” போரில் இருந்து வடக்கை மீட்டுவிட்டோம். அடுத்ததாக இன ரீதியான அரசியல் பிடிக்குள் இருந்தும் வடக்கை மீட்டெடுக்கவேண்டும். வடக்கு மக்களின் மனங்களை வெல்வதற்கு எமக்கும் இன்னும் காலம் எடுக்கும். அதுவரையில் பொறுமைகாப்போம். ஆனால், நம்பிக்கையை பெறுவதற்கான போராட்டத்தை கைவிடமாட்டோம்.”

இவ்வாறு ஶ்ரீலங்கா பொதுஜன பெரமுனவின் அம்பாந்தோட்டை மாவட்ட வேட்பாளரான நாமல் ராஜபக்ச தெரிவித்தார்.

கடந்த 10 ஆண்டுகளாக நீங்கள் வடக்குக்கு சென்றுவருகின்றீர்கள். இளைஞர்களை சந்திக்கின்றார். அப்படி இருந்தும் ஏன் இன்னும் அங்கு வாழும் இளைஞர்களின் ஆதரவை பெறமுடியாதுள்ளது என எழுப்பட்ட கேள்விக்கு பதிலளிக்கையிலேயே நாமல் ராஜபக்ச மேற்கண்டவாறு கூறினார்.
இது தொடர்பில் அவர் மேலும் கூறியவை வருமாறு.

“தெற்கு இளைஞர்களுக்கு இணையானவர்களே வடக்கு இளைஞர்களும். அவர்களிடம் நான் வித்தியாசத்தை காணவில்லை. தேசிய கட்சியொன்றுக்கு வாக்களிப்பதற்கான வாய்ப்பை முதலில் நாம் அவர்களுக்கு வழங்கவேண்டும். ஜனாதிபதித்தேர்தலின்போது மாத்திரமே அந்த வாய்ப்பு வழங்கப்படுகின்றது.

அதுவும் தமிழ்த் தேசியக் கூட்டமைப்பின் ஊடாகவே வாக்குகளை பெற முயற்சிக்கப்படுகின்றது. மைத்திரிபால சிறிசேனவும், சஜித் பிரேமதாசவும் அவ்வாறே வாக்குகளைப்பெற்றனர்.

எமக்கு 6 அல்லது 8 வீதம் கிடைத்தாலும் பரவாயில்லை, தனிவழியில் செல்லவேண்டும் என்ற முடிவில் இருக்கின்றோம். எனவே, தேசிய நீரோட்டத்துக்குள் சங்கமிப்பதற்கு அவர்களுக்கு அவகாசம் வழங்கவேண்டும். வாக்கு கிடைக்கவில்லை என்பதற்காக முயற்சியை கைவிடக்கூடாது.

உதாரணமாக ஜே.வி.பி இளைஞர்களை ஐக்கிய தேசியக்கட்சி கொன்றது. அவ்வாறு செய்த ஐக்கிய தேசியக்கட்சியும், ஜே.வி.பியும் இணைவதற்கு 30 ஆண்டுகள் எடுத்தன. இருதரப்புகளும் இணைந்துசெயற்படவில்லை எனக்கூறமுடியாது. கடந்தகாலங்களில் ஐக்கிய தேசியக்கட்சி அரசாங்கத்துக்கு ஆதரவாகவே ஜே.வி.பி. உறுப்பினர்கள் நாடாளுமன்றத்தில் வாக்களித்துள்ளனர்.

2 ஜனாதிபதி தேர்தல்களில் ஐ.தே.க. பக்கம் நின்றனர். ஆனாலும் இதற்கு 30 ஆண்டுகள் எடுத்தன. எமது அரசியல் பயணத்துக்கு வடக்கு மக்களின் நம்பிக்கையை பெறுவதற்கு 30 ஆண்டுகள் எடுக்கும் என நாம் கூறவில்லை. அதற்காக தொடர்ந்தும் முயற்சிக்கவேண்டும்.

குறிப்பாக டயஸ்போராக்கல் இன்னும் தனி நாட்டுக்காக குரல் எழும்பும் நிலையிலும்,, தெற்கிலுள்ள தேசிய கட்சி வடக்கில் அரசியல் செய்யாத நிலையிலும்கூட எமக்கு 10 வீத வாக்ககள் கிடைக்கின்றது. எனவே, வடக்கை கைவிடவேண்டாம் என தெற்கிலுள்ள கட்சிகளிடம் கேட்டுக்கொள்கின்றேன்.

