விசேட அதிரடிப் படையினரின் துப்பாக்கிச் சூட்டுக்கு இலக்காகி படுகாயமடைந்த இருவர் பருத்தித்துறை ஆதார வைத்தியசாலையில் சேர்க்கப்பட்டுள்ளனர்.

யாழ்ப்பாணம் – வடமராட்சி கிழக்கு முள்ளி பகுதியில் இன்று காலை இந்தச் சம்பவம் இடம்பெற்றுள்ளது.

சம்பவத்தி்ல் துன்னாலையைச் சேர்ந்த இருவர் படுகாயமடைந்தனர் என்று தெரிவிக்கப்படுகிறது.ஒருவரின் காலில் துப்பாக்கி ரவை உள்ளதால் அவர் அதிதீவிர சிகிச்சைப் பிரிவில் சேர்க்கப்பட்டுள்ளார்.

சட்டவிரோத மணல் கடத்தல்காரர்கள்மீது நடத்தப்பட்ட துப்பாக்கிச்சூட்டிலேயே இருவர் காயமடைந்துள்ளனர் என பாதுகாப்பு தரப்பில் தெரிவிக்கப்பட்டுள்ளது.

ஐ.பி.எல்.கிரிக்கெட்டில் இன்றைய ஆட்டத்தில் சென்னை-பஞ்சாப் அணிகள் பலப்பரீட்சை நடத்துகின்றன.

டெல்லிக்கு எதிரான தனது தொடக்க ஆட்டத்தில் சென்னை அணி 7 விக்கெட் வித்தியாசத்தில் படுதோல்வி அடைந்தது. இதில் சென்னை நிர்ணயித்த 189 ஓட்டங்கள் இலக்கை டெல்லி தொடக்க வீரர்கள் ஷிகர் தவான், பிரித்வி ஷா இருவரும் அரைசதம் விளாசி எளிதில் எடுக்க வைத்து விட்டனர்.

சென்னையின் பந்துவீச்சு மிக மோசமாக இருந்தது. ‘ஸ்விங்’ தாக்குதலுக்கு பெயர் போன தீபக் சாஹர் அத்தகைய பந்துவீச்சை மறந்துவிட்டது போல் பந்து வீசினார். அத்துடன் தொடக்கத்தில் பவுன்சர்களை வீசி நெருக்கடி கொடுக்கவும் சென்னை பவுலர்கள் தவறினர்.

ஒரே ஆறுதல் நீண்ட இடைவெளிக்கு பிறகு அணிக்கு திரும்பிய சுரேஷ் ரெய்னா அரைசதம் அடித்ததுதான். கேப்டன் டோனி ‘டக்-அவுட்’ ஆகி ஏமாற்றினார். வலுவான பஞ்சாப்புக்கு எதிராக அதுவும் வான்கடேவில் சாதிக்க வேண்டும் என்றால் குறைந்தது 200 ரன்கள் அவசியமாகும். பேட்ஸ்மேன்கள் ஒருங்கிணைந்து தெறிக்கவிட்டால் வெற்றிக்கணக்கை தொடங்கலாம்.

தென்ஆப்பிரிக்க வேகப்பந்து வீச்சாளர் நிகிடி தாமதமாக வந்து இன்னும் 7 நாள் தனிமைப்படுத்துதலை முடிக்காததால் இன்றைய ஆட்டத்திலும் விளையாடமாட்டார் என்று சென்னை பயிற்சியாளர் பிளமிங் ஏற்கனவே கூறியுள்ளார். இதனால் பந்துவீச்சில் மாற்றம் இருக்காது என்றே தெரிகிறது.

