பெருந்தோட்டப் பகுதிகளில் 1992 ஆம் ஆண்டு முதல் இதுவரையான 28 வருடங்களில், 39,934 வீடுகளே நிர்மாணிக்க ப்பட்டுள்ளன என்று, மனித அபிவிருத்தி நிதியத்தின் முன்னாள் தலைவரும் ஐக்கிய தேசிய கட்சியின் நுவரெலியா மாவட்ட வேட்பாளருமான வ.புத்திரசிகாமணி தெரிவித்தார்.

தமிழ்மிரருக்கு வழங்கிய செவ்வியிலேயே அவர் இதனைத் தெரிவித்தார். இதன்போது மேலும் தெரிவித்த அவர், பெருந்தோட்டப் பகுதிகளில், நோர்வே அரசாங்கமும் டச்சு அரசாங்கமும் இணைந்து 14,000 வீடுகளை நிர்மாணித்துள்ளன என்றும் மலையகத்தில் இதுவரை கட்டப்பட்ட வீடுகளில், ஆகக் கூடுதலான வீடுகளை
நோர்வே-டச்சு அரசாங்கமே நிர்மாணித்துள்ளன என்றும் தெரிவித்தார்.

“ ஒருங்கிணைக்கப்பட்ட கிராமிய அபிவிருத்தித் திட்டத்தின் கீழ், 1,356 வீடுகளும் சமூக நலத்திட்டத்தினூடாக 3,900 வீடுகளும், ‘மாடி லயன்’ திட்டத்தின் கீழ் 735 வீடுகளும் அமைச்சினூடாக 4,021 வீடுகளும் புதிய வாழ்க்கை வீட்டுத்திட்டத்தின் கீழ் 1,132 வீடுகளும் நிர்மாணிக்கப்பட்டுள்ளன. இவ்வீடுகள் 2018 ஆம் ஆண்டே முழுமைப்படுத்தப்பட்டன” என்றார்.

அத்துடன் வேல்ட்விஷன் உள்ளிட்ட அரச சார்பற்ற நிறுவனங்கள் பல இணைந்து 72 வீடுகளை நிர்மாணித்துள்ளனஎன்றும் அமரர் பெ.சந்திரசேகரனின் காலத்தில் அமல்படுத்தப்பட்டசுயவீட்டுத் திட்டத்தின் கீழ் 5,281 வீடுகளும், நூறு நாள் வேலைத்திட்டத்தில் 338 வீடுகளும் நிர்மாணிக்கப்பட்டுள்ளன என்றும் தெரிவித்தார்.

‘கிரீன் கோல்ட் அவுசிங்’ திட்டத்தின் கீழ், 1,069 வீடுகளும் டவுன்சிப்வேலைத்திட்டத்தில் 113 வீடுகளும், இந்திய வீட்டுத்திட்டத்தின் கீழ் 3,000 வீடுகளும், இதைத்தவிர இலங்கை அரசாங்கத்தால் 4,000 வீடுகளும் கட்டப்பட்டுள்ளன.

இதைத்தவிர 1,200 வீடுகளும் நிர்மாணிக்கப்பட்டுள்ளன. எனவே, பெருந்தோட்டத் பகுதிகளில் 28 வருடங்களில் 39,934 வீடுகளே நிர்மாணிக்கப்பட்டுள்ளன என்றுத் தெரிவித்த அவர் பிரசார மேடைகளில் கூறப்படுவதைப் போன்று 50,000 வீடுகளோ 60,000 வீடுகளோ கட்டப்படவில்லை என்றும் தெரிவித்தார். மலையக மக்கள் முன்னணியினர் 25,000 வீடுகளைக் கட்டியதாக பிரசார மேடைகளில் கூறித்திறிகின்றனர்.

அத்துடன் இலங்கைத் தொழிலாளர் காங்கிரஸ் 50,000 வீடுகளைக் கட்டியதாகக் கூறுகிறது.திகாம்பரம் 10,000 வீடுகளைக் கட்டியாதாகக் கூறினார். இவர்கள் அனைவரும் கூறுவதைப் பார்த்தால், மலையகத்தில் 85,000 வீடுகள் கட்டப்பட்டிருக்க
வேண்டும். ஆனால், 1992 முதல் மலையகத்தில், 39,934 வீடுகளே கட்டப்பட்டுள்ளன. அத்துடன் மனித அபிவிருத்தி நிதியத்தின் தலைவராக செயற்பட்ட காலத்தில், 7,000 வீடுகளே நிர்மாணிக்கப்பட்டன என்றும் அவர் தெரிவித்தார்.

