மஹர சிறைச்சாலையில் இடம்பெற்ற மோதலுக்கு அரசாங்கமே முழுப் பொறுப்பையும் ஏற்க வேண்டும் என ஜே.வி.பி.யின் தலைவர் அநுரகுமார திசாநாயக்க தெரிவித்துள்ளார்.

நாடாளுமன்றில் இன்று திங்கட்கிழமை உரையாற்றிய அவர், “மஹர சிறைச்சாலையில், நேற்றிரவு மோதல் சம்பவம் ஒன்று இடம்பெற்றுள்ளது. இதுவரை 8 பேர்  உயிரிழந்துள்ளனர். 50 இற்கும் மேற்பட்டோர் காயமடைந்துள்ளனர். இந்த எண்ணிக்கைகள் அதிகரிக்கும் என்று  வைத்தியசாலை வட்டாரங்கள் தெரிவித்துள்ளன.

தண்டனைப் பெறுபவர்கள் சிறைச்சாலைகளில் இருந்தாலும், அவர்கள் அரசாங்கத்தின் பொறுப்பில் இருப்பதாகவே கருதப்படும். எனவே, இந்தச் சம்பவத்திற்கான முழுப் பொறுப்பையும் அரசாங்கம் ஏற்றுக் கொள்ள வேண்டும்.இது உடனடியாக எழுந்த சர்ச்சை அல்ல. ஏற்கனவே மஹர உள்ளிட்ட சிறைச்சாலையில் உள்ளவர்களை கொரோனா அச்சுறுத்தலை அடுத்து பல்வேறு கோரிக்கைகளை முன்வைத்து வந்தார்கள்.

மஹர சிறைச்சாலையில் கொரோனாவினால் மட்டும் 183 பேர் பாதிக்கப்பட்டுள்ளார்கள். குறிப்பாக சிறைச்சாலைகளில் இருவர் இருக்க வேண்டிய இடத்தில் 8 பேரளவில் இருக்கிறார்கள்.

இதனால்தான் வைரஸ் அங்கு வேகமாக பரவிவருகிறது. இந்த நிலையில், தங்களை பி.சி.ஆர். பரிசோதனைக்கு உட்படுத்தி உரிய நடவடிக்கைகளை மேற்கொள்ளுமாறு தான் அவர்கள் கோரியிருந்தார்கள்.இது நியாயமானதொரு கோரிக்கையாகும். இதனை நிராகரித்தமையால்தான் இன்று இந்த நிலைமை ஏற்பட்டுள்ளது.

இது ஜனநாயகத்துக்கு கொஞ்சம்கூட ஏற்புடையதல்ல. இதுதொடர்பாக சிறைச்சாலைகள் இராஜாங்க அமைச்சர் உரிய பதிலை வழங்க வேண்டும்.” என கூறினார்.

மஹர சிறைச்சாலை கலவரத்தால் எட்டு கைதிகள் உயிரிழந்துள்ளனர். 53 பேர் காயமடைந்துள்ளனர். உயிரிழப்பு மற்றும் காயமடைந்தவர்களின் எண்ணிக்கை அதிகரிக்ககூடும் என தகவல் கிடைத்துள்ளன என்று ஜே.வி.பியின் தலைவர் அநுர குமார திஸாநாயக்க இன்று பாராளுமன்றத்தில் தெரிவித்தார்.

அத்துடன், குறித்த சம்பவத்துக்கு கடும் கண்டனத்தையும் வெளியிட்டார். இதன் பின்னணி ஆராயப்படவேண்டும் எனவும் வலியுறுத்தினார்.

அதேவேளை, மஹர சிறைச்சாலை சம்பவம் தொடர்பில் சுயாதீன விசாரணை நடத்தப்படவேண்டும் – என்று எதிர்க்கட்சித் தலைவர் சஜித் பிரேமதாசவும்  பாராளுமன்றத்தில் கோரிக்கை விடுத்தார்.

அமைச்சின் செயலாளர் தலைமையில் விசாரணை குழுவொன்று அமைக்கப்பட்டுள்ளது என்று இராஜாங்க அமைச்சர் சுதர்ஷினி பெர்ணான்டோ புள்ளே கூறினார்.

கண்டியில் உள்ள பழைய போகம்பறை சிறைச்சாலையிலுள்ள தனிமைப்படுத்தப்பட்ட நிலையத்திலிருந்து தப்பியோட முயற்சித்த நான்கு கைதிகள் சிறை அதிகாரிகளினால் கைது செய்யப்பட்டுள்ளனர்.

நேற்றுமுன்தினம் நள்ளிரவில் தப்பியோடமுயற்சித்துள்ள கைதிகளே அதிகாரிகளினால் கைது செய்யப்பட்டுள்ளனர்.

