ஹட்டன் கல்வி வலயத்திற்குட்பட்ட பொகவந்தலாவ டின்சின் பாடசாலை மாணவர்கள் குடிநீர் வசதியின்மையால் நாளாந்தம் பல்வேறு இன்னல்களுக்கு முகம் கொடுத்து வருவதாக தெரிவிக்கின்றனர்.

சுமார் 100 வருடங்கள் பழமை வாய்ந்த இப்பாடசாலையில் 500 இற்கும் மேற்பட்ட மாணவர்கள் கல்விகற்கின்றனர், 30 ஆசிரியர்களும் கற்பித்தல் நடவடிக்கைகளில் ஈடுபடுகின்றனர். பாடசாலையில் முறையாக குடிநீர் வழங்கப்படாமையால் மாணவர்கள், ஆசிரியர்கள் பல்வேறு சிரமங்களுக்குள்ளாவதாக பெற்றோர் விசனம் தெரிவிக்கின்றனர்.

இப்பாடசாலையில் ஒவ்வொரு நாளும் மாணவர்கள் தங்களது அத்தியாவசிய தேவைகளை பூர்த்தி செய்துகொள்வதற்கு பாடசாலை ஆரம்பிப்பதற்கு முன்னும் பின்னும் சுமார் 200 மீற்றர் தொலைவிலுள்ள கிணற்றிலிருந்து நீர் எடுத்து வந்து சேமித்து வைத்தே பயன்படுத்த வேண்டிய துர்பாக்கிய நிலை காணப்படுவதாக இவர்கள் தெரிவிக்கின்றனர்.

பாடசாலைக்கு வரும் ஆசிரியர்கள் தங்களது அத்தியாவசிய தேவைகளை பூர்த்தி செய்து கொள்வதற்கு அயலிலுள்ள வீடுகளுக்கு செல்ல வேண்டி ஏற்படுவதாக தெரிவிக்கின்றனர். இதனால் பல்வேறு பிரச்சினைகளுக்கு முகம் கொடுத்து வருவதாகவும் இவர்கள் தெரிவிக்கின்றனர்.

தற்போது கொரோனா தொற்று பரவல் அதிகமாக பொகவந்தலாவை பகுதியில் காணப்படுகின்ற நிலையில் கை கழுவுவது கட்டாயமாக பின்பற்ற வேண்டும் என சுகாதார பிரிவினர் வலியுறுத்தி வருகின்ற போதிலும் இங்கு குடிநீர் வசதியின்மையால் எவ்வாறு மாணவர்கள் இத்தொற்றிலிருந்து தன்னை காப்பாற்றிக்கொள்வது என பலரும் கேள்வி எழுப்புகின்றனர்.

குறித்த பாடசாலைகளில் ஆண் பெண் ஆகிய இருபாலரும் கல்வி பயில்கின்ற நிலையில் நீர் இன்றி மலசல கூடங்களை பயன்படுத்துவதன் காரணமாக பல மாணவர்கள் பல்வேறு நோய்களுக்கு உள்ளாகியிருப்பதாகவும் சுற்றுப்புற சுழலில் துர்நாற்றும் வீசுவதாகவும் இவர்கள் தெரிவிக்கின்றனர்.

இது குறித்து பலரின் கவனத்திற்கு கொண்டு வந்த போதிலும் இதுவரை நிரந்தர தீர்வு கிடைக்கவில்லை என பெற்றோர்கள் கவலை தெரிவிக்கின்றனர். இதே வேளை பாடசாலை நிறைவு பெற்றதன் பின் பிரதேசத்தில் உள்ள ஒரு சிலர் சுற்றுப்புற சூழலில் மது அருந்துவதற்கு பயன்படுத்துவதனால் பாடசாலை சூழல் பாதுகாப்பற்ற சூழலாக மாறிவருவதாகவும் தெரிவிக்கின்றனர்.பாடசாலையில் உள்ள சொத்துக்களுக்கு சேதம் ஏற்படுத்துவதாகவும் இது குறித்த உரிய அதிகாரிகளுக்கு அறிவித்த போதிலும் அவர்கள் இது குறித்து உரிய நடவடிக்கை எடுக்கப்படவில்லை என்றும் பலரும் குற்றம் சுமத்துகின்றனர்.

கடந்த வாரத்தில் கூட பாடசாலையில் மாணவர்கள் விளையாடுவதற்காக முதலாம் தர வகுப்பு மாணவர்களின் பெற்றோர்களால் செலவு செய்து கட்டப்பட்ட விளையாட்டு வீடும் இனந்தெரியாதவர்களால் தீயிட்டு கொளுத்தப்பட்டுள்ளது

இது குறித்தும் பொகவந்தலா பொலிஸ் நிலையத்தில் முறைப்பாடு செய்யப்பட்டுள்ளது.

