இரத்தினபுரி, பலாங்கொடை பகுதியில் மர்மமான முறையில் உயிரிழந்த பாடசாலை மாணவி ஒருவரின் சடலம் மீட்கப்பட்ட நிலையில், அவர் படுகொலை செய்யப்பட்டுள்ளார் என்பது மரண பரிசோதனைமூலம் தெரியவந்துள்ளது.

இம்முறை சாதாரண தரப் பரீட்சைக்குத் தோற்றவிருந்த குறித்த மாணவி கடந்த 22 ஆம் திகதி வீட்டில் இருந்து சடலமாக மீட்கப்பட்டிருந்தார். இது தொடர்பில் பொலிஸ் விசாரணைகளும் இடம்பெற்றன.

பலாங்கொடை ஆதார வைத்தியசாலையில் மேற்கொள்ளப்பட்ட பிரேத பரிசோதனையில் அவர் படுகொலை செய்யப்பட்டுள்ளார் என்பது உறுதியாகியுள்ளது.

இந்நிலையில் பலாங்கொடை பொலிஸார் மேலதிக விசாரணைகளை மேற்கொண்டுவருகின்றனர்.

சிவா இயக்கத்தில் ரஜினி நடித்து வரும் அண்ணாத்த படப்பிடிப்பு கொரோனா ஊரடங்கால் தற்காலிகமாக நிறுத்தப்பட்டது.

படப்பிடிப்பு நடத்த தற்போது அரசு சில தளர்வுகள் அளித்துள்ள நிலையில் ஒக்டோபர் முதல் வாரத்தில் ஐதராபாத்தில் மீண்டும் படப்பிடிப்பு தொடங்க உள்ளதாக தகவல்கள் வெளியாகியுள்ளது.

இதுவரை அண்ணாத்த படத்தின் 50% படப்பிடிப்பு முடிவடைந்துள்ளது. மீதமுள்ள காட்சிகளை சென்னையிலேயே படமாக்க படக்குழு திட்டமிட்டிருப்பதாக முதலில் கூறப்பட்டது. அதில் நயன்தாரா, கீர்த்தி சுரேஷ் மற்றும் பாலிவுட் நடிகர் ஜாக்கி ஷெரப் போன்றோர் கலந்து கொள்வார்கள் என எதிர்பார்க்கப்பட்டது.

ஆனால் தற்போது ஐதராபாத்திலேயே மீண்டும் படப்பிடிப்பைத் தொடர இருப்பதாக தகவல்கள் தெரிவிக்கின்றன.

ஐதராபாத்தில் ஏற்கனவே போடப்பட்ட அரங்குகள் இப்போது என்ன சூழலில் உள்ளன என்பதைப் பார்த்துச் சரிசெய்யும் பணிகள் தொடங்கப்பட்டுள்ளதாகவும், இதற்காக ஒட்டுமொத்தக் குழுவினரிடமும் திகதிகள் வாங்கப்பட்டுள்ளதாகவும் கூறப்படுகிறது

அமெரிக்காவில் கொரோனா பாதிப்பு தொடங்கியதில் இருந்து இதுவரை 5 லட்சத்து 87 ஆயிரம் சிறுவர்களு;ககு தொற்று ஏற்பட்டு உள்ளது.

அமெரிக்காவில் இதுவரை 71.04 லட்சம் பேருக்கு கொரோனா பாதிப்புகள் உறுதிப்படுத்தப்பட்டு உள்ளன. உலக நாடுகளில் முதல் இடத்தில் உள்ள அந்த நாட்டில் பலி எண்ணிக்கை 2லட்சத்தை தாண்டியுள்ளது.

அமெரிக்காவில் கொரோனா பாதிப்பு கண்டறியப்பட்ட பின்னர் இதுவரை 5 லட்சத்து 87 ஆயிரத்து 948 சிறார்களுக்கு தொற்று ஏற்பட்டு உள்ளது என தெரிய வந்துள்ளது.

