இலங்கையிலுள்ள தனியார் வங்கிகள் இன்று முதல் சில நாட்களுக்கு மூடப்பட்டுள்ளன. இது தொடர்பான அறிவித்தலை குறித்த வங்கிகள் விடுத்துள்ளன. அத்துடன், ஒன்லைன் ஊடாக வங்கி சேவையை முன்னெடுக்கலாம் எனவும் அறிவித்துள்ளன.

பயணக்கட்டுப்பாடு, கொரோனா வைரஸ் பரவலுடனான தற்போதைய சூழ்நிலையைக்கருத்திற்கொண்டே தனியார் வங்கிகள் இவ்வாறு மூடப்பட்டுள்ளன.

இதன்படி ஜுன் 7 முதல் ஜுன் 17 வரை தமது வங்கி மூடப்பட்டிருக்கும் என அமானா வங்கி அறிவித்துள்ளது.

ஜுன் 13 வரை யூனியன் வங்கியும், ஜுன் 12வரை நேஷன் ட்ரஸ்ட் வங்கியும், ஜுன் 8வரை ஹட்டன் நஷனல் வங்கியும், ஜுன் 11 வரை என்.டி.பி. வங்கியும், ஜுன் 13 வரை கொமர்ஷல் வங்கியும், ஜுன் 11 வரை சம்பத் வங்கியும் மூடப்பட்டிருக்கும். அத்துடன், ஒன்லைன் ஊடாக சேவையை முன்னெடுக்குமாறு செலான் வங்கியும் கோரிக்கை விடுத்துள்ளது.

அடை மழையால் ஏற்பட்ட வெள்ளம் மற்றும் மண்சரிவால் நாட்டில் உயிரிழந்தவர்களின் எண்ணிக்கை 17 ஆக அதிகரித்துள்ளது. ஐவர்  காயமடைந்துள்ளனர். இருவர் காணாமல்போயுள்ளார் – என்று அனர்த்த முகாமைத்துவ மத்திய நிலையம் இன்று காலை விடுத்துள்ள நாளாந்த நிலைவர அறிக்கையில் தெரிவிக்கப்பட்டுள்ளது.

அத்துடன் 10 மாவட்டங்களில் 67 ஆயிரத்து 613 குடும்பங்களைச் சேர்ந்த 2 லட்சத்து 71 ஆயிரத்து 110 பேர் பாதிக்கப்பட்டுள்ளனர் எனவும், 978 வீடுகள் பகுதியளவும், 17 வீடுகள் முழுமையாகவும் சேதமடைந்துள்ளன என்றும் மேற்படி மத்திய நிலையம் விடுத்துள்ள அறிக்கையில் தெரிவிக்கப்பட்டுள்ளது.

6 ஆயிரத்து 107 குடும்பங்களைச் சேர்ந்த 26 ஆயிரத்து 806 பேர் இடம்பெயர்ந்துள்ளனர். இவர்களில் 106 பாதுகாப்பு இடங்களில் தங்கவைக்கப்பட்டுள்ளனர்.

கம்பஹா, இரத்தினபுரி, கொழும்பு, புத்தளம், களுத்துறை, நுவரெலியா, கேகாலை, காலி மற்றும் கண்டி ஆகிய மாவட்டங்களில் வாழ்பவர்களே சீரற்ற காலநிலையால் அதிகம் பாதிக்கப்பட்டுள்ளனர்.

கொரோனா வைரஸ் காரணமாக நாட்டில் ஏற்பட்டுள்ள அசாதாரண சூழ்நிலையில் பாடசாலைகள் காலவரையறையின்றி மூடப்பட்டு மாணவர்களின் கல்விச் செயற்பாடு இணைவழியின் ஊடாக முன்னெடுக்கப்பட்டு வருகின்றன.

