நானுஓயா பொலிஸ் பிரிவுக்குட்பட்ட ரதல்ல குறுக்குவீதியில் ஈஸ்டல் தோட்டத்துக்கு அருகாமையில் பஸ்ஸொன்று, வேகக்கட்டுப்பாட்டை இழந்து விபத்துக்குள்ளானதில் 13 பேர் காயமடைந்துள்ளனர்.

பிபிளையிலிருந்துமரண வீடொன்றிற்கு தலவாக்கலை நோக்கி பயணித்த சிறிய ரக பஸ்சொன்றே இவ்வாறு  கட்டுப்பாட்டை இழந்து முன்னால் சென்று கொண்டிருந்த பவுசர் ஒன்றுடன் மோதி பாதையில் தடம் புரண்டு இவ்வாறு விபத்துக்குள்ளாகியுள்ளது.

காயமடைந்தவர்கள் நுவரெலியா வைத்தியசாலையில் அனுமதிக்கப்பட்டுள்ளனர். விபத்து தொடர்பான விசாரனைகளை நானுஓயா பொலிசார் மேற்கொண்டு வருகின்றனர்.

பஸ்ஸில் 18 பேர் பயணித்துள்ளனர் எனவும், அதில் 13 பேருக்கு காயம் ஏற்பட்டுள்ளது எனவும் தெரிவிக்கப்பட்டுள்ளது.

க.கிசாந்தன்

கொரோனா தடுப்பூசிகளை வழங்குவதில் மலையக பெருந்தோட்ட பகுதிகளுக்கு முன்னுரிமை வழங்கப்பட வேண்டும் என்று தொழிலாளர் தேசிய சங்கத்தின் பிரதி நிதிச் செயலாளரும் மத்திய மாகாண சபையின் முன்னாள் உறுப்பினருமான சோ. ஸ்ரீதரன் வேண்டுகோள் விடுத்துள்ளார்.

இவ்விடயம் தொடர்பாக அவர் வெளியிட்டுள்ள அறிக்கையில் மேலும் குறிப்பிட்டுள்ளதாவது :

“கொவிட்- 19 ஆரம்பித்த காலம் தொடக்கம் முழு நாடும் முடங்கிய போதும் மலையக பெருந்தோட்டத் தொழிலாளர்கள் தமது வழமையான தொழில் நடவடிக்கைகளில் ஈடுபட்டனர். இதன் காரணமாக நாட்டின் பொருளாதார துறைக்கும் பேருதவியாக இருந்தது.

இவ்வாறானதொரு நிலையில் மலையக பெருந்தோட்ட பகுதிகளில் குறிப்பாக நுவரெலியா மாவட்டத்தில் உள்ள தோட்டப் பகுதிகளில் நாளுக்கு நாள் கொரோணா தொற்றாளர்கள்அதிகரித்து வருகின்றனர்.

இதனால் பாடசாலை மாணவர்கள், ஆசிரியர்கள் உட்பட தொழிலாளர்களும் எனையவர்களும் பாதிப்படைந்துள்ளனர். எனவே இந்த நிலைமையைக் கருத்திற்கொண்டு நுவரெலியா மாவட்ட பெருந்தோட்ட பகுதிகளிலும் ஏனைய மாவட்ட பெருந்தோட்ட பகுதிகளிலும் கொரோனா தடுப்பூசிகளை வழங்குவதில் சுகாதார அமைச்சு முன்னுரிமை வழங்க வேண்டும்.” – என்றார்.

புதுச்சேரியில் நாராயணசாமி தலைமையிலான அரசு பெரும்பான்மையை இழந்ததாக சபாநாயகர் அறிவித்தார்.

புதுச்சேரியில் ஆளும் காங்கிரஸ் கட்சியில் இருந்து அடுத்தடுத்து எம்எல்ஏக்கள் ராஜினாமா செய்த நிலையில், நாராயணசாமி தலைமையிலான அரசு தனது பெரும்பான்மையை நிரூபிக்கும்படி ஆளுநர் உத்தரவிட்டார். இதற்காக இன்று புதுச்சேரி சட்டசபை சிறப்புக் கூட்டம் தொடங்கியது.

