நாட்டில் தற்போது அமுலில் உள்ள பயணக்கட்டுப்பாடு எதிர்வரும் 21 ஆம் திகதிவரை நீடிக்கப்படக்கூடிய சாத்தியம் காணப்படுகின்றது.

கொரோனா வைரஸ் பரவலைக்கட்டுப்படுத்தி, மக்களின் சுகாதார பாதுகாப்பை உறுதிப்படுத்தும் நோக்கிலேயே பயணத்தடையை நீடிப்பது குறித்து தற்போது கவனம் செலுத்தப்பட்டுள்ளது.

அரச உயர்மட்ட வட்டாரங்களை மேற்கோள்காட்டி இது விடயம் தொடர்பில் தமிழ் வார இதழொன்றும் இன்று செய்தி வெளியிட்டுள்ளது.

பயணத்தடை அமுலில் உள்ள காலப்பகுதியிலும் வைரஸ் தொற்று வீதம் குறையவில்லை. எனவே, பயணத்தடை 21 ஆம் திகதிவரை நீடிக்குமாறு அரச உயர்பீடத்திடம் சில சுகாதார தரப்புகள் கோரிக்கை முன்வைத்துள்ளன.

எனினும், இது தொடர்பில் இன்னும் இறுதி முடிவு எடுக்கப்படவில்லை.

அதேவேளை, நாட்டில் நாளை முதல் பயணத்தடை விதிமுறைகள் கடுமையாக அமுல்ப்படுத்தப்படவுள்ளது.

சீனாவிடமிருந்து மேலும் 10 இலட்சம் சினோபாம் தடுப்பூசிகள் இன்று காலை இலங்கை வந்தடைந்தன.

இலங்கைக்கு ஒரே தடவையில் அதிகளவு தடுப்பூசிகள் கிடைக்கப்பெற்ற முதல் சந்தர்ப்பம் இதுவாகும்.

இலங்கைக்கு ஏற்கனவே சுமார் 11 லட்சம் சினோ பாம் தடுப்பூசிகளை சீனா அன்பளிப்பாக வழங்கியுள்ளது.

இதனையடுத்து மேலும் 2 மில்லியன் தடுப்பூசிகளை விலைக்கு கொள்வனவு செய்வதற்கு இலங்கை நடவடிக்கை எடுத்தது. இதன் முதற்கட்டமாகவே 10 லட்சம் தடுப்பூசிகள் இன்று வந்தடைந்தன.

அடுத்த 10 லட்சம் தடுப்பூசிகள் அடுத்தவாரமளவில் கிடைக்கப்பெறும் என இராஜாங்க அமைச்சர் சன்ன ஜயசுமன தெரிவித்தார்.

நாட்டில் தற்போது நிலவும் அதிக மழையுடனான காலநிலையால் 08 மாவட்டங்களில் டெங்கு காய்ச்சல் பரவும் அபாயம் ஏற்பட்டுள்ளதாக சுகாதார அமைச்சு எச்சரிக்கை விடுத்துள்ளது.

கொழும்பு, களுத்துறை, கம்பஹா, இரத்தினபுரி, கேகாலை, குருநாகல், மாத்தளை மற்றும் கண்டி ஆகிய மாவட்டங்களிலேயே டெங்கு காய்ச்சல் பரவும் அபாயமுள்ளதாக தேசிய டெங்கு ஒழிப்பு பிரிவின் பணிப்பாளர், வைத்தியர் அருண ஜயசேகர தெரிவித்துள்ளார்.

கடந்த காலங்களில் டெங்கு நோயாளர்களின் எண்ணிக்கை குறைவடைந்த போதிலும் கடந்த மே மாதத்தில் கொழும்பு மாவட்டத்திலேயே அதிக டெங்கு நோயாளர்கள் பதிவாகியுள்ளதாகவும் அவர் சுட்டிக்காட்டியுள்ளார்.

