக்கு ஏமாற்றமே காத்திருந்தது.

நாட்டில் பயணத்தடை அமுலில் உள்ளது. ஆனால் மக்கள் பிரதிநிதி என்ற வகையில் பாராளுமன்ற உறுப்பினர்களுக்கு வரமுடியும். கீழுள்ள தோட்டங்களுக்கு வந்த ஜீவன், ஏன் மேல் தோட்டத்துக்கு வரவில்லை எனவும் கேள்வி எழுப்பிள்ளனர் தோட்ட மக்கள்.

பயணக் கட்டுப்பாடு அமல்படுத்தப்பட்டுள்ள இந்த காலப் பகுதியில், அத்தியாவசிய சேவைகளில் ஈடுபடுவோர் பயணிக்கும் வாகனங்களை அடையாளம் கண்டுக்கொள்ளும் வகையில் 11 வகையிலான ஸ்டிக்கர்கள் இன்று (07) முதல் அறிமுகப்படுத்தப்படவுள்ளதாக பொலிஸ் ஊடகப் பேச்சாளர் பிரதி பொலிஸ் மாஅதிபர் அஜித் ரோஹண தெரிவிக்கின்றார்.

கொழும்பில் நேற்று நடைபெற்ற ஊடக சந்திப்பிலேயே அவர் இந்த விடயத்தை குறிப்பிட்டுள்ளார்.

பச்சை நிறம் : சுகாதார சேவை

இளம் நீல நிறம் : முப்படையினர் மற்றும் பொலிஸார்

ஊதா நிறம் : தனியார் துறை சார்ந்த அத்தியாவசிய சேவைகள்

இளம் பழுப்பு நிறம் : இறக்குமதி, ஏற்றுமதி, உற்பத்தி, தொழிற்சாலை துறைகளை சார்ந்தவர்களுக்கு

மஞ்சள் : அத்தியாவசிய சேவை வழங்குநர்

சிவப்பு நிறம் : அத்தியாவசிய பொருட்களை விநியோகிப்போர்

இளம் மஞ்சள் நிறம் : ஊடகம் மற்றும் தொலைத்தொடர்பு நிறுவனங்கள்

வெள்ளை நிறம் : வெளிநாடு செல்வோருக்கானது.

கருப்பு நிறம் : மனிதாபிமான நடவடிக்கைகள் (மரண வீடுகள், மருத்துவ பரிசோதனை, மருந்து கொள்வனவு)

சாம்பல் நிறம் : உணவு வகைகள் மற்றும் விநியோக சேவை

அரச சேவை மற்றும் அதன் ஏனைய நடவடிக்கைகளுக்காக விசேட நிறத்திலான ஸ்டிக்கர் ஒன்று அறிமுகப்படுத்தப்படுகின்றது.

இந்த வாகனங்களில் ஒட்டப்படும் ஸ்டிக்கர்களில், குறித்த வாகனத்தில் பயணிப்போரின் எண்ணிக்கை குறிப்பிடப்படும் என அவர் கூறுகின்றார்.

அந்த எண்ணிக்கையை மீறி, அதிகளவிலானோர் பயணிப்பார்களாயின், அவர்களுக்கு எதிராக நடவடிக்கை எடுக்கப்படும் என அஜித் ரோஹண தெரிவிக்கின்றார்.

தமது தேசிய அடையாளஅட்டை இலக்கம், நிறுவனத்தினால் விநியோகிக்கப்பட்டுள்ள கடிதம் ஆகியவற்றை பரிசோதனை செய்ததன் பின்னரே இந்த ஸ்டிக்கர்களை விநியோகிக்க நடவடிக்கை எடுக்கப்படும் என அவர் கூறுகின்றார்.