அவர்களில் கடந்த 3 ஆம் திகதியில் இருந்து 15 ஆம்திகதி வரை 74,553 குழந்தைகளுக்கு பாதிப்பு ஏற்பட்டு இருக்கிறது. இதனால் 2 வாரங்களில் 15 சதவீதம் அளவுக்கு பாதிப்பு அதிகரித்து உள்ளது.

அமெரிக்காவில் கொரோனா தொற்றுகளால் கடுமையான பாதிப்புகள் ஏற்படுவது குழந்தைகளிடம் அரிதாகவே காணப்படுகின்றன. எனினும், அவர்களுக்கு பரிசோதனை செய்வது, மருத்துவமனையில் சிகிச்சை அளிப்பது உள்ளிட்ட விவரங்களை தொடர்ந்து அனைத்து மாநிலங்களும் வழங்க வேண்டும் என கேட்டு கொள்ளப்பட்டுள்ளது.

வயது, இனம் அடிப்படையிலான உயிரிழப்பு விகிதங்களையும் வழங்க வேண்டும் என்று தெரிவிக்கப்பட்டு உள்ளது. இதனடிப்படையிலேயே கொரோனா பாதிப்புகளால் குழந்தைகளின் உடல் ஆரோக்கியத்தில் ஏற்படும் விளைவுகள் பற்றி அறிந்து அதற்கேற்ப அவர்களை கண்காணிக்க முடியும் என கூறப்படுகிறது.

புஸல்லாவை சரஸ்வதி மத்திய கல்லூரியில், இந்திய அரசின் 80 மில்லியன் ரூபா இந்திய நிதி உதவியின்கீழ் சகல வசதிகளுடன் கூடிய கணித , விஞ்ஞான ஆய்வு கூடங்கள், கணினிக் கூடம், வகுப்பறைகள் மற்றும் நிர்வாக அலகுகளை உள்ளடக்கிய 4 மாடிக் கட்டடம் நிர்மாணிக்கப்பட்டுள்ளது.

இந்நிலையில் மேற்படி கட்டடத் தொகுதிக்கு தேவையான அனைத்து ஆய்வுக்கூட உபகரணங்களையும், கணினிகளையும் வழங்குவதற்கு மேலும் 15 மில்லியன் ரூபாவை ஒதுக்குவதற்கு இலங்கைக்கான இந்திய தூதரகம் நடவடிக்கை எடுத்துவருகின்றது.

இது தொடர்பான மீளாய்வு கூட்டமொன்று கொழும்பில் அமைந்துள்ள இலங்கைக்கான இந்திய தூதரக அலுவலகத்தில், அரசியல் மற்றும் மேம்பாட்டு ஒத்துழைப்பு ஆலோசகர் திருமதி பானு பிரகாஷ் தலைமையில் நேற்று (23) நடைபெற்றது.

இக்கலந்துரையாடலில் நுவரெலியா மாவட்ட பாராளுமன்ற உறுப்பினரும், முன்னாள் கல்வி இராஜாங்க அமைச்சருமான கலாநிதி வே.இராதாகிருஸ்ணன், பாராளுமன்ற உறுப்பினர்களான வேலுகுமார், எம். உதயகுமார், கல்வி அமைச்சின் பாடசாலைகளுக்கான கட்டட அபிவிருத்திற்கான பணிப்பாளர் கலாநிதி அபேசுந்தர, பெருந்தோட்ட பாடசாலைகளுக்கான அபிவிருத்திட்ட பணிப்பாளர் எஸ்.முரளிதரன் உள்ளிட்டோர் கலந்துகொண்டனர்.

அத்துடன் புஸ்ஸல்லாவை சரஸ்வதி மத்திய கல்லூரியின் அதிபர் ஆர்.எஸ். ரவிசந்திரன் , பழைய மாணவர் சங்கத்தின் செயலாளர் பா.திருஞானம், ஆசிரியர்களான பி.கமல்நாதன், ஜி.லோகேஸ்வரன் ஆகியோரும் சந்திப்பில் பங்கேற்றனர்.