அரசாங்கம் மாணவர்களுக்கு கற்பித்தலை வளவாளர்களைக் கொண்டு தொலைக்காட்சி ஊடாக வீடியோ பாடங்களை நடாத்தினாலும் மாணவர் நலன் கருதியதான சில ஆசிரியர்களின் தன்னார்வ செயற்பாடுகளினாலும் மாகாண, வலயக்கல்வி காரியாலயங்களின் பணிப்புரைக்கமைய பாடசாலை அதிபர்களின் வேண்டுதலின் அடிப்படையிலும் பாடசாலைகளில் கற்பிக்கும் ஆசிரியர்கள் மாணவர்களுக்கு வட்ஸ்அப் மற்றும் ZOOM நிகழ்நிலையின் ஊடாகவும் கற்பித்தலை தொடர்ந்து வருகின்றனர்.

இவ்வாறான சூழ்நிலையில் இந்த இணையவழி வகுப்புகளுக்கு அண்ணளவாக 50வீதமான மாணவர்களே பங்குகொள்கின்றனர். இதற்கு காரணம் பெரும்பாலான மாணவர்களின் வீடுகளில் கணணி வசதி இல்லாமை மற்றும் கையடக்க ஸ்மார்ட் தொலைபேசி இல்லாமையும். அப்படி இருப்பினும் தமது பிரதேசங்களில் தொலைப்பேசிக்கான வலையமைப்பு வசதி இல்லாமை பெரும் குறைபாடாக உள்ளது.

அந்தவகையில் கேகாலை மாவட்டத்தில் தெஹியோவிட்ட பிரதேச செயலகத்திற்கு உட்பட்ட முருத்தெட்டுவ, யோகம உட்பட ஆறு கிராமங்களை சேர்ந்தவர்களுக்கு இணைய வசதியை பெற்றுக்கொள்ளக்கூடிய வலையமைப்பு இல்லாமையால் குறித்த பிரதேசத்தை சேர்ந்த மாணவர்கள் பெரும் சிரமத்திற்கு உள்ளாகியுள்ளார்கள்.

தமது பாடசாலைகளில் நடாத்தப்படும் இணைய வகுப்புகளுக்கு பங்குகொள்வதற்காக அம்மாணவர்கள் வலையமைப்பை பெற்றுக்கொள்ளுமுகமாக தமது இருப்பிடத்தில் இருந்து உயர்ந்த இறப்பர் மலைப்பிரதேசங்களுக்கு சென்று இணைய வழியில் கல்வியை தொடர்கின்றனர்.

இவ்வாறு செல்லும்போது காட்டுவழியின் ஊடாகவே பயனிக்கவேண்டும். தற்பொழுது தொடர்ந்து மழை பெய்துவருவதால் மலை உச்சியில் கூடாரம் அமைத்து கல்விக் கற்கும் நிலைக்கு தள்ளப்பட்டுள்ளனர். இதன் காரணமாக மாணவர்களும் பெற்றோர்களும் பல பிரச்சினைகளுக்கு முகங்கொடுப்பதாகவும் இதற்கு தீர்வாக அரசாங்கம் தொலைப்பேசி நிறுவனங்களுடன் தொடர்புக்கொண்டு குறித்த பிரதேசங்களுக்கு வலையமைப்பை பெற்றுக்கொள்ளக்கூடிய வகையில் தொலைப்பேசி கோபுரங்களை அமைக்க ஆவணம் செய்யுமாறு கேட்டுக்கொள்கின்றனர்.

கொரோனா வைரஸ் பரவலைக்கட்டுப்படுத்துவதற்காக தனிமைப்படுத்தப்பட்ட கிராம சேவகர் பிரிவுகளில் இருந்து மேலும் 77 கிராம சேவகர் பிரிவுகள் இன்று காலை முதல் விடுவிக்கப்பட்டுள்ளன.

கொழும்பு, கம்பஹா, நுவரெலியா, மாத்தளை, திருகோணமலை, முல்லைத்தீவு, யாழ்ப்பாணம், மட்டக்களப்பு, களுத்துறை, காலி ஆகிய மாவட்டங்களில் தனிமைப் படுத்தப் பட்டிருந்த கிராமசபை பிரிவுகளை இவ்வாறு விடுவிக்கப்பட்டுள்ளன.

நாட்டில் பயணத்தடை அமுலில் உள்ளதால், விடுவிக்கப்பட்ட கிராம சேவகர் பிரிவுகளில் உள்ளவர்களுக்கும் அந்த நடைமுறை பொருந்தும்.