இற்றைக்கு 30 ஆண்டுகளுக்கு முன்னர் வடக்கில் இனரீதியிலான அரசியல் இருக்கவில்லை. தேசிய அரசியலே அங்கு முன்னெடுக்கப்பட்டது. எனவே, தேசிய நீரோட்டத்தில் அவர்களை சங்கமிக்கவைப்பதற்கு வாய்ப்பு வழங்கவேண்டும். எனவே, வடக்கு அரசியலை கைவிடவேண்டாம் என கட்சிகளிடம் கேட்டுக்கொள்கின்றேன்.” – என்றார்.

பெண் பொலிஸ் அதிகாரி ஒருவர், ஏற்கனவே திருமணம் ஆன நபரை தன் கணவர் என கூறி கொரோனா தடுப்பு மையத்தில் தன்னுடன் தங்க வைத்து நாடகம் ஆடி உள்ளார்.

இந்தியாவின், மராட்டிய மாநிலம் நாக்பூரில் உள்ள காவல் நிலையத்தில் பணிபுரிந்த ஒரு பொலிஸ் அதிகாரிக்கு கொரோனா உறுதி செய்யப்பட்டது. இதையடுத்து, அந்த காவல் நிலையத்தில் பணிபுரிந்து வந்த அனைத்து காவல்துறையினரும் கொரோனா தடுப்பு முகாமில் தனிமைப்படுத்தப்பட்டனர். இதில் சில பொலிஸ் அதிகாரிகள் அவர்களது குடும்பதினருடன் தனிமைப்படுத்தப்பட்டனர்.

அப்படி தனிமைப்படுத்தப்படும்போது அந்த காவல் நிலையத்தில் பணிபுரிந்து வந்த பெண் பொலிஸ் அதிகாரி ஒருவருக்கு தனது கணவருக்கும் கொரோனா இருக்கலாம் என சந்தேகம் எழுந்துள்ளது. ஆகையால், அவரையும் தன்னுடன் தனிமைப்படுத்த வேண்டும் என மருத்துவமனை ஊழியர்களிடம் தெரிவித்துள்ளார்.

பெண் பொலிஸ் அதிகாரி கொடுத்த தகவலின் அடிப்படையில் தபால் துறையில் வேலை பார்த்து வந்த ஒருவரை அழைத்து வந்து கொரோனா தடுப்பு முகாமில் பெண்  தனிமைப்படுத்தினர்.

இதற்கிடையில், பஜாஜ் நகரில் உள்ள காவல் நிலையத்திற்கு வந்த ஒரு பெண் தனது கணவருக்கு கொரோனா உள்ளது என கூறி மருத்துவமனை ஊழியர்கள் அழைத்து சென்று உள்ளனர். ஆனால், அவர் பெண் பொலிஸ் ஒருவருடன் கொரோனா தடுப்பு முகாமில் உள்ளார் எனவும், அவரை மீட்டுத்தரவேண்டும் எனவும்  மனு கொண்டுத்தார்.

இதையடுத்து விசாரணை மேற்கொண்ட பொலிஸார், கொரோனா தடுப்பு முகாமில் உள்ள பெண் பொலிஸ் அதிகாரிக்கு திருமணம் ஆகவில்லை என்பதை கண்டுபிடித்தனர். மேலும், அவருடன் கொரோனா முகாமில் உள்ள நபருக்கு ஏற்கனவே திருமணம் ஆகி இருப்பதையும், இவர்கள் இருவரும் யாருக்கும் தெரியாமல் காதலித்து குடும்பம் நடத்தி வந்ததும் விசாரணையில் தெரியவந்தது.

கடந்த ஆண்டு நடந்த ஒரு அரசு நிகழ்ச்சியின் போது பெண் பொலிசுக்கும், அந்த தபால் துறையில் வேலை செய்து வந்த நபரும் சந்தித்துள்ளனர் அப்போது அவர்களுக்குள் காதல் ஏற்பட்டுள்ளது. இதையடுத்து இருவரும் யாருக்கும் தெரியாமல் ரகசியமாக குடும்பம் நடத்தி வந்துள்ளனர்.

