சப்ரகமுவ, மேல் மாகாணங்களிலும் காலி, மாத்தறை மற்றும் நுவரெலியா மாவட்டங்களிலும் இன்று (09) 75 மில்லிமீற்றர் வரை மழை பெய்யக்கூடும் என வளிமண்டலவியல் திணைக்களம் எதிர்வுகூறியுள்ளது.

கிழக்கு, ஊவா மாகாணங்களிலும் முல்லைத்தீவு மாவட்டத்திலும் இடைக்கிடையே இடியுடன் கூடிய மழை பெய்யும் எனவும் திணைக்களம் மேற்படி திணைக்களம் தெரிவித்துள்ளது.

அத்துடன், சீரற்ற காலநிலையால் பலியானவர்களின் எண்ணிக்கை 21 ஆக அதிகரித்துள்ளது.

வெள்ளம் மற்றும் மண்சரிவால் 1,095வீடுகள் பகுதியளவும், 21 வீடுகள் முழுமையாகவும் சேதமடைந்துள்ளன.

நுவரெலியா மாவட்டத்தில் வாழ்பவர்களுக்கான கொவிட் – 19 தடுப்பூசி ஏற்றும் பணி இன்று (09.06.2021) ஆரம்பமானது.

நுவரெலியா காமினி தேசிய பாடசாலையில் வைத்து ஆரம்பமான தடுப்பூசி திட்டத்தில் முதற்கட்டமாக அத்தியாவசிய சேவைகளில் ஈடுபடும் அரச ஊழியர்கள், தோட்ட அதிகாரிகள் மற்றும் தோட்டத்தொழிலாளர்களுக்கு தடுப்பூசி ஏற்றப்பட்டது.

நுவரெலியா மாவட்டத்துக்கென 50 ஆயிரம் சினோ பாம் தடுப்பூசிகள் வழங்கப்பட்டுள்ளன. இதில் கொரோனா வைரஸ் பரவும் அபாயமுள்ள கிராம சேவகர் பிரிவுகளில் வாழும் 60 வயதுக்கு மேற்பட்டவர்களுக்கு 40 ஆயிரம் தடுப்பூசிகள் ஒதுக்கப்பட்டுள்ளன.

ஏனைய 10 ஆயிரம் தடுப்பூசிகள் பொலிஸார், அத்தியாவசிய சேவைகளில் ஈடுபடும் அரச ஊழியர்கள் மற்றும் பெருந்தோட்டத்தொழிற்துறையில் ஈடுபட்டுள்ளவர்களுக்கு வழங்கப்படவுள்ளது.

காமின தேசிய பாடசாலையில் ஆரம்பமான தடுப்பூசி ஏற்றும் பணியை இராஜாங்க அமைச்சர் ஜீவன் தொண்டமான் இன்று நேரடி பயணம் மேற்கொண்டு கண்காணித்தார். தோட்டப்பகுதிகளில் தடுப்பூசி ஏற்றுவதற்கான உட்கட்டமைப்பு வசதிகளையும் ஏற்படுத்திக்கொடுத்தார்.

க.கிசாந்தன்

போலி தகவல்களை பரப்புவோரை கைது செய்கின்றோம் என்ற போர்வையில் சமூக ஊடகங்களை ஒடுக்குவதற்கு அரசு முயற்சிக்கின்றது என ஐக்கிய மக்கள் சக்தியின் நாடாளுமன்ற உறுப்பினர் மனுஷ நாணயக்கார குற்றஞ்சாட்டினார்.

நாடாளுமன்றம் நேற்று முற்பகல் 10 மணிக்கு சபாநாயகர் மஹிந்த யாப்பா அபேவர்தன தலைமையில் கூடியது.

இதன்போது சமூகவலைத்தளங்களைக் கண்காணிக்க விசேட சி.ஐ.டி. குழுவொன்று நியமிக்கப்பட்டுள்ளமை தொடர்பில் கருத்து வெளியிடுகையிலேயே அவர் இவ்வாறு குற்றஞ்சாட்டினார். இது தொடர்பில் மனுஷ நாணயக்கார எம்.பி. மேலும் கூறியதாவது,

” போலி தகவல்களை பரப்புவோரை கைது செய்ய நடவடிக்கை என்ற போர்வையில் சமூக ஊடகங்கள் தணிக்கைக்கு உட்படுத்தும் நடவடிக்கை முன்னெடுக்கப்பட்டுள்ளது. எவராவது போலி தகவல் பரப்பினால் அதற்கு நடவடிக்கை நடவடிக்கை எடுக்கப்பட வேண்டும் என்பதை ஏற்கின்றோம்.

