ஜனாதிபதி கோட்டாபய ராஜபக்ச தலைமையிலான இந்த அரசாங்கத்துக்கு, பெருந்தோட்டத் தொழிலாளர்கள் எதிர்நோக்கும் பிரச்சினைகளுக்கு தீர்வை வழங்கவேண்டும் என்ற அக்கறை இல்லை என்று ஐக்கிய மக்கள் சக்தியின் நுவரெலியா மாவட்ட வேட்பாளர் சட்டத்தரணி ஹிரண்யா ஹேரத் தெரிவித்தார்.

வலப்பனை – ஹெய்போரஸ்ட் தோட்டத்தில் நடைபெற்ற பிரச்சாரக்கூட்டத்தில் கலந்துகொண்டு உரையாற்றுகையிலேயே அவர் இவ்வாறு கூறினார். இது தொடர்பில் அவர் மேலும் கூறியதாவது,

” பெருந்தோட்டக்கைத்தொழில்துறை அமைச்சுப்பதவியை வகித்த நவீன் திஸாநாயக்க, பெருந்தோட்டத் தொழிலாளர்களுக்காக எதனையும் செய்யவில்லை. குறைந்தபட்சம் 50 ரூபா கொடுப்பனவை வழங்குவதற்குகூட முன்வரவில்லை.

பெருந்தோட்டத் தொழிலாளர்களுக்கு ஆயிரம் ரூபா வழங்கப்படும் என ஜனாதிபதி உறுதியளித்திருந்தாலும் இன்னும் அந்த கொடுப்பனவு கிடைக்கவில்லை. ஏன் வழங்கிய வாக்குறுதியை நிறைவேற்றவில்லை என ஜனாதிபதியிடம் கேட்க விரும்புகின்றேன்.” – என்றார்.

பாராளுமன்றம் செயற்பட்ட கடந்த நான்கரை வருடங்களில் விமர்சன அரசியல் நடத்தியவர்களுக்கு மத்தியில் நாம் வினைத்திறன்மிக்க சேவைகளை மக்களுக்காக முன்னெடுத்தோம். எனவே, ஆக்கப்பூர்வமான அந்த அரசியல் பயணத்தை தொடர்வதற்கு கண்டி மாவட்ட மக்கள் இம்முறையும் பேராதரவை வழங்குவார்கள் – என்று ஜனநாயக மக்கள் முன்னணியின் பிரதித் தலைவரும், ஐக்கிய மக்கள் சக்தியின் கண்டி மாவட்ட வேட்பாளருமான வேலுகுமார் தெரிவித்தார்.

கண்டியில் இன்று (27.07.2020) நடைபெற்ற தேர்தல் பிரச்சாரக்கூட்டத்தில் கலந்துகொண்டு உரையாற்றுகையிலேயே அவர் மேற்கண்டவாறு குறிப்பிட்டார்.

மலையக மக்கள் முன்னணியின் ஒஸ்போன் கீழ்பிரிவு தோட்ட தலைவர், டிக்கோயா
பிரதேச அமைப்பாளர் உட்பட அக்கட்சியின் ஆதரவாளர்கள் சிலர் இலங்கைத் தொழிலாளர் காங்கிரஸின் இணைந்துகொண்டுள்ளனர்.

இ.தொ.காவின் பொதுச்செயலாளர் ஜீவன் தொண்டமானை நேரில் சந்தித்து தமது ஆதரவினை வெளிப்படுத்தினர்.

பொகவந்தலாவ நிருபர் – எஸ்.சதீஸ்

பிரதமர் மகிந்த ராஜபக்ச, நுவரெலியா மாவட்ட பொதுஜன பெரமுனவின் வேட்பாளர் முத்தையா பிரபுவிற்கு வாக்களிக்குமாறு பகிரங்கமாக கோரிய நிலையில், பிரபுவின் வெற்றி உறுதியாகியுள்ளதாக அந்தக் கட்சியின் நுவரெலியா மாவட்ட ஆதரவாளர்கள் தெரிவிக்கின்றனர்.

