நுவரெலியா உட்பட மேலும் 12 மாவட்டங்களில் வாழும் மக்களுக்கு தடுப்பூசி ஏற்றும் பணி ஜுன் 8 ஆம் திகதி முதல் ஆரம்பமாகவுள்ளது – என்று கொவிட் – 19 தடுப்பு செயற்பாட்டு மையத்தின் பிரதானியும், இராணுவத்தளபதியுமான ஜெனரல் சவேந்திர சில்வா தெரிவித்தார்.

சீனத் தயாரிப்பான சினோ பாம் தடுப்பூசியின் முதலாவது டோஸே இவ்வாறு ஏற்றப்படவுள்ளது.

குறித்த 12 மாவட்டங்களிலும் கொரோனா வைரஸ் பரவக்கூடிய அபாயமுள்ள கிராம சேவகர் பிரிவுகளில் முதலில் தடுப்பூசி திட்டம் ஆரம்பமாகும். 60 வயதுக்கு மேற்பட்டவர்கள், கர்ப்பணி தாய்மார் மற்றும் அரச ஊழியர்களுக்கு முன்னுரிமை வழங்கப்படும்.

தடுப்பூசி செலுத்தப்படவுள்ள 12 மாவட்டங்கள் வருமாறு,

1. நுவரெலியா.
2. மாத்தளை.
3. கேகாலை
4. திருகோணமலை
5. அம்பாந்தோட்டை
6. பதுளை
7. அநுராதபுரம்
8. புத்தளம்
9. அம்பாறை
10. மட்டக்களப்பு
11. மொனறாகலை
12. பொலன்னறுவை

தமிழில் முன்னணி நடிகையாக இருக்கும் நயன்தாரா, தனது கைவசம் உள்ள 3 படங்களை நேரடியாக ஓடிடியில் வெளியிட உள்ளதாக கூறப்படுகிறது.

கொரோனா ஊரடங்கு காரணமாக திரையரங்குகள் மூடப்பட்டு உள்ளதால் புதிய படங்களை ஓ.டி.டி.யில் வெளியிட தயாரிப்பாளர்கள் முனைப்பு காட்டி வருகிறார்கள். ஏற்கனவே சூரரைப் போற்று, பூமி, பொன்மகள் வந்தாள், பென்குயின், க.பெ.ரணசிங்கம், லாக்கப், டேனி, பரமபதம் விளையாட்டு உள்ளிட்ட பல படங்கள் ஓ.டி.டி.யில் வந்துள்ளன. தற்போது நரகாசுரன், வாழ், எப்.ஐ.ஆர் ஆகிய படங்களையும் ஓ.டி.டிக்கு கொடுக்க முயற்சி நடக்கிறது.

இந்நிலையில் நயன்தாராவின் 3 படங்கள் ஓ.டி.டி.யில் வெளியாக இருப்பதாக கூறப்படுகிறது. ஏற்கனவே நயன்தாரா நடித்த மூக்குத்தி அம்மன் படம் ஓ.டி.டியில் வந்தது. தற்போது அவரது நெற்றிக்கண், ராக்கி, கூழாங்கல் ஆகிய படங்களை வாங்கி வெளியிட ஓ.டி.டி. தளங்கள் அணுகி இருப்பதாக தகவல் பரவி வருகிறது.

இதில் நெற்றிக்கண் படத்தில் நயன்தாராவே நடித்து இருக்கிறார். ராக்கி படத்தின் வெளியீட்டு உரிமையை விலைக்கு வாங்கி இருக்கிறார். கூழாங்கல் படத்தை விக்னேஷ் சிவனுடன் இணைந்து தயாரித்துள்ளார். விரைவில் இப்படங்களின் ஓ.டி.டி. வெளியீடு குறித்த அறிவிப்பு வெளியாகும் என எதிர்பார்க்கப்படுகிறது.

உலகக்கிண்ண கிரிக்கெட் தொடரில் பங்கேற்கும் அணிகளின் எண்ணிக்கையை அதிகரிப்பதற்கு சர்வதேச கிரிக்கெட் சபை தீர்மானித்துள்ளது.