பஞ்சாப் கிங்ஸ் அணி தனது தொடக்க ஆட்டத்தில் ராஜஸ்தானை 4 ரன் வித்தியாசத்தில் தோற்கடித்தது. 221 ரன் குவித்த போதிலும் வெற்றிக்காக கடைசி பந்து வரை போராட வேண்டி இருந்தது. கேப்டன் லோகேஷ் ராகுல் (91 ரன்), தீபக் ஹூடா( 64 ரன்), கிறிஸ் கெய்ல்(40 ரன்) அசத்தினர். பேட்டிங்கில் வலிமையான பஞ்சாப் அணி இன்றைய ஆட்டத்திலும் ரன்வேட்டைக்கு தீவிரமாக உள்ளது. பஞ்சாப்பின் அதிரடி ஜாலத்துக்கு சென்னை அணி முட்டுக்கட்டை போடுமா என்பதே ரசிகர்களின் எதிர்பார்ப்பாகும்.

இவ்விரு அணிகளும் இதுவரை 23 ஆட்டங்களில் நேருக்கு நேர் மோதியுள்ளன. இதில் 14-ல் சென்னையும், 8-ல் பஞ்சாப்பும் வெற்றி பெற்றுள்ளன. ஒரு ஆட்டம் டை ஆனது. கடந்த சீசனில் இரு லீக்கிலும் பஞ்சாப்பை சென்னை அணி துவம்சம் செய்தது நினைவு கூரத்தக்கது.  இன்றைய போட்டி இரவு 7.30 மணிக்கு ஆரம்பமாகவுள்ளது.

பதுளை, கந்தகெட்டிய பிரதேச போபிட்டிய பகுதியில் நேற்று மாலை வேனொன்று பள்ளத்தில் வீழ்ந்துவிபத்துக்குள்ளாகியதில் ஆணொருவர் உயிரிழந்துள்ளார்.

அத்துடன், ஐந்து சிறுவர்கள் அடங்கலாக பதின்மூன்று பேர் படுகாயங்களுடன் பதுளை வைத்தியசாலையில் அனுமதிக்கப்பட்டுள்ளனர்.

நடராஜா மலர்வேந்தன்

மலையகத்தில் மக்களின் நலன் கருதி அமைக்கப்படும் பொது நிறுவனங்கள் இன்று கவனிப்பாரற்று கிடக்கின்றன. அந்தவகையில் பிரதேச மக்களின் வேண்டுகோளுக்கமைய அமைக்கப்பட்ட பொகவந்தலாவை கெர்க்ஸ்வோல்ட் தோட்ட பிரஜாசக்தி நிலையமானது சுமார் 12 வருட காலமாக கவனிப்பாரற்ற நிலையில் காணப்படுகின்றது.

மலையக மாணவர்களுக்கு தொழில்பயிற்சி கல்வியை வழங்கும் நோக்குடன் 2008ஆம் ஆண்டு அமைச்சராக இருந்த ஆறுமுகன் தொண்டமானினால் இந்நிலையமானது அமைக்கப்பட்டது.

கெர்கஸ்வோல்ட் தோட்டம் அதேபோல் சாஞ்சிமலை , வானகாடு , பொகவந்தலாவ நகர மாணவர்கள் என 5000 ற்கும் மேற்பட்டவர்கள் இந்த பிரஜா சக்தி நிலையத்தினை பயன்படுத்தி வந்தனர். இருந்த போதிலும் 2008ஆம் ஆண்டு இனந்தெரியாத நபர்களால் இந்நிலையத்தின் கண்ணாடி கல்லெறிந்து சேதபடுத்தப்பட்டு அதில் உள்ள உபகரணங்கள் அனைத்து திருடப்பட்டதாக பிரதேச மக்கள் குற்றம் சுமத்தியுள்ளனர்.

கடந்த ஆட்சிகாலத்திலும் எவரும் இதை கண்டு கொள்ளவில்லை என மக்கள் குற்றம் சுமத்துகின்றனர். எனவே மாணவர்களின் நலன் கருதி புதிய அரசாங்கம் இதற்கு புத்துயிர் கொடுத்து திறக்க வேண்டும் என பொது மக்கள் கோரிக்கை விடுக்கின்றனர்.

முல்லைத்தீவு, தண்ணிமுறிப்பு வயல்வெளியில் மின்னல் தாக்கியதில் மூன்று விவசாயிகள் பலியாகியுள்ளனர்.

குறித்த விவசாயிகள் நேற்று மாலை விவசாய நடவடிக்கைகளில் ஈடுபட்டிருந்த போதே, குறித்த அனர்த்தம் ஏற்பட்டுள்ளது.