இதன்படி, கொழும்பிற்குள் பிரவேசிக்கும் வாகனங்களுக்கு இந்த ஸ்டிக்கர்கள் ஒட்டப்படவுள்ளமையினால், இன்றைய தினம் கொழும்பிற்குள் பிரவேசிக்கும் நுழைவாயில்களில் கடும் வாகன நெரிசல் ஏற்படக்கூடும் என அவர் தெரிவிக்கின்றார்.

இந்த வாகனங்களில் வேறு நபர்கள் பயணிப்பார்களாயின், அல்லது வேறு நடவடிக்கைகளுக்கு பயன்படுத்தப்படுமாயின், குறித்த வாகனம் பொலிஸாரின் பொறுப்பிற்கு எடுக்கப்படும் என அவர் குறிப்பிடுகின்றார்.

குறித்த ஸ்டிக்கர் நடைமுறையானது, பயணக் கட்டுப்பாடு முடிவுக்கு கொண்டு வரப்படும் வரை செலுப்படியாகும் என பொலிஸ் ஊடகப் பேச்சாளர் பிரதி பொலிஸ் மாஅதிபர் அஜித் ரோஹண தெரிவிக்கின்றார்.

பாடசாலை மாணவர்களுக்கான பிரஜா வித்தியா கல்வித் திட்டமொன்று ஆரம்பிக்கப்பட்டுள்ளதாக பிரஜாசக்தி செயல்திட்டத்தின் பணிப்பாளர் நாயகம் பாரத் அருள்சாமி தெரிவித்தார்.

கொவிட் 19 பாதிப்பின் காரணமாக மாணவர்கள் தமது கல்வி செயற்பாடுகளை முன்னெடுப்பதில் பல சவால்களை எத்ரிக்கொள்ளும் நிலையில் அமைச்சர் ஜீவன் தொண்டமானின் எண்ண கருவிற்கமைய பிரஜாசக்தி செயல்திட்டத்தின் ஊடாக இந்தத் திட்டம் முன்னெடுக்கப்பட்டுள்ளதாக அவர் மேலும் குறிப்பிட்டுள்ளார்.

இதுகுறித்து மேலும் விளக்கமளித்துள்ள பாரத் அருள்சாமி,

இந்த விசேட திட்டத்தின் ஊடாக பல பாடநெறிகள் ‘இலவசமாக’ பிரஜாசக்தி பேஸ்புக் தளத்தின் ஊடாக நேரடியாக தினமும் பதிவேற்றப்படும்.

மாணவர்களின் கல்வியை இலகுவாக்குதே எமது நோக்கம். இப்பாடநெறிகள் திறமையான ஆசிரியர்கள், விரிவுரையாளர்கள், வளவாளர்கள், பல்கலைகழக மாணவர்கள் என பலரால் வழங்கப்பட உள்ளது.

கற்பித்தலில் ஆர்வமுள்ளோரும் எம்முடன் இணைந்துக்கொள்ளலாம். நேரடியாக மாணவர்கள் தமக்கு தேவையான கேள்விகளையும் ஆசிரியர்களிடம் கேட்டு,சந்தேகங்களைத் தீர்த்துக் கொள்ள முடியும்.

இதற்காக மென்பொருள் ஒன்றின் ஊடக இன்னும் சிறப்பாக நாம் இச்சேவையை வழங்க உள்ளோம்.

அத்துடன், யூ டியூப் தளத்தில் இக்காணொளிகள் பதிவேற்றப்படும். புலமை பரிசில் பரீட்சை சாதாரணதரம் மற்றும் உயர் தரம் ஆகிய பாடத்திட்டங்களில் நாம் விசேட கவனம் செலுத்தி உள்ளோம்.

மேலும் பல பாட நெறிகளை நாம் வழங்க உள்ளோம். ஒரு சமூகமாக “கல்வியால் உயர்வடைவோம்”. என்று பாரத் அருள்சாமி தெரிவித்துள்ளார்.

https://www.facebook.com/prajashakthi.official மேலதிக தகவல்களைப் பெற்றுக்கொள்ள முடியும்.