இக்கூட்டத்தில் அரசு மீதான நம்பிக்கை கோரும் தீர்மானத்தை தாக்கல் செய்து முதலமைச்சர் நாராயணசாமி பேசினார். அப்போது அப்போது, புதுச்சேரியில் காங்கிரஸ் அரசுக்கு பெரும்பான்மை உள்ளது என்றும், ஆட்சியை கவிழ்க்க சதி செய்வதாகவும் கூறினார். முந்தைய ஆளுநர் கிரண்பேடி மூலம் அரசுக்கு தொல்லை கொடுக்கப்பட்டதாகவும், நெருக்கடியை கடந்தும் ஆட்சியை நிறைவு செய்ததாகவும் கூறினார்.

அவரது உரையைத் தொடர்ந்து நம்பிக்கை வாக்கெடுப்பு நடைபெற்றது. இதில், அரசுக்கு பெரும்பான்மை கிடைக்கவில்லை. நம்பிக்கை வாக்கெடுப்பு தீர்மானம் தோல்வி அடைந்தது. இதையடுத்து அரசு பெரும்பான்மையை இழந்ததாக சபாநாயகர் சிவக்கொழுந்து அறிவித்தார். இதையடுத்து முதல்வர் நாராயணசாமி சட்டசபையை விட்டு வெளியேறினார்.

புதுச்சேரி சட்டசபையில் காங்கிரஸ் கூட்டணியின் பலம் 12 ஆகவும், எதிர்க்கட்சிகளின் பலம் நியமன உறுப்பினர்களையும் சேர்த்து 14 ஆகவும் இருந்தது குறிப்பிடத்தக்கது.

புதுச்சேரியில் காங்கிரஸ் அரசு பெரும்பான்மையை இழந்ததையடுத்து முதல்வர் நாராயணசாமி தன் பதவியை ராஜினாமா செய்தார்.

இந்தியா – இங்கிலாந்து கிரிக்கெட் அணிகள் இடையிலான 3-வது டெஸ்ட் போட்டி குஜராத் மாநிலம் ஆமதாபாத்தில் உள்ள சர்தார் பட்டேல் ஸ்டேடியத்தில் நாளை மறுதினம் (புதன்கிழமை) ஆரம்பமாகின்றது.

உலகின் மிகப்பெரிய கிரிக்கெட் மைதானத்தில் பகல்-இரவாக (மின்னொளியின் கீழ்) இந்த டெஸ்ட் நடத்தப்படுகிறது. இதற்காக பிரத்யேகமாக மிளிரும் தன்மை கொண்ட இளஞ்சிவப்பு நிற பந்து (பிங்க்) பயன்படுத்தப்படுகிறது.

ரசிகர்களை ஈர்க்கவும், போட்டியில் விறுவிறுப்பு, சுவாரஸ்யத்தை அதிகரிக்கும் நோக்கிலும் பகல்-இரவு டெஸ்ட் போட்டி 2015-ம் ஆண்டு அறிமுகம் செய்யப்பட்டது. இதுவரை 15 பகல்-இரவு டெஸ்ட் போட்டிகள் அரங்கேறியுள்ளன. எல்லா போட்டியிலும் முடிவு கிடைத்திருப்பது சாதனைக்குரிய அம்சமாகும். அதிகபட்சமாக ஆஸ்திரேலிய அணி 8 பகல்-இரவு டெஸ்டில் விளையாடி அனைத்திலும் வெற்றி பெற்று தோல்வியே சந்திக்காத அணியாக வலம் வருகிறது.