தனது கணவர் பெண் பொலிசுடன், தனியாக குடும்பம் நடத்தி வந்தது அந்த நபரின் மனைவிக்கு தற்போது தான் தெரிய வந்ததுள்ளது.

இந்த விவகாரம் தற்போது வெளிச்சத்துக்கு வந்தையடுத்து பெண் பொலிஸ் அதிகாரியும், அவரது ரகசிய காதலனும் வெவ்வேறு கொரோனா தடுப்பு முகாம்களுக்கு மாற்றப்பட்டனர். தொடர்ந்து இது குறித்து விசாரணை நடைபெற்று வருகிறது.

பொதுத்தேர்தலில் ஐக்கிய மக்கள் சக்தி வெற்றிபெற்று, சஜித் பிரேமதாச பிரதமரானால் மாத்திரமே இந்த நாட்டில் நிம்மதியாக வாழக்கூடிய சூழ்நிலை உருவாகும் – என்று தொழிலாளர் தேசிய சங்கத்தின் தலைவர் பழனி திகாம்பரம் தெரிவித்தார்.

ஹட்டனில் நடைபெற்ற தேர்தல் பிரச்சாரக்கூட்டமொன்றில் கலந்துகொண்டு உரையாற்றுகையிலேயே அவர் மேற்கண்டவாறு கூறினார்.

” அனைத்து இன மக்களையும் அரவணைத்துக்கொண்டு பயணிக்ககூடிய ஒரே தலைவர் சஜித்தான். அவர் பிரதமரானால் மாத்திரமே நம்மால் நிம்மதியாக வாழமுடியும்.

தோட்டத்தில் பிறந்து, வளர்ந்து மக்களின் கஷ்டங்களை புரிந்துகொண்ட ஒருவர்தான் தலைவராக வரவேண்டும் என தொடர்ச்சியாக கூறிவருகின்றேன். எமது சங்கத்துக்கும் அப்படியானவர்தான் தலைவராக வருவார். நான் தோட்டத்தில் பிறந்து, மக்களோடு மக்களாக வாழ்ந்து, வளர்ந்தவன்.

வாக்கு என்ற பலம் உங்களிடம் உள்ளது. அந்த பலம்தான் மலையகத்தின் எதிர்காலத்தை தீர்மானிக்கப்போகின்றது. எனவே, சேவை செய்யக்கூடியவர்களை ஆதரிக்குமாறு கேட்டுக்கொள்கின்றேன்.” – என்றும் பழனி திகாம்பரம் குறிப்பிட்டார்.

ஶ்ரீலங்கா பொதுஜன பெரமுனவின் நுவரெலியா மாவட்ட வேட்பாளரான முத்தையா பிரபுவுக்கும், தொழிலாளர் தேசிய சங்கத்தின் தலைவரும், ஐக்கிய மக்கள் சக்தியின் நுவரெலியா மாவட்ட வேட்பாளருமான பழனி திகாம்பரத்துக்குமிடையிலான சொற்போர் உக்கிரமடைந்துள்ளது.

பிரச்சார மேடைகளில் இருவரும் சரமாரியாக சொற்கணைகளைத் தொடுத்துவருகின்றனர்.

முத்தையா பிரபுவை, பரசூட் வேட்பாளர் என்றும், பெட், போல் மற்றும் பிஸ்கட்டுகளை வழங்கி வாக்கு கேட்கும் அவருக்கு, மக்கள் வாக்களிக்ககூடாது என திகாம்பரம் பிரச்சாரம் முன்னெடுத்துவருகிறார்.

மறுபுறத்தில் திகாம்பரம் அமைச்சராக இருந்தபோது ஆமை வேகத்திலேயே வீட்டுத்திட்டம் முன்னெடுக்கப்பட்டது எனவும், மலையக மக்களுக்காக அவர் ஒன்றும் செய்யவில்லை எனவும் முத்தையா பிரபு பதிலடி கொடுத்துவருகிறார்.

இந்நிலையில் இன்று நடைபெற்ற பிரச்சாரக்கூட்டத்தில் கருத்து வெளியிட்ட முத்தையா பிரபு,

” நான் பெட்,போல் வழங்கி பிரச்சாரம் முன்னெடுப்பதற்கா திகாம்பரம் கூறுகிறார். அவர்தான் நுவரெலியா மாவட்ட கிரிக்கெட் சபையின் தலைவராக இருக்கிறார். அவர் ஒன்றும் செய்யாததாலேயே எம்மால் செய்யவேண்டியுள்ளது.” – என்றார்.