மாணவர், ஆசிரியர், பெற்றோரின் ஆரோக்கியத்தை காக்கும் வகையில் இணையவழி கல்வி சேவைக்கான வழிகாட்டல் கோவை கல்வி அமைச்சால் வெளியிடப்பட்டுள்ளது.

அடை மழையால் ஏற்பட்ட வெள்ளம் மற்றும் மண்சரிவால் நாட்டில் உயிரிழந்தவர்களின் எண்ணிக்கை 16 ஆக அதிகரித்துள்ளது. ஐவர்  காயமடைந்துள்ளனர். மூவர் காணாமல்போயுள்ளார் – என்று அனர்த்த முகாமைத்துவ மத்திய நிலையம் இன்று மாலை விடுத்துள்ள நாளாந்த நிலைவர அறிக்கையில் தெரிவிக்கப்பட்டுள்ளது.

அத்துடன் 10 மாவட்டங்களில் 67 ஆயிரத்து 564 குடும்பங்களைச் சேர்ந்த 2 லட்சத்து 70 ஆயிரத்து 902 பேர் பாதிக்கப்பட்டுள்ளனர் எனவும், 935 வீடுகள் பகுதியளவும், 15 வீடுகள் முழுமையாகவும் சேதமடைந்துள்ளன என்றும் மேற்படி மத்திய நிலையம் விடுத்துள்ள அறிக்கையில் தெரிவிக்கப்பட்டுள்ளது.

கம்பஹா, இரத்தினபுரி, கொழும்பு, புத்தளம், களுத்துறை, நுவரெலியா, கேகாலை, காலி மற்றும் கண்டி ஆகிய மாவட்டங்களில் வாழ்பவர்களே சீரற்ற காலநிலையால் அதிகம் பாதிக்கப்பட்டுள்ளனர்.

பதுளை மாவட்ட கொவிட் 19 தொற்றுப் பரவல் மற்றும் தடுப்பூசி ஏற்றல் நடவடிக்கை தொடர்பான கலந்துரையாடலொன்று, பதுளை மாவட்டச் செயலகத்தில், அரசாங்க அதிபர் தமயந்தி தலைமையில் இன்று (06) இடம்பெற்றது.

இராஜாங்க அமைச்சர்களான தேனுக விதானகமகே, டி.பி.சானக்க, பதுளை மாவட்ட பாராளுமன்ற உறுப்பினர்களான மேஜர் தெனிபிட்டிய, சாமர சம்பத் தசநாயக்க, அ.அரவிந்தகுமார், பெருந்தோட்டங்களுக்கான பிரதமரின் ஒருங்கிணைப்புச் செயலாளரும் இலங்கைத் தொழிலாளர் காங்கிரஸின் உப தலைவருமான செந்தில் தொண்டமான் ஆகியோரின் பங்குபற்றலுடன், இந்தக் கலந்துரையாடல் இடம்பெற்றிருந்தது.

இதன்போது, ஊவா மாகாணத்துக்குட்பட்ட பதுளை மாவட்ட மக்களுக்கென, அரசாங்கத்தினால் 50,000 கொவிட் 19 தடுப்பூசிகள் வழங்கப்பட்டுள்ள நிலையில், அந்தத் தடுப்பூசிகள், இம்மாதம் 9ஆம் திகதியன்று செலுத்தப்படவுள்ளன என்று, இக்கலந்துரையாடலில் தெரிவிக்கப்பட்டது.

இந்தத் தடுப்பூசிகளை, 60 வயதுக்கு மேற்பட்டவர்களுக்கும் கர்ப்பிணித் தாய்மார்களுக்கும் வழங்குவதற்கான ஏற்பாடுகளை அரசாங்கம் மேற்கொண்டுள்ளது.

இதன்போது கருத்துத் தெரிவித்த செந்தில் தொண்டமான்  , பதுளை மாவட்டத்தில், 60 வயதுக்கும் மேற்பட்டோர் 1 இலட்சத்து 82 ஆயிரத்து 466 பேர் உள்ளனர் என்று எடுத்துரைத்த நிலையில், அவற்றை எவ்வகையில் பகிர்ந்தளிக்கப் போகிறீர்கள் என்று கேள்வி எழுப்பினார்.