எனவே பாடசாலையின் குடிநீர் பிரச்சினைக்கு நிரந்தர தீர்வு பெற்றுக்கொடுக்குமாறும் பாடசாலையின் சொத்துக்களை பாதுகாத்துக்கொள்ளுவதற்கு நடவடிக்கைகளை மேற்கொள்ளுமாறும் பெற்றோர்கள் கோரிக்கை விடுக்கின்றனர்.

இலங்கையில் கடந்த 29 ஆம் திகதி முதல் நேற்றுவரை இரண்டு லட்சத்து 63 ஆயிரத்து 779 பேருக்கு கொவிட் – 19 தடுப்பூசி ஏற்றப்பட்டுள்ளது என்று சுகாதார அமைச்சு தெரிவித்துள்ளது.

இந்தியாவால் இலங்கைக்கு 5 லட்சம் கொரோனா தடுப்பூசிகள் நன்கொடையாக வழங்கப்பட்டன. இவற்றை 2 லட்சத்து 50 ஆயிரம் பேருக்கு செலுத்த முடியும்.

அந்தவகையில் முதற்கட்டமாக கொரோனா ஒழிப்பு சமரில் முன்கள பணியாளர்களாக செயற்படும் சுகாதார மற்றும் பாதுகாப்பு பிரிவினருக்கு கொவிட் – 19 தடுப்பூசி கடந்த 29 ஆம் திகதி முதல் ஏற்றப்பட்டுவருகின்றது.

இதன்படி 29 ஆம் திகதி 5 ஆயிரத்து 286 முன்கள பணியாளர்களுக்கும், 30 ஆம் திகதி 32 ஆயிரத்து 539 பேருக்கும், 31 ஆம் திகதி 21 ஆயிரத்து 329 பேருக்கும், பெப்ரவரி முதலாம் திகதி 36 ஆயிரத்து 396 பேருக்கும், 2 ஆம் திகதி 23 ஆயிரத்து 217 பேருக்கும், 3 ஆம் திகதி 21 ஆயிரத்து 147 பேருக்கும் கொரோனா தடுப்பூசி ஏற்றப்பட்டது.

அத்துடன், 4 ஆம் திகதி 6 ஆயிரத்து 413 பேருக்கும், 5 ஆம் திகதி 9 ஆயிரத்து 983 பேருக்கும், 6 ஆம் திகதி 3,838 பேருக்கும்,7 ஆம் திகதி 1,625 பேருக்கும், 8 ஆம் திகதி 5,989 பேருக்கும், 9 ஆம் திகதி 6,431 பேருக்கும், 10 ஆம் திகதி 2,532 பேருக்கும்,11 ஆம் திகதி 1,362 பேருக்கும் தடுப்பூசி போடப்பட்டுள்ளது.

12 ஆம் திகதி ஆயிரத்து 110 பேருக்கும்,  13 ஆம் திகதி 7,457 பேருக்கும், 14 ஆம் திகதி 2,695 பெருக்கும், 15 ஆம் திகதி 3,589 பேருக்கும், 16 ஆம் திகதி 3,225 பேருக்கும், 17 ஆம் திகதி 14,242 பேருக்கும், 18 ஆம் திகதி 23,067 பேருக்கும் தடுப்பூசி ஏற்றப்பட்டது.

மஸ்கெலியா, சாமிமலை ஓல்டன் தோட்டத்திலுள்ள ஏழு பெண் தொழிலாளர்கள் உட்பட எட்டுபேர் கைது செய்யப்பட்டு 14 நாட்களுக்கு விளக்கமறியலில் வைக்கப்பட்டுள்ளனர்.

ஹட்டன் நீதவான் முன்னிலையில் முன்னிலைபடுத்தப்பட்டபோதே குறித்த விளக்கமறியல் உத்தரவு பிறப்பிக்கப்பட்டுள்ளது.

ஓல்டன் தோட்ட முகாமையாளரையும், உதவி முகாமையாளரையும் தாக்க முற்பட்டனர் என்ற குற்றச்சாட்டின் அடிப்படையிலேயே 8 தொழிலாளர்கள் பொலிஸாரால் இவ்வாறு கைது செய்யப்பட்டு, நீதிமன்றத்தில் முன்னிலைப்படுத்தப்பட்டுள்ளனர்.

தோட்டதுரையை இடமாற்றம் செய்யுமாறு வலியுறுத்தி ஓல்டன் தோட்டத்தில் நான்கு பிரிவுகளிலும் உள்ள தொழிலாளர்கள் கடந்த 3 ஆம் திகதி முதல் பணிப்புறக்கணிப்பு போராட்டத்தில் ஈடுபட்டுவருகின்றனர்.