” உருளைக்கிழங்கு பயிரிட்டு லாபம் பெருவதற்கோ குடிநீரை விவசாயத்துக்குக் களவாடுவதற்கோ அல்லது கிடைக்கும் சிற்றூழியர்கள் நியமனத்தை லட்சக்கணக்கில் விற்பதோடு அண்டாவையும் குண்டாவையும் கொடுத்து சேவையென புகழ்ச்சியடைவதற்காகவோ நான் பாராளுமன்ற தேர்தலில் போட்டியிடவில்லை.” – என்று மலையக மக்கள் முன்னணியின் பிரதி செயலாளர் நாயகமும் சட்டத்தரணியும் கோடரி சின்ன வேட்பாளருமான அனுஷா சந்திரசேகரன் தெரிவித்தார்.

மெராயா பகுதியில் நடைபெற்ற மக்கள் சந்திப்புகளின்போது, இது தொடர்பில் அவர் மேலும் கூறியதாவது,

” மலையக இளைய தலைமுறையினரின் அடையாளத்துக்காகவும் இன்னும் 10 வருடங்களில் எம் சமூகம் அதற்குறிய அடையாளங்களுடனும் வாழ வேண்டுமென்ற நோக்கத்துடனேயே நான் இந்த பாராளுமன்ற தேர்தலில் மலையகத்தின் ஒரே ஒரு பெண்ணாக துணிந்து களமிறங்கியள்ளேன்.

பணமும் பந்தாவும் அரசாங்க நிதி ஒதுக்கீடும்தான் முக்கியமென்று என் தந்தை அரசியலில் இறங்கவில்லை கோடி கோடியாக சம்பாதித்து சொத்துக்கள் குவித்திருக்கும் நிலையை என் பாட்டனார் என் தந்தைக்கு விட்டுச்சென்றிருந்தார் – ஆனால் தன் சொத்துக்களை மட்டுமல்ல தனது இளமைக்காலம் முழவதையும் என் தந்தை நம் சமூக செயற்பாடுகளில் முற்றாக இழந்தார். தந்தையாகி எம்மைவிட்டு வருடக்கணக்கில் சிறையில் இருந்தார்.

இன்று சம்பாதிப்பதுதான் எனது நோக்கமென்றால் ஒரு சட்டத்தரணியாக லட்சக்கணக்கில் சம்பாதிக்கலாம் ஆனால் அது என் தந்தைக்கும் அவரை நம்பிய விசுவாசிகளுக்கும் ஏன் எனக்கு நானே செய்துக் கொள்ளும் துரோகமாகவே அமையும்.

ஆகவே தான் என் தந்தையின் அடையாளத்துக்காக களத்தில் இறங்கியுள்ளேன். எத்தனை வியாபாரிகள் வந்து தடுத்தாலும் என் பயணத்தை நிறுத்த முடியாது.
எத்தனை அல்லக்கைகலாலும் என் வேகத்துக்கு ஈடு கொடுக்க முடியாது.
ஓய்வெடுக்க வேண்டியவர்களின் கோழைத்தனமான செயற்பாடுகளைக் கண்டு நான் ஒரு போதும் ஓடி ஒழிய மாட்டேன். ஒரு பெண்ணுடன் மோதும் பணமுதலைகளைக் கண்டு பின் வாங்க மாட்டேன்.

எல்லா பெண்களிடமும் தன் பலவீனத்தை காட்டுவது போல இந்த வீரனின் மகளிடம் விளையாட்டு காட்ட முற்பட்டால் வாழ்க்கையில் மறக்க முடியாத பாடத்தை கற்பிப்பேன்.  என்னுடன் கருத்து ரீதியாக மோதமுடியாத கலாநிதிகள் நிச்சயம் என்முன் கைகட்டி நிற்கச்செய்வேன் என்றும் கூறினார்.