இந்திய அணி நீண்டகாலமாக பகல்-இரவு டெஸ்டில் விளையாட தயக்கம் காட்டியது. சவுரவ் கங்குலி இந்திய கிரிக்கெட் சபை தலைவர் பதவிக்கு வந்ததும், தலைவர் விராட் கோஹ்லியிடம் பேசி சம்மதிக்க வைத்தார். இதன்படி இந்தியா, பிங்க் பந்து டெஸ்ட் போட்டியில் 2019-ம் ஆண்டு நவம்பர் மாதம் கொல்கத்தா ஈடன்கார்டனில் வங்காளதேசத்துக்கு எதிராக மோதியது.

3 நாட்களுக்குள் நிறைவடைந்த இந்த டெஸ்டில் இ்ந்தியா இன்னிங்ஸ் மற்றும் 46 ரன்கள் வித்தியாசத்தில் வெற்றி பெற்றது. பிங்க் பந்து டெஸ்டில் சதம் அடித்த முதல் இந்தியர் என்ற பெருமையை விராட் கோஹ்லி (136 ரன்) பெற்றார்.

இந்தியாவின் 2-வது பகல்-இரவு டெஸ்டை யாரும் எளிதில் மறந்து விட முடியாது. கடந்த டிசம்பர் மாதம் அடிலெய்டில் நடந்த ஆஸ்திரேலியாவுக்கு எதிரான இந்த டெஸ்டில் இ்ந்தியா 8 விக்கெட் வித்தியாசத்தில் படுதோல்வி அடைந்தது. அதுவும் 2-வது இன்னிங்சில் இந்திய அணி 21.2 ஓவர்களில் வெறும் 36 ரன்னில் சுருண்டு டெஸ்டில் மோசமான ஸ்கோரை பெற்றது. ஒரு பேட்ஸ்மேன் கூட இரட்டை இலக்கை தொடாத மோசமான நாளாக அமைந்தது.

இங்கிலாந்து எப்படி?

இங்கிலாந்து அணி இதுவரை 3 பகல்-இரவு டெஸ்டில் ஆடியுள்ளது. அவற்றில் ஒன்றில் வெற்றியும் (வெஸ்ட் இண்டீசுக்கு எதிராக), 2-ல் தோல்வியும் (ஆஸ்திரேலியா, நியூசிலாந்துக்கு எதிராக) தழுவியுள்ளது.

பிங்க் பந்து அதிகமாக ஸ்விங் ஆகும். இதனால் வேகப்பந்து வீச்சாளர்களே வெகுவாக ஆதிக்கம் செலுத்தியுள்ளனர். பகல்-இரவு டெஸ்டில் வேகப்பந்து வீச்சாளர்கள் 354 விக்கெட்டுகளும், சுழற்பந்து வீச்சாளர்கள் 115 விக்கெட்டும் அறுவடை செய்துள்ளனர். 21 சதங்கள் பதிவாகியுள்ளன. இதில் பாகிஸ்தானின் அசார் அலி (302 ரன்), ஆஸ்திரேலியாவின் டேவிட் வார்னர் (335 ரன்) முச்சதம் விளாசியுள்ளனர்.

1 லட்சத்து 10 ஆயிரம் இருக்கை வசதி கொண்ட பிரமாண்டமான ஆமதாபாத் சர்தார் பட்டேல் ஸ்டேடியம் புதிதாக கட்டப்பட்டது ஆகும். இதனால் ஆடுகளத்தன்மை எப்படி இருக்கும் என்பதை இன்னும் முழுமையாக வீரர்களால் புரிந்து கொள்ள முடியவில்லை. ஆடுகளத்தில் வேகப்பந்துக்கு சாதகமான சூழல் காணப்பட்டால் தங்களது கை ஓங்கும் என்று இப்போதே இங்கிலாந்து வீரர் ஜாக் கிராவ்லி கூறியுள்ளார்.