அதேவேளை, இந்திய மத்திய அரசின் 395 மில்லியன் ரூபா நிதி உதவியின்கீழ் மலையகத்தில் தற்போது 10 பாடசாலைகள் அபிவிருத்தி செய்யப்படவுள்ளது. எதிர்காலத்தில் மேலும் சில பெருந்தோட்டப்பாடசாலைகள் இணைத்துக்கொள்ளப்படவுள்ளன.

பா.திருஞானம்

கினிகத்தேன – கொழும்பு பிரதான வீதியில் ரம்பதெனிய பகுதியில் 24.09.2020 அன்று காலை 7 மணியளவில் பாரிய கற்பாறையொன்று சரிந்து விழுந்துள்ளது. இதனால் அவ்வீதி ஊடான போக்குவரத்து முற்றாக முடங்கியது.

இப்பகுதியில் மண்சரிவு ஏற்பட்டு மேலும் சில கற்பாறைகள் சரியக்கூடிய அபாயம் இருப்பதால் ஆய்வுப் பணிகள் மேற்கொள்ளப்பட வேண்டும் என பிரதேச மக்கள் கோரிக்கை விடுக்கின்றனர்.

கற்பாறையை அகற்றி இயல்பு நிலை திரும்பும் வரை அட்டனிலிருந்து கொழும்பு செல்லும் அதேபோல கொழும்பில் இருந்து அட்டன் வரும் பயணிகள் மாற்று வழியை பயன்படுத்துமாறு பொலிஸார் வேண்டுகோள் விடுத்துள்ளனர்.இதன்படி கலுகல, நோட்டன் பிரிட்ஜ், லக்ஷபான வீதியையும், தியகல, நோட்டன் பிரிட்ஜ் வீதியையும் பயன்படுத்துமாறுஅறிவுறுத்தப்பட்டுள்ளது.

மும்பை அணியின் தலைவர் ரோஹித் சர்மா நேற்றைய ஆட்டத்தில் அடித்த 6 சிக்சர்களையும் சேர்த்து ஐ.பி.எல். தொடரில் அவரது ஒட்டுமொத்த சிக்சர் எண்ணிக்கை 200 ஆக உயர்ந்தது.

இதன்படி ஐ.பி.எல். வரலாற்றில் இந்த மைல்கல்லை எட்டிய 4ஆவது வீரர் என்ற சிறப்பை பெற்றார். அதிக சிக்சர் விளாசியவர்களில் கிறிஸ் கெய்ல் (326 சிக்சர்), டிவில்லியர்ஸ் (214), டோனி (212) ஆகியோர் முதல் 3 இடங்களில் உள்ளனர்.

ஐ.பி.எல்.-ல் குறிப்பிட்ட ஒரு அணிக்கு எதிராக அதிக ஓட்டங்கள் எடுத்த வீரர் என்ற சாதனையை ரோகித் சர்மா நேற்று படைத்தார். அவர் கொல்கத்தா அணிக்கு எதிராக மட்டும் இதுவரை 904 ஓட்டங்கள் சேர்த்து இருக்கிறார். இந்த வகையில் 2ஆவது இடத்தில் உள்ள ஐதராபாத் கேப்டன் வார்னர் கொல்கத்தாவுக்கு எதிராக 829 ஓட்டங்கள் எடுத்துள்ளார்.

ஐ.பி.எல். கிரிக்கெட்டில் கொல்கத்தாவை பந்தாடி மும்பை அணி முதலாவது வெற்றியை நேற்று பதிவு செய்தது.

8 அணிகள் பங்கேற்றுள்ள 13ஆவது ஐ.பி.எல். கிரிக்கெட் போட்டி ஐக்கிய அரபு அமீரகத்தில் உள்ள துபாய், சார்ஜா, அபுதாபி ஆகிய நகரங்களில் நடந்து வருகிறது. இதில் நேற்றிரவு அபுதாபியில் நடந்த 5-வது லீக் ஆட்டத்தில் நடப்பு சாம்பியன் மும்பை இந்தியன்ஸ் அணி, கொல்கத்தா நைட் ரைடர்சுடன் மோதியது.