“கொவிட்- 19 தொற்றின் பாதிப்பாக ஒரு மில்லியனுக்கும்  மேற்பட்டோர்தொழில்களை இழக்கலாம் என கணிக்கப்பட்டுள்ளது. சமீபத்தில் தொழில் இழந்த சகலருக்கும் 10000 ரூபா மாதாந்தக் கொடுப்பனவாக வழங்கப்படும். வெளிநாடுகளில் தொழில்களை இழந்து நாடு திரும்புவோருக்கும்  இந்த நிவாரண உதவித் தொகை வழங்கப்படும்.”

இவ்வாறு ஐக்கிய தேசியக் கட்சியின் தேர்தல் விஞ்ஞாபனத்தில் தெரிவிக்கப்பட்டுள்ளது.

ஐக்கிய தேசியக்கட்சியின் தேர்தல் விஞ்ஞாபனம் இன்று கட்சி தலைவர் ரணில் விக்கிரமசிங்க தலைமையில் வெளியிடப்பட்டுள்ளது.  அதில் பல தலைப்புகளின்கீழ் பல்வேறு விடயங்கள் முன்வைக்கப்பட்டுள்ளன.

‘பிரச்சினைகளின் முடிச்சுகளை அவிழ்க்கும் திட்டம்’ எனும் தலைப்பின்கீழ் முன்வைக்கப்பட்டுள்ள விடயங்கள் வருமாறு,

பொருளாதார நெருக்கடிகளால் சிரமப்படும் மக்களை அதிலிருந்து விடுவித்துக்கொள்வதற்கு அவர்களின் கரங்கள் பலப்படுத்தப்பட வேண்டும். தொழில்கள் பாதுகாக்கப்பட வேண்டும். சுயதொழில் வருமானங்கள் பாதுகாக்கப்பட வேண்டும். தொழில் இழந்தவர்களை பாதுகாத்துக் கொள்ள வேண்டும். அதற்கு இணையான வருமான வழிகளை உருவாக்கப்பட வேண்டும்.

அரசாங்கத் தொழிலில் இடைநிறுத்தப்பட்டுள்ள சகல கொடுப்பனவுகளும் மீள வழங்கப்படும்.

என்டர்பிறைசஸ் ஸ்ரீ லங்கா யோசனை முறைமையின் கீழ் 50 மில்லியனுக்கு குறைந்த கடன் பெற்றவர்களுக்கும் கடனை திருப்பி செலுத்துவதற்கான சலுகைக்காலம் வழங்கப்படும்.

சமூகத்தில் பாதிக்கப்படும் ஏழைக் குடும்பங்களுக்கு 10000 ரூபாய்க் கொடுப்பனவு வழங்கப்படும்.

இலங்கையில் சகல தொழில்முயற்சியாண்மைகளும் பாதுகாக்கப்படும். அதற்காக வர்த்தக சந்தையில் காத்திரமான செயற்றிட்டங்கள் மற்றும் ஆபத்தான நிதி செயற்றிட்டங்கள் ஆகியன சர்வதேச நிதி கூட்டுத்தாபனத்தின் ஊடாக தனியார் துறைகளுக்கு வழங்கப்பட்டு நிதி பெற்றுக்கொள்ளப்படும்.

கொவிட்-19 ஆசிய அபிவிருத்தி வங்கியின் 20 பில்லியன் அமெரிக்க டொலர் நிவாரண செயற்திட்டம், அத்தகைய சமாந்தரமான செயற்திட்டம் ஊடாக ஒத்துழைப்பை பெற்றுக் கொள்வதற்கு மேலதிகமாக அரசாங்கம் ஊடாக தனியார் வியாபாரங்களுக்கு ஒத்துழைப்பு வழங்கும் செயற்திட்டமும் முன்னெடுக்கப்படும்.

இந்த நிதியங்கள் மற்றும் செயற்திட்டம் ஊடாக சிறு மற்றும் நடுத்தர தொழில்முனைவோர்கள், சிறு தொழில ;முனைவோர்கள் மற்றும் சுயதொழில் தொழில்முனைவோர்களை பலமாக்குவோம். அதற்கான நிதி உதவிகள் மற்றும் கொடுக்கல் வாங்கல்களை செய்வதற்கு நீண்ட கால அரச பிணை முறிகளை அந்த தொழில்முனைவோர்களுக்கு வழங்குவோம்.” என்றுள்ளது.

இப்படி மேலும் பல திட்டங்களும் உள்ளன.