சம்பவ வேளை, சிறை அதிகாரிகள் ஆகாயத்தை நோக்கி துப்பாக்கி பிரயோகம் செய்து தப்பியோடிய கைதிகளை கைது செய்துள்ளனர்.

சம்பவம் தொடர்பாக மேலும் தெரிய வருவதாவது :

சிறைச்சாலையில் ஒரு பகுதியில் தடுத்து வைக்கப்பட்ட இவர்கள் கதவை உடைத்து அங்கிருந்து திறந்த வெளிக்கு வெளியே வரும் வேளை அதனை கண்காணித்த சிறை அதிகாரிகள் ஆகாயத்தை நோக்கி துப்பாக்கி பிரயோகம் செய்து நிலைமைகளை கட்டுப்பாட்டுக்குள் கொண்டு வந்துள்ளனர்.

மேலும் குறித்த தனிமைப்படுத்தும் நிலையமான பழைய போகம்பறை சிறைச்சாலையிலிருந்து அண்மையில் தப்பிக்க முயன்ற சந்தர்ப்பத்தில் அவர்களில் ஒருவர் சுவரில் இருந்து கீழே விழுந்து உயிரிழந்துள்ளதுடன் இருவர் காயமடைந்துள்ளமை குறிப்பிடத்தக்கதாகும் .

மேலும் போகம்பறை சிறைச்சாலையில் தற்போது சுமார் 310 கைதிகள் இருப்பதாக தெரிவிக்கப்பட்டுள்ளது.இந்த சம்பவம் குறித்து சிறைச்சாலை அதிகாரிகள் விசாரணை நடாத்தி வருகிறனர்.

மஹர சிறைச்சாலையில் நேற்று மாலை ஏற்பட்ட கலவரத்தால் உயிரிழந்த 6 பேரின் உடல்கள் இதுவரை கிடைக்கப்பெற்றுள்ளன என்று ராகமை வைத்தியசாலையின் பணிப்பாளர் தெரிவித்துள்ளார்.

அத்துடன், காயமடைந்த 43 பேர் வைத்தியசாலையில் சிகிச்சைக்காக அனுமதிக்கப்பட்டுள்ளனர் எனவும் அவர் கூறினார்.

மஹர சிறைச்சாலையின் கைதிகள் சிலருக்கு கொரோனா தொற்று ஏற்பட்டதை தொடர்ந்து மேலும் சில கைதிகள் சிறைச்சாலையில் இருந்து தப்பிச் செல்ல முயற்சித்த சம்பவத்தை காரணமாக கொண்டு நேற்று (29) மாலை  அமைதியின்மை ஏற்பட்டது. சிறைச்சாலை அதிகாரிகள் துப்பாக்கி பிரயோகமும் மேற்கொண்டுள்ளனர்.

இதனையடுத்து விசேட பொலிஸ் அதிரடிப்படையினரும் களனி மற்றும் ராகம பொலிஸ் நிலையத்தில் இருந்து பொலிஸ் குழுக்களும் அழைக்கப்பட்டிருந்தன. சிறைச்சாலை அதிகாரிகளும் காயமடைந்துள்ளனர்.

நாட்டில் மேலும் 173 பேருக்கு கொரோனா வைரஸ் தொற்று உறுதிப்படுத்தப்பட்டுள்ளது. பேலியகொடை கொரோனா தொற்றாளர்களுடன் தொடர்பில் இருந்தவர்களுக்கே இவ்வாறு வைரஸ் தொற்றியுள்ளது.

இன்று இதுவரையில் 496 தொற்றாளர்கள் அடையாளம் காணப்பட்டுள்ளனர்.

அதேவேளை, மொத்த தொற்றாளர்களின் எண்ணிக்கை 23 ஆயிரத்து 484 ஆக அதிகரித்துள்ளது.

கொரோனாவால் இதுவரையில் 109 பேர் உயிரிழந்துள்ளனர். 17 ஆயிரத்து  இரண்டு பேர் குணமடைந்துள்ளனர்.

2 ஆவது அலைமூலம் (மினுவாங்கொட, பேலியகொட கொத்தணிகள்) இதுவரையில் 19  ஆயிரத்து 946 பேருக்கு வைரஸ் தொற்றியுள்ளது.