ஶ்ரீலங்கா பொதுஜன பெரமுன கட்சியின் வேட்பாளருக்கு ஆதரவு திரட்டும் முகமாக பிரதமர் மகிந்த ராஜபக்சவும் சூறாவளி சுற்றுப் பயணத்தில் ஈடுபட்டுள்ளார்.அந்த வகையில் நேற்று நுவரெலியாவில் பிரசாரத்தில் ஈடுபட்ட மகிந்த ராஜபக்ச அந்தக் கட்சியின் வேட்பாளர்களின் கூட்டங்களிலும் பங்கெடுத்தார்.

இதன்போது நுவரெலியா மாவட்டத்தின் வேட்பாளர்களான சீ.பீ. ரத்நாயக்க, எஸ்.பீ. திசாநாயக்க ஆகியோரின் கூட்டங்களிலும் பங்கெடுத்தார. இதன்போது முத்தையா பிரபுவின் 10ஆம் இலக்கத்திற்கும் வாக்களிக்குமாறு பிரதமர் கோரிக்கை விடுத்தார்.

இந்த நிலையில், பிரதமரின் இந்த கோரிக்கை முத்தையா பிரபுவின் வெற்றியை நுவரெலியா மாவட்டத்தில் உறுதிசெய்துள்ளதாக ஶ்ரீலங்கா பொதுஜன பெரமுனவின் ஆதரவாளர்கள் தெரிவித்துள்ளனர்.

டிக்கோயா அளுத்தகல பகுதியில் இன்று (27) காலை ஆட்டோவொன்று 20 அடி பள்ளத்தில் வீழ்ந்து விபத்துக்குள்ளானது. எனினும், ஆட்டோ ஓட்டுனருக்கு காயம் எதுவும் ஏற்படவில்லை என பொலிஸார் தெரிவித்தனர்.

கொழும்பில் இருந்து டிக்கோயாவை நோக்கி வந்த ஆட்டோவே, அதிக வேகம் காரணமாக இவ்வாறு விபத்துக்குள்ளானது. விபத்து தொடர்பில் ஹட்டன் பொலிஸார் மேலதிக விசாரணைகளை மேற்கொண்டுவருகின்றனர்.

ஐக்கிய தேசியக் கட்சியின் இரத்தினபுரி தமிழ் அமைப்பாளரும் வேட்பாளருமான எஸ்.ஆனந்தகுமார் இரத்தினபுரியின் பல்வேறு பகுதிகளுக்கும் சென்று தனது தேர்தல் பிரசார நடவடிக்கைகளை முன்னெடுத்திருந்தார்.

இரத்தினபுரி வேவல்வத்தை பகுதி மக்களை சந்தித்த அவர், அந்த பகுதி மக்கள் எதிர்நோக்கிவரும் பிரச்சினைகள் குறித்து கலந்துரையாடல்களை நடத்தியிருந்தார்.

தமது பகுதியிலுள்ள தோட்டங்கள் மூடப்பட்டுள்ளமையினால், தமது தொழில்வாய்ப்புக்கள் இழக்கப்பட்டுள்ளதாக பிரதேச மக்கள் தெரிவித்தனர்.

அத்துடன், தமக்கான காணி மற்றும் வீட்டு உரிமைகள் மறுக்கப்பட்டுள்ளதாகவும் அவர்கள் குறிப்பிட்டனர்.

இதற்கு பதிலளித்த எஸ்.ஆனந்தகுமார், தான் பாராளுமன்றத்திற்கு சென்று இந்த பிரச்சினைகளுக்கு தீர்வை பெற்றுகொடுப்பதாக உறுதியளித்தார்.

செயலிழந்துள்ள தேயிலை தோட்டங்களை மக்களுக்கு வழங்கி சுயதொழிலை ஊக்குவிக்க நடவடிக்கை எடுப்பதாகவும் அவர் கூறியுள்ளார்.

இந்த உறுதிமொழி தமக்கு உற்சாகத்தை ஏற்படுத்தியுள்ளதாக அந்த பிரதேச மக்கள் தெரிவித்திருந்தனர்.