நன்றி தமிழ் மிரர்

கைதுக்கான முயற்சிகளை நிறுத்துமாறு கோரி, அகில இலங்கை மக்கள் காங்கிரஸ் தலைவர் ரிஷாட் பதியுதீன், நேற்று (16) உயர் நீதிமன்றத்தில் அடிப்படை உரிமை மனுவொன்றைத் தாக்கல் செய்துள்ளார். ஜனாதிபதி சட்டத்தரணிகளான பாயிஸ் முஸ்தபா மற்றும் அனுஜ பிரேமரத்ன ஆகியோரூடாக இந்த அடிப்படை உரிமை மனு தாக்கல் செய்யப்பட்டுள்ளது.

அடிக்கடி மேற்கொள்ளப்படும் விசாரணைகளாலும், கைதுக்கான முயற்சிகளினாலும் தேர்தல் செயற்பாடுகளை முன்னெடுப்பதில் பெரும் சிக்கல்கள் தனக்கு ஏற்படுவதாகவும் அந்த மனுவில் தெரிவிக்கப்பட்டுள்ளது.

முன்னாள் அமைச்சர் ரிஷாட் பதியுதீன் தாக்கல் செய்துள்ள அடிப்படை உரிமை மனுவில் தெரிவிக்கப்பட்டுள்ளதாவது,

அங்கீகரிக்கப்பட்ட அரசியல் கட்சியின் தலைவரென்ற வகையில், இன்றைய தேர்தல் சூழலில் பல வேலைப்பாடுகள் உள்ளன. அடிக்கடி என்னைக் கைது செய்வதற்கு முயற்சிகள் எடுக்கப்படுவது, எனது தேர்தல் செயற்பாடுகளுக்கு முட்டுக்கட்டையாக இருக்கின்றது. மேலும், தேர்தலுக்கு இன்னும் சில நாட்களே எஞ்சியுள்ளதால், பல கூட்டங்களிலும் பங்கேற்க வேண்டியுள்ளது.

இதற்கு முன்னரும் அடிக்கடி என்னை விசாரணைக்கு அழைத்தனர். கடைசியாக பத்து மணி நேரம் நான் விசாரிக்கப்பட்டேன். இவ்வாறான செயற்பாடுகளால் எனது பெயருக்கும் களங்கம் ஏற்படுத்தப்படுவதாகவே நான் உணர்கிறேன்.

என்னை தேர்தலில் தோற்கடிக்க வேண்டும் என்பதற்காகவும், நாடாளாவிய ரீதியில் எமது கட்சிக்குக் கிடைக்கவிருக்கும் ஆசனங்களை குறைப்பதற்காகவுமே, இவ்வாறான திட்டமிட்ட சூழ்ச்சி நடைபெறுவதாக நான் கருதுகிறேன். எனவே, இந்தக் கைது முயற்சிகளைத் தடுத்து நிறுத்த உயர் நீதிமன்றம் உத்தரவிட வேண்டுமெனத் தெரிவிக்கப்பட்டுள்ளது.

கைத்தொழில், வர்த்தக அமைச்சராக இருந்த காலத்தில், கைத்தொழில் அபிவிருத்தி சபையூடாக “கொலொஸஸ்” நிறுவனத்திற்கு செப்பு விநியோகித்தமை பற்றி விசாரிக்கவே, குற்றப் புலனாய்வுத் திணைக்களம் இவரை அழைத்துள்ளதாகத் தெரியவருகிறது.

தொழிலாளர் தேசிய சங்கத்தின் இளைஞர் அணி தலைவர் பா. சிவநேசன், ஹட்டன் பொலிஸாரால் இன்று (17) கைது செய்யப்பட்டுள்ளார்.

தனிப்பட்ட கொடுக்க, வாங்கலொன்று தொடர்பில் முன்வைக்கப்பட்ட முறைப்பாட்டுக்கமையவே இக்கைது இடம்பெற்றுள்ளது.

சிவநேசன் கைது செய்யப்பட்டுள்ளதை காவல்துறையினர் உறுதிப்படுத்தினர்.