தபால்மூல வாக்களிப்பில் அரச ஊழியர்கள் ஐக்கிய மக்கள் சக்திக்கு வாக்களிப்பதை காணமுடிகின்றது. தபால்மூல வாக்குகள்தான் வெற்றிபெறும் தரப்பை ஆரம்பத்தில் தீர்மானிக்கும். எனவே, இந்த அரசாங்கத்தின் வீழ்ச்சிப்பயணம் அரம்பித்துவிட்டது என மலையக மக்கள் முன்னணியின் தலைவரும், ஐக்கிய மக்கள் சக்தியின் நுவரெலியா மாவட்ட வேட்பாளருமான கலாநிதி வீ.இராதாகிருஷ்ணன் தெரிவித்தார்.

ஹட்டன் டிக்கோயா பகுதியில் இன்று (16) மதியம் இடம்பெற்ற பிரச்சார கூட்டத்தில் கலந்து கொண்டு உரையாற்றும் போதே அவர் இவ்வாறு தெரிவித்தார்.

அவர் மேலும் தெரிவித்ததாவது,

” மலையகத்தில் நாம் கணித, விஞ்ஞான பாடசாலைகளை உருவாக்கினோம். அனைத்து பௌதீக வளங்களையும் கொடுத்தோம். ஆனால், சில பாடசாலைகளில் ஆசிரியர் பற்றாக்குறை இருந்தது. எனவே,  கணிதம் மற்றும் விஞ்ஞானம் கற்பிக்ககூடிய 100 ஆசிரியர்களை இந்தியாவில் இருந்து வரவழைப்போம் என நான் யோசனை முன்வைத்திருந்தேன். பல கட்சிகள் இதற்கு எதிர்ப்பு  தெரிவித்தன. இதனால் திட்டத்தை கைவிடவேண்டிய நிலை ஏற்பட்டது.

எதிர்காலத்தில் இந்திய ஆசிரியர்களை வரவழைக்ககூடியதாக இருந்தால் அதனை நிச்சயம் செய்வோம். அவ்வாறு இல்லாவிட்டால் இங்குள்ளவர்களுக்கு இந்தியாவில் பயிற்சி வழங்கப்படவேண்டும். நான் மாகாணசபையில் இருக்கும்போது இவ்வாறான பயிற்சி திட்டம் முன்னெடுக்கப்பட்டது.

அதேவேளை., சர்வமத தலைவர்களிடமும் ஆசியும் ஆதரவும் திரட்டி வருகின்றோம். நான் இந்து சமயத்துக்கு பல சேவைகளை ஆற்றியுள்ளேன். எதிர்காலத்திலும் ஆற்றுவதற்கு எதிர்ப்பார்க்கின்றேன்.” – என்றார்.

க.கிசாந்தன்

” எதிர்வரும் 5ஆம்  திகதி நடைபெறவுள்ள தேர்தலில்,  ஐக்கிய மக்கள் சக்தி அமோகமாக வெற்றியடைந்து பலம் பொருந்திய ஆட்சியை அமைப்பதுடன், பதுளை மாவட்டத்தில் நானும், தம்பி வடிவேல் சுரேசும் பாரிய வெற்றியையும் ஈட்டுவோம். அவ் வெற்றியின் அடிப்படையில், நான் அமைச்சு பதவியைப் பெற்று, அப்பதவியுடனேயே மீண்டும் எமது மக்களை சந்திப்பேன்.”

இவ்வாறு பதுளை மாவட்ட ஐக்கிய மக்கள் சக்தியின் வேட்பாளர் அ. அரவிந்தகுமார் குறிப்பிட்டார்.

கொரோனா வைரஸ் தொற்றுக்கு இலக்கான நிலையில் சிகிச்சைப்பெற்றுவருபவர்களில் மேலும் 06 பேர் இன்று குணமடைந்து வீடு திரும்பினர்.

இதன்படி இலங்கையில் கொரோனாவின் பிடிக்குள் இருந்து மீண்டவர்களின் எண்ணிக்கை 2,OO7 ஆக அதிகரித்துள்ளது.

656  பேருக்கு தொடர்ந்தும் சிகிச்சையளிக்கப்பட்டுவருகின்றது. கொரோனாவால் 11 பேர் உயிரிழந்துள்ளனர்.

இலங்கையில் கொரோனா தொற்றியவர்களின் எண்ணிக்கை 2 ஆயிரத்து 674 ஆக இருக்கின்றது.