சம்பவத்தில் குமுழமுனை மற்றும் வற்றாப்பளை ஆகிய பகுதிகளைச் சேர்ந்த 34, 35 மற்றும் 46 வயதுகளையுடைய விவசாயிகளே உயிரிழந்துள்ளனர்.

கண்டி – உடபளாத பிரதேச சபையின் உறுப்பினர் குமாரவேல் கனகரத்னத்தின் கட்சி உறுப்புரிமையை இல்லாது செய்வதற்கு ஜனநாயக மக்கள் முன்னணி எடுத்த தீர்மானத்திற்கு நீதிமன்றம் இடைகால தடையுத்தரவொன்றை பிறப்பித்துள்ளது.

கொழும்பு மாவட்ட நீதவான் நீதிமன்றத்தில் இன்று (15) இந்த தடையுத்தரவு பிறப்பிக்கப்பட்டுள்ளது.

இன்று முதல் எதிர்வரும் 14 நாட்களுக்கு இந்த தடையுத்தரவு செலுப்படியாகும் என நீதிமன்றம் இன்று அறிவித்ததாக, குமாரவேல் கனகரத்னம் சார்பில் முன்னிலையான சட்டத்தரணி குமா துனுசிங்க தெரிவிக்கின்றார்.

ஒருமித்த முற்போக்கு கூட்டணி சார்பில் உடபளாத பிரதேச சபைக்கு தெரிவான குமாரவேல் கனகரத்னம், கட்சியின் மாதாந்த கூட்டங்களுக்கு தொடர்ச்சியாக பங்குப்பற்றாமையின் ஊடாக, அவர் கட்சியின் சட்டங்களை மீறி, கட்சிக்கு எதிராக செயற்படுவதாக தெரிவித்து, அவரை கட்சியின் உறுப்புரிமையிலிருந்து விலக்குவதாக 2021ம் ஆண்டு மார்ச் மாதம் 12ம் திகதியிடப்பட்ட ஜனநாயக மக்கள் முன்னணியின் கடித உறையின் கீழ் அறிவிக்கப்பட்டிருந்தது.

கட்சியின் தலைவர் மனோ கணேசன், இந்த அறிவித்தலை, கண்டி தேர்தல் தெரிவத்தாட்சி அதிகாரிக்கு அனுப்பி வைத்துள்ளார்.

இவ்வாறு கட்சியின் தலைவர் மனோ கணேசனினால் பதவி விலக்கப்பட்டமைக்கான அறிவித்தல் அறிவிக்கப்பட்டதை அடுத்து, குமாரவேல் கனகரத்னத்தின் பிரதேச சபை உறுப்பினர் பதவி இல்லாது செய்யப்படுவதை வர்த்தமானி ஊடாக அறிவிக்கப்படும் என கண்டி மாவட்ட தேர்தல் தெரிவத்தாட்சி அதிகாரி 2021ம் ஆண்டு மார்ச் மாதம் 15ம் திகதி குமாரவேல் கனகரத்னத்திற்கு பதிவு தபால் மூலம் அறிவித்துள்ளார்.

இந்த நிலையில், குறித்த தீர்மானத்திற்கு எதிராக குமாரவேல் கனகரத்ன, கொழும்பு மாவட்ட நீதவான் நீதிமன்றத்தில் வழக்கொன்றை தாக்கல் செய்துள்ளார்.

ஜனநாயக மக்கள் முன்னணியிலிருந்து குமாரவேல் கனகரத்னம், இடைநிறுத்தப்பட்டமையை 14 நாட்களுக்கு தடை செய்யும் வகையில் நீதிமன்றம் இன்று உத்தரவு பிறப்பித்துள்ளது.

இந்த உத்தரவிற்கு அமைய, குமாரவேல் கனகரத்னத்திற்கு எதிராக எந்தவொரு தீர்மானமும் நீதிமன்ற உத்தரவு வரும் வரை கட்சியினால் எட்ட முடியாது என சட்டத்தரணி தெரிவிக்கின்றார்.