அந்த வகையில், கொவிட் 19 தொற்றுப் பரவல் அதிகமாகவுள்ள பிரதேசங்களை முன்னிலைப்படுத்தியே இந்தத் தடுப்பூசிகள் ஏற்றப்படவுள்ளன என்று, அரசாங்கத் தரப்பினரால் எடுத்துரைக்கப்பட்டது.

தவிர, பதுளை மாவட்டத்தில் 7 ஆயிரம் கர்ப்பிணித் தாய்மார்கள் உள்ள நிலையில், அவர்களுக்கும் தடுப்பூசி ஏற்றுவதற்கு நடவடிக்கை எடுக்கப்பட்டுள்ளது.

மேலும், கடந்தாண்டு (2020) ஒக்டோபர் 3ஆம் திகதி முதல் இன்று (06) வரையான காலப்பகுதியில், 4,620 பேர், பதுளை மாவட்டத்தில் கொவிட் 19 தொற்றுக்கு இலக்காகியுள்ளனர். நேற்றைய தினத்தில் (05) மாத்திரம், 142 பேர் தொற்றுக்கு உள்ளாகியுள்ளனர் என்றும் செந்தில் தொண்டமான்   எடுத்துரைத்தார்.

இவ்வாறான சூழ்நிலையில், கொவிட் 19 தொற்றுப் பரவல் அதிகமாகக் காணப்படும் பகுதிகளிலுள்ள பெருந்தோட்டத் தொழிற்சாலை ஊழியர்களையும் தடுப்பூசி ஏற்றலில் உள்வாங்க வேண்டுமென்று, செந்தில் தொண்டமான்   வலியுறுத்தினார்.

இதேவேளை, பெருந்தோட்டங்களில் பணியாற்றும் தோட்டச் சமூகநல அதிகாரிகளையும் இந்தத் தடுப்பூசி ஏற்றலுக்குள் உள்வாங்க வேண்டுமென்றும் செந்தில் தொண்டமான் அவர்கள் வலியுறுத்திய நிலையில், அவ்வதிகாரிகளும் உள்ளடக்கப்பட்டு தடுப்பூசி ஏற்றல் நடவடிக்கை மேற்கொள்ளப்படவேண்டும் என்றும்,

கொவிட் 19 தொற்றுப் பரவலால் அதிகம் பாதிக்கப்பட்ட பகுதிகளாக, ஹப்புத்தளை, எல்ல, பதுளை, கிராந்துருகோட்ட போன்றன அடையாளம் காணப்பட்டுள்ள நிலையில், இவ்விடங்களுக்கு முன்னுரிமை அடிப்படையில் தடுப்பூசி ஏற்ற நடவடிக்கை எடுக்கப்பட்டுள்ளதாக, இந்தக் கலந்துரையாடலின் போது எடுத்துரைக்கப்பட்டது.

பதுளை மாவட்டம் முழுவதும், 226 கொவிட் 19 தடுப்பூசி ஏற்றல் நிலையங்கள் அமைக்கப்படவுள்ளன. அவற்றில், வைத்தியசாலை வசதிகளற்ற பெருந்தோட்டப் பகுதி மக்கள், போக்குவரத்துப் பிரச்சினைகளையும் எதிர்நோக்குவதால், அந்தத் தோட்டங்களில் காணப்படும் தொழிற்சாலைகள், கலாசார நிலையங்கள் போன்றவற்றை, இந்தத் தடுப்பூசி ஏற்றல் பணிகளுக்காகப் பயன்படுத்துமாறு, செந்தில் தொண்டமான்  வலியுறுத்தினார்.

தோட்டங்களிலுள்ள மேற்கண்டவாறான பொது இடங்களில் முன்னெடுக்கப்படும் தடுப்பூசி ஏற்றல் பணியின் போது, அம்பியூலன்ஸுடன் கூடிய வைத்திய அதிகாரிகளை அச்சந்தர்ப்பத்தின் போது கடமையில் ஈடுபடுத்துமாறும், செந்தில் தொண்டமான்   வலியுறுத்தியமை குறிப்பிடத்தக்கது.