அதேவேளை, பொலிஸார், தோட்ட துரைக்கு சார்பாக செயற்பட்டதாக தொழிலாளர்கள் குற்றஞ்சாட்டுகின்றனர்.

கண்டி மாவட்டத்தை மையப்படுத்தி விரைவில் புதியதொரு அரசியல் கட்சி உதயமாகவுள்ளது எனவும், இதற்கான ஏற்பாடுகள் தற்போது இடம்பெற்றுவருவதாகவும் நம்பகரமான அரசியல் வட்டாரங்களில் இருந்து அறியமுடிகின்றது.

பிரபல தமிழ் வர்த்தகர் ஒருவரே இதன் பின்னணியில் செயற்படுவதாகவும், முக்கியமான சிவில் அமைப்புகள் இக்கட்சியுடன் இணைந்து செயற்படவுள்ளன எனவும் தெரியவருகின்றது.

கடந்த பொதுத்தேர்தலில் கண்டி மாவட்டத்தில் சுயேட்சையாக போட்டியிட்ட சில வேட்பாளர்களும் இக்கட்சியில் இணைந்து பயணிக்க தமது விருப்பத்தை வெளிப்படுத்தியுள்ளனர் எனவும் தகவல் வெளியாகியுள்ளது.

கண்டி மாவட்டத்தை பிரதான தளமாக இயங்குவதற்கு திட்டமிட்டுள்ள அக்கட்சி, மாத்தளையிலும் தமது அரசியல் பணிகளை முன்னெடுக்கும் என முக்கிய பிரமுகர் ஒருவர் ‘மலையக குருவி’யிடம் தகவல் வெளியிட்டார்.

நடிகர்கள் சிவகார்த்திகேயன், யோகி பாபு உள்ளிட்டோருக்கு கலைமாமணி விருது அறிவிக்கப்பட்டுள்ளது.

தமிழக அரசு சார்பில் திரைத்துறை உட்பட பல்வேறு துறைகளில் சிறந்து விளங்குவோருக்கு கலைமாமணி விருது ஆண்டுதோறும் வழங்கப்பட்டு வருகிறது. அந்தவகையில் தற்போது சிவகார்த்திகேயன், ராமராஜன், சரோஜா தேவி, சவுக்கார் ஜானகி உள்பட 42 பேருக்கு கலைமாமணி விருது வழங்கப்படுவதாக தமிழக அரசு அறிவித்துள்ளது.

கலைமாமணி விருது பெறும் நடிகர்கள்

ராமராஜன், சிவகார்த்திகேயன், யோகி பாபு ஆகியோருக்கு கலைமாமணி விருது வழங்கப்படும் என தமிழக அரசு அறிவித்துள்ளது.

கலைமாமணி விருது பெறும் நடிகைகள்

பழம்பெரும் நடிகைகள் சரோஜாதேவி, சவுகார் ஜானகி ஆகியோருக்கும், நடிகைகள் சங்கீதா, ஐஸ்வர்யா ராஜேஷ், தேவதர்ஷினி, மதுமிதா ஆகியோருக்கும் கலைமாமணி விருது அறிவிக்கப்பட்டுள்ளது.

கலைமாமணி விருது பெறும் இசையமைப்பாளர்கள், பாடகர்கள்

இசையமைப்பாளர்கள் டி இமான், தீனா ஆகியோருக்கும், பாடகர்கள் சுஜாதா, அனந்து ஆகியோருக்கும் கலைமாமணி விருது வழங்கப்படும் என அறிவிக்கப்பட்டுள்ளது.

கலைமாமணி விருது பெறும் தயாரிப்பாளர்கள்

கலைப்புலி எஸ் தாணு, ஐசரி கணேஷ் ஆகியோருக்கு கலைமாமணி விருது வழங்கப்படும் என தமிழக அரசு அறிவித்துள்ளது.

கலைமாமணி விருது பெறும் இயக்குனர்கள்

கவுதம் மேனன், லியாகத் அலி கான், மனோஜ் குமார், ரவி மரியா ஆகிய நால்வருக்கும் கலைமாமணி விருது வழங்கப்பட உள்ளது.

கலைமாமணி விருது பெறும் சீரியல் நடிகர்கள்

நடிகர் நந்தகுமார், நடிகைகள் சாந்தி வில்லியம்ஸ் மற்றும் நித்யா ஆகியோருக்கு கலைமாமணி விருது வழங்கப்படும் என அறிவிக்கப்பட்டுள்ளது.