” நாட் கூலி தொழிலாளி ஒருவரின் அடிப்படைச் சம்பளம் ஆயிரம் ரூபாய்க்குக் குறையாமல் இருக்க வேண்டும் என்பதை அரசாங்கத்தினால் வர்த்தமானியின் மூலம் உறுதிப்படுத்தப்படுத்துகின்ற போதே தோட்டத் தொழிலாளர்களின் அடிப்படைச் சம்பளம் ஆயிரம் ரூபாய் என்பது சாத்தியமாகும்.” என்று தொழிலாளர் தேசிய சங்கத்தின் பிரதி நிதிச் செயலாளரும் மத்திய மாகாண சபையின் முன்னாள் உறுப்பினருமான சோ. ஸ்ரீதரன் தெரிவித்தார்.

பொகவந்தலாவை மேற்பிரிவு தோட்டத்தின் தொழிலாளர் தேசிய சங்கத்தின் தோட்டக் கமிட்டி உறுப்பினர்களுக்கிடையில் இடம்பெற்ற கலந்துரையாடலின் கருத்து தெரிவித்தப் போதே இவ்வாறு அவர் தெரிவித்தார்.

தொழிலாளர் தேசிய சங்கத்தின் ஹற்றன் பணிமனையில் இடம்பெற்ற இந்தக் கலந்துரையாடலில் தொழிலாளர் தேசிய சங்கத்தின் பிரதிப் பொதுச் செயலாளர் ப. கல்யாணகுமார், இளைஞரணி தலைவர் பா. சிவனேசன் ஆகியோரும் கலந்து கொண்டனர்.

சோ. ஸ்ரீதரன் தொடர்ந்து கருத்துக் கூறுகையில் ,

” இலங்கையில் தற்போது நாட் கூலித் தொழிலாளி ஒருவரின் அடிப்படை சம்பளம் 400 ரூபாயாக வரையறுக்கப்பட்டுள்ளது.இதனை அரசாங்கம் தொழில் அமைச்சின் ஊடாக வர்த்தமானி அறிவித்தலில் வெளியிட்டுள்ளது.இவ்வாறான சூழ்நிலையில் 2021 ஆம் ஆண்டுக்கான வரவு – செலவு திட்டத்தில் தோட்டத் தொழிலாளர்களுக்கு ஜனவரி மாதம் முதல் ஆயிரம் ரூபாய் வேதனம் தோட்டக் கம்பனிகள் வழங்க வேண்டும் என்று நிதி அமைச்சராகிய பிரதம மந்திரியால் முன்மொழியப்பட்டுள்ளது.

எனினும் தோட்டத் தொழிலாளர்களின் சம்பள மீளாய்வானதுபெருந்தோட்ட முதலாளிமார் சம்மேளனத்துக்கும் கூட்டொப்பந்தத் தொழிற்சங்கங்களுக்கும் இடையில் இடம் பெறுவதொன்றாகும்.

இந்தப் பேச்சு வார்த்தை இடம் பெறுவதற்கு முன்பு நாட்கூலி தொழிலாளர்களின் அடிப்படை நாட்சம்பளம் 1000 ரூபாய் என்று அரசாங்கம் உரிய முறையில் அறிவிக்கும் பட்சத்தில் தோட்டத் தொழிலாளர்களின் சம்பளத்தையும் ஆயிரம் ரூபாய் அடிப்படை சம்பளம் என்ற அடிப்படையில் பேச்சுவார்த்தைகளை தொடர முடியும்.இந்த விடயம் தொடர்பில் தோட்டத் தொழிலாளர்கள் தெளிவாக இருக்க வேண்டும்.

ஜனவரி முதலாம் திகதி முதல் தோட்டத் தொழிலாளர்களுக்கு 1000 ரூபாய் சம்பள உயர்வு கிடைக்கப் போவதாக தற்போது பிரச்சாரங்கள் மேற்கொள்ளப்பட்டு வருகின்றன.தற்போது தோட்டத் தொழிலாளர்கள் அடிப்படை நாள் சம்பளமாக 700 ரூபாவைப் பெற்று வருகின்றனர்.

எந்த விதமான நிபந்தனை கொடுப்பனவுகளும் இன்றி தோட்டத் தொழிலாளர்களுக்கு 300 ரூபாய் கிடைக்கும் பட்சத்தில் தோட்டத் தொழிலாளர்களின் அடிப்படைச் சம்பளத்தை 1000 ரூபாயாக அதிகரிப்பதற்கு அரசாங்கம் நடவடிக்கை எடுக்க வேண்டும்.

இதனை விடத்து தோட்டத் தொழிலாளர்களைஏமாற்றுவதற்கு அரசாங்கம் நடவடிக்கை எடுக்கக் கூடாது.இவ்விடயம் தொடர்பில் தொழிலாளர் தேசிய சங்கத்தின் தோட்டக்கமிட்டி உறுப்பினர்கள் தமது சக தொழிலாளர்களிடத்தில் இவ்விடயத்தை தெளிவுபடுத்த வேண்டும்.” – என்றார்.