இருப்பினும் உள்ளூர் சீதோஷ்ண நிலையில் இந்திய வீரர்கள் சாதிப்பார்கள் என்பதே ரசிகர்களின் எதிர்பார்ப்பாகும். உலக டெஸ்ட் சாம்பியன்ஷிப் இறுதிப்போட்டி வாய்ப்பில் நீடிக்க இந்த டெஸ்டில் கட்டாயம் வெற்றி பெற்றாக வேண்டிய நெருக்கடியுடன் இரு அணிகளும் மல்லுகட்டுவதால் இந்த போட்டி மிகுந்த எதிர்பார்ப்பை உருவாக்கியிருக்கிறது.

கம்பளை, மில்லகாமுல பகுதியில் சட்டவிரோதமான முறையில் கள்ளு விற்பனையில் ஈடுபட்டுவந்த நபரொருவரை கம்பளை பொலிஸார் கைது செய்துள்ளதுடன், அவரிடமிருந்து 65 கள்ளு போத்தல்களையும் கைப்பற்றியுள்ளனர்.

மில்லகாமுல பகுதியில் வசிக்கும் 41 வயதுடைய ஆணொருவரே இவ்வாறு கைது செய்யப்பட்டுள்ளார் எனவும், இவர் சட்டவிரோதமான முறையில் கள்ளு தயாரித்து விற்பனை செய்துள்ளார் எனவும் பொலிஸார் தெரிவித்தனர்.

கம்பளை பொலிஸ் அத்தியட்சகர் காரியாலயத்தில் குற்றத்தடுப்பு பிரிவின் உப பொலிஸ் பரிசோதகர் கோணவல தலைமையிலேயே குறித்த சுற்றிவளைப்பு நடவடிக்கை முன்னெடுக்கப்பட்டது.

பொலிஸ் உத்தியோகத்தர்களான சரத் (45154), கருணாதிலக்க (46850), தர்மரத்தின (15780), அரிச்சந்திர (52147) மிஸ்க்கின் (65885), சுதாகரன் (80562) ஆகியோரும் சுற்றிவளைப்பு நடவடிக்கையில் பங்கேற்றனர்.

கம்பளை நிருபர் – லாவண்யா

இலங்கை கிரிக்கட் அணியின் வேகப்பந்து வீச்சாளர் லஹிரு குமாரவுக்கு கொரோனா தொற்று ஏற்பட்டுள்ளது.

இன்று இலங்கை கிரிக்கட் அணி மேற்கிந்திய தீவுகளுக்கான சுற்றுப்பயணத்தை மேற்கொள்ளப்படவிருந்த நிலையிலேயே குறித்த வீரருக்கு இவ்வாறு கொரோனா தொற்று உறுதியாகியுள்ளது.

இந்நிலையில், குறித்த வீரருடன் தொடர்பை பேணிய நபர்களை கண்டறியும் நடவடிக்கையில் சுகாதார அதிகாரிகள் ஈடுபட்டுள்ளனர்.

இலங்கை அணியின் ஏனைய வீரர்களுக்கு கொரோனா தொற்று ஏற்படாத காரணத்தினால் மேற்கிந்திய தீவுகளுக்கான சுற்றுப்பயணத்தில் எவ்வித பாதிப்பும் இல்லையென ஸ்ரீ லங்கா கிரிக்கட் நிறுவனம் தெரிவித்துள்ளது.

மேற்கிந்திய தீவுகளுக்கான சுற்றுப்பயணம் நிறைவடைந்தவுடன் இலங்கை கிரிக்கட் அணியின் வீரர்களுக்கு கொரோனா தடுப்பூசிகள் செலுத்தப்படவுள்ளதாகவும் ஸ்ரீ லங்கா கிரிக்கட் நிறுவனம் குறிப்பிட்டுள்ளது.

கொரோனா தொற்றுக்குள்ளான லஹிரு குமாரவுக்கு பதிலாக சுரங்க லக்மால் அணிக்குள் உள்வாங்கப்படவுள்ளதாகவும் தெரிவிக்கப்படுகிறது.