இதுதவிர ஸ்டண்ட் மாஸ்டர்கள் ஜாக்குவார் தங்கம், தினேஷ், நடன இயக்குனர்கள் சிவசங்கர், ஸ்ரீதர், எடிட்டர் ஆண்டனி, மெல்லிசை கோமகன், பாடலாசிரியர்கள் காமகொடியன், காதல் மதி, வசனகர்த்தா வி பிரபாகர், ஒளிப்பதிவாளர் ரகுனாத ரெட்டி ஆகியோருக்கும் கலைமாமணி விருது வழங்கப்படும் என அறிவிக்கப்பட்டுள்ளது.

திருகோணமலை எண்ணெய்க் களஞ்சிய தொகுதியை கூட்டாக அபிவிருத்தி செய்து இயக்குவது தொடர்பான இந்திய – இலங்கை இடையிலான உடன்படிக்கை இரத்துச் செய்யப்பட்டதாக செய்திகளில் உண்மையில் இல்லை என்று கொழும்பில் உள்ள இந்திய உயர் ஸ்தானிகராலயம் தெரிவித்துள்ளது.

குறித்த உடன்படிக்கை இரத்துச் செய்யப்பட்டுள்ளதாக சில ஊடகங்களில் செய்திகள் வெளியாகியுள்ளதாகவும், இதில் எவ்வித உண்மையும் இல்லை எனவும் உயர் ஸ்தானிகராயலம் அறிவித்துள்ளது.

2021 பெப்ரவரி 17ஆம் திகதியன்று நடைபெற்ற நிகழ்வொன்றில், இலங்கை மின்சக்தி அமைச்சர், நிகழ்த்திய உரையை, இந்த அறிக்கைகள் சரியாக பிரதிபலிக்கவில்லை என்றும் சுட்டிக்காட்டப்பட்டுள்ளது.

இந்த விடயத்தை மின்சக்தி அமைச்சர் இன்று நடத்திய செய்தியாளர் சந்திப்பில் தெளிவுபடுத்தியுள்ளதாகவும் சுட்டிக்காட்டப்பட்டுள்ளது.

அமைச்சரின் ஊடக சந்திப்பில் கூறப்பட்டது போலவே, 2017இன் புரிந்துணர்வு உடன்படிக்கை உட்பட ஏற்கனவே அமுலில் இருக்கும் இருதரப்பு உடன்படிக்கைகளின் பிரகாரம் குறித்த எண்ணெய் களஞ்சிய தொகுதியை கூட்டாக அபிவிருத்தி செய்து இயக்குவதற்கு பரஸ்பரம் ஏற்புடையதான முறைமைகள் குறுித்து இரு அரசாங்கங்களும் ஆலோசனைகளை மேற்கொண்டுள்ளதாகவும் இந்திய உயர்ஸ்தானிகராயலம் விடுத்துள்ள ஊடக அறிக்கையில் சுட்க்காட்டியுள்ளது.

அத்துடன், இந்த விடயம் குறித்து உத்தியோகபூர்வமான கலந்துரையாடல்களை நடத்துவதற்கும் அதன் பெறுபேறுகளை பரஸ்பர நலன்களின் அடிப்படையில் துரிதமாக அமுல்படுத்துவதற்கும் இந்தியா ஆவலுடன் உள்ளது என்றும் குறித்த அறிக்கையில் சுட்டிக்காட்டப்பட்டுள்ளது.

#lka #SriLanka #Trinco #IndiaInSriLanka

பேருந்தில் பயணித்துக் கொண்டிருந்த 29 வயது இளைஞன் ஒருவர் திடீரென மயங்கி விழுந்து உயிரிழந்துள்ளார்.

பேருந்தில் மயங்கிய நிலையில்,  வைத்தியசாலைக்கு எடுத்துச் செல்லும் வழியில் குறித்த இளைஞன் உயிழந்துள்ளதாக தெரியவருகிறது.

கெக்கிராவை, மரதன்கடவல, எட்டவீரவெவ பிரசேதத்தில் இந்தச் சம்பவம் பதிவாகியுள்ளது.

உயிரிழந்த இளைஞன் அனுதாரபுரம் வைத்தியசாலைக்கு எடுத்துச் செல்லப்பட்ட நிலையில் அங்கு நடத்தப்பட்ட பி.சீ.ஆர். பரிசோதனையில் இளைஞனுக்கு கொவிட் தொற்று இருப்பது உறுதிசெய்யப்பட்டுள்ளது.

இந்த நிலையில், குறித்த பேருந்தில் பயணித்த அனைவரையும் கண்டறிந்து தனிமைப்படுத்தும் பணிகள் முன்னெடுக்கப்பட்டுள்ளன.

#CoronaVirus #Death #Anuradhapura #Covid19SL #LKA