சிவநேசன் தேசிய சங்கத்தின் இளைஞர் அணித் தலைவர் என்பதுடன் இம்முறை நுவரெலியா மாவட்டத்தில் சுயேட்சைக் குழு 7இல் களமிறக்கப்பட்டுள்ளமையும் குறிப்பிடத்தக்கது.

வேட்பாளர் ஒருவர் கைதுசெய்யப்பட்டுள்ளமை குறித்து தேர்தல் கண்காணிப்புக் குழுக்களின் கவனம் திரும்பியுள்ளது.

இம்முறைப் பொதுத் தேர்தலில், பதுளை மாவட்டத்தில் போட்டியிடும் ஐந்து தமிழ் வேட்பாளர்களில், ஸ்ரீ லங்கா பொதுஜன பெரமுன சார்பில் போட்டியிடும் செந்தில் தொண்டமான், முன்னிலையில் உள்ளார் என்று, கருத்துக் கணிப்புகளில் தெரியவந்துள்ளது என ‘தமிழ்மிரர்’ நாளிதழ் செய்தி வெளியிட்டுள்ளது.

அந்த செய்தியில் தெரிவிக்கப்பட்டுள்ளதாவது,

சமூக அபிவிருத்தி மன்றம், ஊவா மாகாணத் தமிழ்ப் பட்டதாரிகள் ஒன்றியம், தமிழ் யூனியன், நாளைய மலையகம் ஆகிய அமைப்புகள் இணைந்து, பதுளை மாவட்டத்திலுள்ள பெருந்தோட்டப் பகுதிகளில் மேற்கொண்ட கருத்துக் கணிப்புகளிலேயே, செந்தில் தொண்டமான் முன்னிலையில் உள்ளார் என்று அறிக்கையிடப்பட்டுள்ளது.

இதற்கமைவாக, சமூக அபிவிருத்தி மன்றம், கந்தேகெதரை நகரத்தை அடிப்படையாகக் கொண்ட 15 தோட்டங்களில் மேற்கொண்ட ஆய்வில், செந்தில் தொண்டமான் 81 சதவீதமளவில் முன்னிலையிலுள்ளார் என்று தெரிவித்துள்ளது.

மேலும், ஊவா மாகாணத் தமிழ்ப் பட்டதாரிகள் ஒன்றியம், ஒன்றியத்திலுள்ள 400 உத்தியோகத்தர்களிடம் மேற்கொண்ட கருத்துக் கணிப்பிலும், அவர் 81 சதவீதம் முன்னிலையிலுள்ளார் என்பது தெரியவந்துள்ளது.

தமிழ் யூனியன் அமைப்பானது, தபால்மூல வாக்களிப்பில் ஈடுபட்ட 1,476 பேரிடம் மேற்கொண்ட ஆய்வில் 82 சதவீதத்தில் செந்தில் முன்னிலையிலுள்ளார்.

தபால்மூல வாக்களிப்பு தொடர்பில், நாளைய மலையகம் மேற்கொண்ட ஆய்வில், செந்தில் தொண்டமான் 79 சதவீதமும் தொலைபேசிச் சின்னம் 12 சதவீதமும், யானைச் சின்னம் 6 சதவீதமும், மக்கள் விடுதலை முன்னணி 2 சதவீதமும், சுயேச்சை குழுக்கள் 1 சதவீதமும் பெற்றுள்ளன.

மலையக சகவாழ்வு சங்கம் மேற்கொண்ட ஆய்வில், 81.6 சதவீதமளவில் செந்தில் தொண்டமான் முன்னிலையிலுள்ளார். ” – என்றுள்ளது.

அதேவேளை, அரச புலனாய்வு அமைப்புகள் மேற்கொண்ட கருத்து கணிப்பிலும் செந்தில் தொண்டமானே முன்னிலை வகிப்பார் என தெரியவந்துள்ளது.

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும் 05 பேர் இன்று குணமடைந்து வீடு திரும்பினர்.

இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 2,O12 ஆக அதிகரித்துள்ளது.

664  பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 11 பேர் உயிரிழந்துள்ளனர்.

இலங்கையில் கொரோனா தொற்றியவர்களின் எண்ணிக்கை 2 ஆயிரத்து 12 ஆக இருக்கின்றது.