இதன்படி 2027 மற்றும் 2031 ஆம் ஆண்டுகளில் நடைபெறவுள்ள உலகக்கிண்ண கிரிக்கெட் தொடரில் 14 அணிகள் பங்கேற்கவுள்ளன. மொத்தமாக 54 போட்டிகள் நடைபெறவுள்ளன.

அத்துடன், ரி – 20 உலகக்கிண்ண கிரிக்கெட் போட்டியில் பங்கேற்கும் அணிகளின் எண்ணிக்கையை 20 ஆக அதிகரிப்பதற்கும் முடிவெடுக்கப்பட்டுள்ளது.

புதிய பொலிஸ் தலைமையகத்தை நிர்மாணிப்பதற்கு 10 பில்லியன் ரூபா செலவாகும் என மதிப்பிடப்பட்டுள்ளது.

கொழும்பு 01 இல் தற்போது அமைந்திருக்கும் பொலிஸ் தலைமையகத்தை புதியதொரு இடத்தில் நிர்மாணிப்பதற்கு, பொதுமக்கள் பாதுகாப்பு அமைச்சர் சரத் வீரசேகர முன்வைத்த யோசனைக்கு அமைச்சரவை அனுமதி வழங்கியுள்ளது.

இதன்படி இலங்கை பொலிசுக்கு சொந்தமான பெப்பிலியான பிரதான வீதியில் – இலக்கம் 142, பெல்லன்தொட்ட சந்தி, அத்திடிய வீதி, தெஹிவல எனும் முகவரியில் அமைந்துள்ள சுமார் 14.5 ஏக்கர் காணியில் புதிய பொலிஸ் தலைமையகம் நிர்மாணிக்கப்படவுள்ளது.

மேற்படி நிர்மாணப்பணிகளுக்கு சுமார் 10 பில்லியன் ரூபா செலவாகும் என மதிப்பிடப்பட்டுள்ளது என அமைச்சரவை இணைப்பேச்சாளரும், அமைச்சருமான உதய கம்மன்பில தெரிவித்தார்.

” தற்போது பொலிஸ் தலைமையகம் யோர்க் வீதியும் விகாரை வீதியும் தொடர்புபடும் வீதிக்கு இடையில் 100 வருடங்களுக்கு அதிகமான பழைய 03 கட்டிடங்களில் இயங்கி வருவதுடன், குறித்த கட்டிடத்தொகுதியில் போதியளவு இடவசதியின்மையால் சிவில் நிர்வாக அலுவலகம் உள்ளிட்ட மேலும் சில பிரிவுகள் வாடகைக்கு அமர்த்தப்பட்ட  கட்டங்களில் இயங்கிவருகின்றன. இதற்கு மாதாந்தம் 25 மில்லியன் ரூபா  வாடகை செலுத்தப்படுகின்றது. எனவேதான் புதிய தலைமையகத்தை அமைக்க தீர்மானிக்கப்பட்டுள்ளது.” – என்றும் அவர் கூறினார்.

சீனாவிடமிருந்து இலங்கை கொள்வனவு செய்யவுள்ள 20 மில்லியன் தடுப்பூசிகள் ஜுன் 6 மற்றும் 09 ஆம் திகதிகளில் கையளிக்கப்படும் – என்று இராஜாங்க அமைச்சர் சன்ன ஜயசுமன தெரிவித்தார்.

அரசாங்க தகவல் திணைக்களத்தில் இன்று நடைபெற்ற ஊடகவியலாளர் மாநாட்டில் கலந்துகொண்டு கருத்து வெளியிடுகையிலேயே அவர் இவ்வாறு கூறினார்.

” சீனாவிடமிருந்து இலங்கை கொள்வனவு செய்யவுள்ள தடுப்பூசிகளில் 10 லட்சம் சினோ பாம் தடுப்பூசிகள் ஜுன் 06 ஆம் திகதியும் மேலும் 10 லட்சம் தடுப்பூசிகள் ஜுன் 09 ஆம் திகதியும் கையளிக்கப்படவுள்ளன.

அத்துடன், பைசர், ஸ்புட்னிக் – பை, சினோவெக் ஆகிய தடுப்பூசிகளும் எதிர்காலத்தில் நாட்டுக்கு வரவுள்ளன.” – என்றார்.