நிலவும் சீரற்ற வானிலையால் ஏற்பட்டுள்ள வௌ்ளத்தினால் நீர் தேங்குவதன் காரணமாக எதிர்வரும் ஒரு மாதத்தில் மீண்டும் டெங்கு காய்ச்சல் பரவும் அபாயமுள்ளதாகவும் சுட்டிக்காட்டப்பட்டுள்ளது.

அதேவேளை, ஜனவரி மாதம் முதல் இதுவரை நாட்டில் 7 ஆயிரத்து 873 பேர் டெங்கு நோயினால் பாதிக்கப்பட்டுள்ளனர்.

கடலில் மூழ்கிக்கொண்டிருக்கும் X-Press Pearl கப்பலின் கருப்புப் பெட்டி கண்டுபிடிக்கப்பட்டுள்ளது.

கடற்படையினர் முன்னெடுத்த விசேட தேடுதலின் போது கண்டுபிடிக்கப்பட்ட கருப்புப் பெட்டி, மேலதிக விசாரணைகளுக்காக குற்றப்புலனாய்வு திணைக்களத்திடம் ஒப்படைக்கப்பட்டுள்ளது.

குற்றப்புலனாய்வு திணைக்களத்திடமுள்ள கருப்பு பெட்டி, நீதிமன்றத்தின் அனுமதியுடன் இரண்டு நாட்களில் அரச இரசாயன பகுப்பாய்வு திணைக்களத்திடம் ஒப்படைக்கப்படவுள்ளதாக பொலிஸார் தெரிவித்தனர்.

இதேவேளை, கப்பலிலுள்ள எரிபொருள் தொடர்பில் அறிக்கையொன்றை சமர்ப்பிக்குமாறு கடல் மாசுறல் தடுப்பு அதிகார சபை, கப்பல் மீட்பு நிறுவனத்தின் கெப்டனுக்கு அறிவுறுத்தியுள்ளது.

மூழ்கிக்கொண்டிருக்கும் கப்பலினால் கடல், சுற்றுச்சூழல், கரை உள்ளிட்ட பகுதிகளுக்கு பாதிப்பு ஏற்படாத வகையில் நடவடிக்கைகைள முன்னெடுக்குமாறு அறிவித்துள்ளதாகவும் கடல் மாசுறல் தடுப்பு அதிகார சபை குறிப்பிட்டுள்ளது.

கொரோனா வைரஸ் தொற்றால் நாட்டில் மேலும் 40 பேர் உயிரிழந்துள்ளனர்.

நேற்று ஒரு மரணமும், மே 11 முதல் ஜுன் 3 ஆம் 39 மரணங்கள் பதிவாகியுள்ளன.

23 ஆண்களும், 17 பெண்களுமே இவ்வாறு உயிரிழந்துள்ளனர்.

இதன்படி கொரோனாவால் நாட்டில் பலியானவர்களின் மொத்த எண்ணிக்கை ஆயிரத்து 696 ஆக அதிகரித்துள்ளது.

நாட்டில் தற்போது நிலவும் சீரற்ற காலநிலையால் 10 பேர் உயிரிழந்துள்ளனர் – என்று அனர்த்த முகாமைத்துவ மத்திய நிலையம் விடுத்துள்ள நாளாந்த நிலைவர அறிக்கையில் தெரிவிக்கப்பட்டுள்ளது.

நுவரெலியா, இரத்தினபுரி உட்பட 8 மாவட்டங்களில் 54,126 குடும்பங்களைச் சேர்ந்த 219,027 பேர் பாதிக்கப்பட்டுள்ளனர்.

15,499 பேர் இடம்பெயர்ந்துள்ளனர். அவர்கள் பாதுகாப்பான இடங்களில் தங்கவைக்கப்பட்டுள்ளனர். 724 வீடுகள் பகுதியளவும், 11 வீடுகள் முழுமையாகவும் சேதமடைந்துள்ளன.

10 உயிரிழப்பு சம்பவங்களில் 8 சம்பவங்கள் சப்ரகமுவ மாகாணத்தில் பதிவாகியுள்ளன. (கேகாலை – 05, இரத்தினபுரி – 03)