கட்சிக்கு பிறப்பிக்கப்பட்டுள்ள இடைகால தடையுத்தரவு காரணமாக, குமாரவேல் கனகரத்னத்தின் பதவி பறிப்போவதும் தற்காலிகமாக நிறுத்தப்பட்டுள்ளதாக சட்டத்தரணி மேலும் கூறுகின்றார். இந்த வழக்கு மீதான விசாரணைகள் ஏப்ரல் மாதம் 29ம் திகதி இடம்பெறவுள்ளதாக நீதிமன்றம் அறிவித்துள்ளது.

நன்றி – ட்டூ சிலோன்

பொதுவாக உடற்பயிற்சி செய்வது நம் ஒட்டுமொத்த உடலுக்குமே நன்மை அளிக்கக் கூடியது.

ஆனால் அதிகப்படியான உடற்பயிற்சியை செய்வது உடலுக்கு பல பக்கவிளைவுகளையும் ஏற்படுத்துவதாக கூறப்படுகின்றது.

அந்தவகையில் நீண்ட நேரம் உடற்பயிற்சி செய்தால் கீழ்க்கண்ட பக்க விளைவுகளை நீங்கள் சந்திக்க நேரிடும். தற்போது அவை என்னென்ன என்பதை பார்ப்போம்.

• உடலில் இருக்கும் ஆற்றல் முழுவதையும் உடற்பயிற்சிக்கு என்றே பயன்படுத்தி விட்டால் மற்ற நேரங்களில் நீங்கள் சோர்வாக உணர்வீர்கள். இரவில் 7-8 மணி நேரம் தூக்கம், காலையில் நல்ல சாப்பாடு போன்றவற்றை எடுத்தால் கூட இந்த சோர்வு உங்களை விடாது.
• உடற்பயிற்சியை கடினமாக செய்யும் போது உங்கள் தசைகள் பதட்டமாகின்றன. இது படிப்படியாக களத்தில் உங்கள் செயல்திறன் அளவைக் குறைக்கிறது. இது உங்களை விரக்தியடையச் செய்கிறது. எனவே பயிற்சி அமர்வுகளுக்கு இடையில் நீங்கள் ஓய்வாக இருக்க வேண்டும்.
• தீவிரமான உடற்பயிற்சி பழக்கம் இல்லாதது திடீரென அதை மேற்கொள்ளும் போது காயங்கள் அதிகரிக்க வாய்ப்புள்ளது. தசை வலி, மூட்டு திரிபு, முதுகுவலி ஆகியவை சில பொதுவான உடற்பயிற்சிக் காயங்கள் ஆகும்.
• ஜிம்மில் அதிகமாக உடற்பயிற்சி செய்வதனால் இரும்புச் சத்தை அதாவது ஆற்றலை இழப்பதால் இரவில் தூக்கம் வராமல் தவிக்க நேரிடலாம். உங்கள் தசைகள் அழுத்தமாக இருக்கும், நீங்கள் அமைதியற்றவராக உணரலாம் மற்றும் தூங்குவது கடினமாக இருக்க வாய்ப்புள்ளது .
• அதிகப்படியான பயிற்சி என்பது நேர்மாறாக இருக்கிறது. இது உடலில் கார்டிசோல் அளவை அதிகரிக்கிறது, இது கடுமையான மனநிலை மாற்றங்கள், நாட்பட்ட மன அழுத்தம், கவலைக் கோளாறுகள் மற்றும் மனச்சோர்வை ஏற்படுத்தக்கூடும்.

ஐக்கிய தேசியக் கட்சியின் தலைவர் ரணில் விக்கிரமசிங்க இன்னும் ஒரிரு மாதங்களுக்குள் பாராளுமன்றம் செல்வார் என அக்கட்சியின் உறுப்பினர் வஜிர அபேவர்தன தெரிவித்தார்.

ஐ.தே.கவுக்கு கிடைக்கப்பெற்ற தேசியப்பட்டியல் ஆசனத்துக்கே ரணில் விக்கிரமசிங்க நியமிக்கப்படவுள்ளார்.