ஆனால், சமூக ஊடகங்களை மிரட்டி, நாட்டின் உண்மையான நிலைவரம் தொடர்பான தகவல்கள் மக்களுக்கு சென்றடைவதை தடுப்பதற்காக ஒடுக்குமுறையை அரசு கையாண்டு, கைது படலத்தையும் ஆரம்பித்துள்ளது. இது தொடர்பில் அரசின் உண்மையான நிலைப்பாடு என்ன” – என்றார்.

” இரசாயன உரப் பாவனை கடந்த நான்கு வருடங்களில் நூற்றுக்கு 300 சதவீதத்தால் அதிகரித்துள்ளது. இதனால் இரசாயன உரப் பாவனையால் ஆரோக்கியமற்ற சமூகமொன்று உருவாகி வருகிறது. இது மிகவும் ஆபத்தானதொரு நிலையாகும். இதனை தடுத்து நிறுத்தி,சேதனை பசளை முறைக்கு விவசாயத்தை நகர்த்தும் அரசின் தேசிய வேலைத்திட்டத்திற்கு எதிர்க்கட்சிகள் ஒத்துழைக்க வேண்டுமென விவசாய அமைச்சர் மஹிந்தானந்த அளுத்கமகே கோரிக்கை விடுத்தார்.

நாடாளுமன்றத்தில் நேற்று செவ்வாய்க்கிழமை விவசாய அமைச்சின் விசேட கூற்றொன்றை முன்வைத்து உரையாற்றும் போதே அவர் இவ்வாறு கூறினார்.

அவர் மேலும் கருத்து வெளியிடுகையில்,

“உலகில் இரசாயன உரத்தை பயன்படுத்தி விவசாயத்தில் ஈடுபட்டுவந்த பல நாடுகள் தற்போது சேதனை பசளை உரத்தை பயன்படுத்தி விவசாயம் செய்யும் நிலையை நோக்கி நகர்ந்து வருகின்றன.இரசாயன உர பாவனையால் சுற்றுச் சூழல் மற்றும் சுகாதாரத்துக்கு ஏற்படும் ஆபாத்தமான நிலையை ஆய்வுகள் மூலம் உணர்ந்து அந்தச் செயற்பாடு கைவிடப்பட்டு வருகிறது. உலகில் 187 நாடுகள் சேதனை பசளை முறையை நோக்கி நகர்ந்துள்ளன.

2017 ஆம் ஆண்டு நான்கு இலட்சம் மெற்றிக்தொன் இரசாயன உரம் இறக்குமதி செய்யப்பட்டுள்ளது. இவ்வருடத்துக்கு மெட்றிக் தொன் 1.2 மில்லியன் இரசாயன உரம் அவசியமென கணக்கிடப்பட்டுள்ளது. அதாவது கடந்த நான்கு வருடத்தில் நூற்றுக்கு 300 சதவீதத்தால் இரசாயன உர பயன்பாடு நாட்டில் அதிகரித்துள்ளது.இது மிகவும் அவதானமிக்க நிலையாகும். இவ்வளவு இரசாயன பயன்பாடு அதிகரித்தும் உற்பத்திகள் அதிகரிக்கவில்லை. விவசாயம் செய்யும் நிலப்பரப்பும் அதிகரிக்கவில்லை. எமது நாட்டில் 15 லட்சம் ஹெக்டேயர் நிலப்பரப்பில்தான் விவசாயம் செய்யப்படுகிறது. நெல், தேங்காய், இறப்பர், தேயிலை, மரக்கறி என அனைத்து தேவைகளுக்கு 15 லட்சம் ஹெக்டேயர் நிலப்பரப்புதான் பயன்படுத்தப்படுகிறது. என்றாலும் அதில் தற்போது உற்பத்தி செய்யப்படுவது 13 லட்சம் ஹெக்டேயர்தான்.

விவசாயத்துக்கு இரசாயன உரத்தைதான் பயன்படுத்த வேண்டுமென அனைவரும் நினைக்கின்றனர்.1965ஆம் ஆண்டு முதல் பல்கலைக்கழகங்களிலும் இதனைதான் கற்றுக்கொடுத்து வருகின்றனர். சேதனை பசளை என்றால் கொம்போஸ் உரம் மாத்திரம்தான் என நினைக்கின்றனர். இன்று தொழில்நுட்பம் வளர்ச்சியடைந்துள்ளது. எமது நாட்டில் சேதனை பசளையை உற்பத்தி செய்ய தேவையான மூலப்பொருட்கள் உள்ளன. இரசாயன உரம் பாவிக்காத ஒரு காலம் எமது நாட்டில் இருந்தது.