‘டாஸ்’ வென்ற கொல்கத்தா கேப்டன் தினேஷ் கார்த்திக் முதலில் மும்பையை பேட் செய்ய பணித்தார். இதன்படி முதலில் பேட்டிங் செய்த மும்பை அணியில் குயின்டான் டி காக் (1 ரன்) ஷிவம் மாவியின் பந்து வீச்சில் கேட்ச் ஆனார்.

இதன் பின்னர் கேப்டன் ரோகித் சர்மாவும், சூர்யகுமார் யாதவும் ஜோடி சேர்ந்து, எதிரணியின் பந்து வீச்சை பின்னியெடுத்தனர். சந்தீப் வாரியரின் ஓவரில் சூர்யகுமார் 4 பவுண்டரி சாத்தினார். வேகப்பந்து வீச்சாளர் கம்மின்சின் ஓவரில் இரு பிரமாதமான சிக்சர்களை பறக்க விட்டு ரோகித் சர்மாவும் ரன்வேட்டையை துரிதப்படுத்தினார். இதனால் அவர்களின் ஸ்கோர் மளமளவென உயர்ந்தது.

அணியின் ஸ்கோர் 98 ரன்களாக உயர்ந்த போது சூர்யகுமார் யாதவ் (47 ரன், 28 பந்து, 6 பவுண்டரி, ஒரு சிக்சர்) ரன்-அவுட் ஆனார். அடுத்து வந்த சவுரப் திவாரி 21 ரன்களில் வெளியேறினார். மறுமுனையில் 37-வது அரைசதத்தை கடந்து தொடர்ந்து அதிரடியில் மிரட்டிய ரோகித் சர்மா சதம் அடிப்பார் என்று எதிர்பார்க்கப்பட்ட வேளையில் 80 ரன்களில் (54 பந்து, 3 பவுண்டரி, 6 சிக்சர்) ஆட்டம் இழந்தார்.

ஷிவம் மாவி புல்டாசாக வீசிய பந்தை தூக்கியடித்த போது சிக்கினார். பின்னர் ஹர்திக் பாண்ட்யா (18 ரன்), பொல்லார்ட் (13 ரன், நாட்-அவுட்) ஆகியோரின் கடைசிகட்ட பங்களிப்புடன் மும்பை அணி 20 ஓவர் முடிவில் 5 விக்கெட் இழப்புக்கு 195 ரன்கள் குவித்தது. கொல்கத்தா தரப்பில் ஷிவம் மாவி 2 விக்கெட்டும், சுனில் நரின், ரஸ்செல் தலா ஒரு விக்கெட்டும் கைப்பற்றினர். ஏலத்தில் ரூ.15½ கோடிக்கு வாங்கப்பட்ட வேகப்பந்து வீச்சாளர் பேட் கம்மின்ஸ் 3 ஓவர்களில் 49 ரன்களை அள்ளி கொடுத்தாரே தவிர ஒரு விக்கெட்டும் எடுக்கவில்லை.

அடுத்து 196 ரன்கள் இலக்கை நோக்கி ஆடிய கொல்கத்தா அணி, பும்ரா, டிரென்ட் பவுல்ட், பேட்டின்சன் உள்ளிட்ட மும்பை பவுலர்களின் துல்லியமான பந்து வீச்சை தாக்குப்பிடிக்க முடியாமல் திணறியது. அபாயகரமான பேட்ஸ்மேன்களான ஆந்த்ரே ரஸ்செல் (11 ரன்), மோர்கன் (16 ரன்) ஜொலிக்கவில்லை. அதிகபட்சமாக கம்மின்ஸ் 4 சிக்சருடன் 33 ரன்களும், கேப்டன் தினேஷ் கார்த்திக் 30 ரன்களும் எடுத்தனர்.

கொல்கத்தா அணியால் 20 ஓவர்களில் 9 விக்கெட்டுக்கு 146 ரன்களே எடுக்க முடிந்தது. இதன் மூலம் மும்பை அணி 49 ரன்கள் வித்தியாசத்தில் வெற்றி பெற்றது. 2-வது ஆட்டத்தில் ஆடிய மும்பை அணிக்கு இது முதலாவது வெற்றியாகும். தொடக்க ஆட்டத்தில் சென்னை அணியிடம் தோற்று இருந்தது.