கண்டி மாவட்டத்தில் கடந்த 24 மணிநேரத்தில் 85 கொரோனா வைரஸ் தொற்றாளர்கள் அடையாளம் காணப்பட்டுள்ளனர்.

கம்பளை சுகாதார மருத்துவ அதிகாரி பிரிவில் 23 பேருக்கும், கடுகன்னாவ சுகாதார மருத்துவ அதிகாரி பிரிவில் 3 பேருக்கும், கண்டி சுசுகாதார மருத்துவ அதிகாரி 44 பேருக்கும், நாவலப்பிட்டியவில் ஆறு பேருக்கும், புஸல்லாவை சுகாதார மருத்துவ அதிகாரி ஐவருக்கும், பூசாபிட்டியவில் இருவருக்குமே இவ்வாறு வைரஸ் தொற்றியுள்ளது.

அதேவேளை, கண்டி மாவட்டத்தில் கடந்துள்ள 21 நாட்களில் 1,519 பேருக்கு வைரஸ் தொற்றியுள்ளது.

திருகோணமலை கந்தளாய் பொலிஸ் பிரிவுக்குட்பட்ட பகுதியில் 91 ஆம் கட்டை பகுதியில் மனைவியை கூரிய ஆயுதத்தால் குத்தி படுகொலைசெய்த கணவரை எதிர்வரும் 5ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டுள்ளது.

கந்தளாய் நீதிமன்ற நீதவான் திஷானி தேனபது முன்னிலையில் நேற்றைய தினம் (21) குறித்த கணவரை ஆஜர்படுத்திய போது இக் கட்டளை பிறப்பிக்கப்பட்டுள்ளது.

இவ்வாறு விளக்கமறியலில் வைக்கப்பட்டுள்ள அவர் கந்தளாய் என்ற பகுதியைச் சேர்ந்த சிவில் பாதுகாப்பு திணைக்களத்தின் கடமையாற்றி வரும் தொலஸ்வாகே கெதர சமிந்த ஜயலத் (49வயது) எனவும் பொலிசார் தெரிவித்தனர்.

சம்பவம் குறித்து தெரியவருவதாவது கந்தளாய் வைத்தியசாலையில் சிற்றூழியராக கடமையாற்றி வரும் உக்குபண்டா அப்புஹாமிலாகே சிறானி புஷ்பலதா (44வயது) என்பவர் தனது கணவருடன் பிரிந்து வாழ்ந்து வந்த நிலையில் கணவர் மோட்டார் சைக்கிளில் அவர் வருகை தந்து கொண்டிருந்த போது அவரை நிறுத்தி பேசிக் கொண்டு இருந்துள்ளார்.

இதேநேரம் இருவருக்கும் இடையில் வாக்குவாதம் ஏற்பட்டு நிலையில் அவரது மோட்டார் சைக்கிளில் இருந்த கூரிய ஆயுதத்தினால் தனது மனைவியை தாக்கியதாகவும் இதனையடுத்து வைத்தியசாலையில் அனுமதிக்கப்பட்ட நிலையில் மேலதிக சிகிச்சைக்காக திருகோணமலை பொது வைத்தியசாலைக்கு கொண்டு செல்லப்பட்டு அதி தீவிர சிகிச்சை பிரிவில் சிகிச்சை பெற்று வந்த நிலையில் சிகிச்சை பலனின்றி உயிரிழந்துள்ளதாக பொலிஸார் தெரிவித்தனர்.

குறித்த பெண்ணின் சடலம் தற்போது திருகோணமலை பொது வைத்தியசாலை பிரேத அறையில் வைக்கப்பட்டுள்ள நிலையில் பிரேத பரிசோதனைக்காக அனுமதி நீதிமன்றத்தினால் கிடைக்கப் பெற்றவுடன் பிரேத பரிசோதனைகளை முன்னெடுக்கவுள்ளதாக திருகோணமலை பொது வைத்தியசாலையின் சட்ட வைத்திய நிபுணர் தெரிவித்தார்.