தற்போது அடுத்த போகத்துக்குத் தேவையான உரத்தை வழங்குவதற்கான நடவடிக்கை எடுக்கப்பட்டுவருகின்றது. சேதனை பசளை உற்பத்தியாளர்கள் விவசாயிகளுடன் கலந்துரையாடல்கள் நடாத்தி வருகின்றனர். விவசாயிகளுக்குத் தேவையான உரத்தை உரிய நேரத்தில் பெற்றுக்கொடுப்போம். அதற்கான வேலைத்திட்டம் முன்னெடுக்கப்படும்.

இரசாயன உரத்துக்கான தடையால் உணவு தட்டுப்பாடு ஏற்படவும் இடமளிக்கமாட்டோம். மக்களுக்கு நச்சுத்தன்மையற்ற உற்பத்தி பொருட்களை வழங்குவதே எமது நோக்கமாகும்.

1994 இல் முதல் சிறுநீரக நோயாளி கண்டறியப்பட்டார். இன்று 65ஆயிரத்திற்கும் அதிகமான நோயாளர்கள் உள்ளனர். சிறுநீரக நோய்க்கு இரசாயன உரம்தான் காரணம் என்பது ஆய்வுகளில் உறுதிப்படுத்தப்பட்டுள்ளது. விவசாயிகளின் சிறுநீரகத்தை பாதுகாக்க வேண்டும். வடமேல் மாகாணத்தில் 25 சதவீதமானவர்களுக்கு நீரிழிவு நோய் உள்ளது. இதுபோன்று பல நோய்கள் இரசாயன உரம் பாவனையால் ஏற்பட்டுள்ளது.

ஆகவே, இதனை அரசியல்மயப்படுத்த வேண்டாமென எதிர்க்கட்சியினரிடம் கோரிக்கை விடுக்கின்றோம். எமது எதிர்கால சந்ததியினரை பாதுகாக்க வேண்டும். இந்த தேசிய வேலைத்திட்டத்திற்கு ஒத்துழைக்குமாறு கோருகிறோம். 100 பில்லியன் வர்த்தகத்துடன்தான் நாம் போராடுகிறோம் .” – என்றார்.

தனிமைப்படுத்தல் சட்டத்தைமீறிய மேலும் ஆயிரத்து 34 பேர் கடந்த 24 மணி நேரத்துக்குள் கைது செய்யப்பட்டுள்ளனர்.

அத்துடன் தனிமைப்படுத்தல் சட்டம் நடைமுறைப்படுத்தப்பட்ட கடந்த ஒக்டோபர் முதல் இதுவரை அச்சட்டத்தைமீறிய 26 ஆயிரத்து 920 பேர் கைது செய்யப்பட்டுள்ளனர்.

கொழும்பு, புறக்கோட்டை டேம் வீதியில் உள்ள 05 மாடி கட்டமொன்றில் தீ விபத்து ஏற்பட்டுள்ளது.

தீயினை கட்டுப்படுத்த 5 தீயணைப்பு வாகனங்கள் அனுப்பப்பட்டுள்ளதாக தெரிவிக்கப்படுகின்றது.

பதுளை மாவட்டத்துக்கு முதற்கட்டமாகக் கிடைத்துள்ள 50 ஆயிரம் கொரோனா தடுப்பூசிகளை, அம்மாவட்ட மக்களுக்கு, நாளை (09) முதல் ஏற்றும் பணிகள் முன்னெடு்க்கப்படவுள்ளன.

அந்த வகையில், ஹப்புத்தளை, எல்ல, பண்டாரவெல போன்ற பிரேதேசங்களில், நாளைய தினம் தடுப்பூசி ஏற்றும் பணிகள் முன்னெடுக்கப்படவுள்ளன என்று, பெருந்தோட்டங்களுக்கான பிரதமரின் ஒருங்கிணைப்புச் செயலாளரும் இலங்கைத் தொழிலாளர் காங்கிரஸின் உப தலைவருமான செந்தில் தொண்டமான்  தெரிவித்தார்.

செந்தில் தொண்டமானின் அறிவுறுத்தல்களுக்கமைய, தோட்டப் புறங்களுக்குள்ளேயே தடுப்பூசி ஏற்றும் நிலையங்கள் உருவாக்கப்பட்டு, மிகவும் பாதுகாப்பான முறையில் இந்தத் தடுப்பூசி ஏற்றல் பணிகள் முன்னெடுக்கப்படவுள்ளன என்று தெரிவித்த சுகாதாரத் துறையினர், பதுளை மாவட்டத்தில் கொரோனா வைரஸ் தொற்றுப் பரவல் அதிகரித்துள்ள தோட்டப் பகுதிகளைச் சேர்ந்த 60 வயதுக்கு மேற்பட்டோருக்கு, முன்னுரிமை அடிப்படையில் இந்தத் தடுப்பூசிகள் ஏற்றப்படவுள்ளன என்றும் குறிப்பிட்டனர்.