” தமிழ் முற்போக்கு கூட்டணியின் வெற்றியே மலையகத்தின் வெற்றி. எனவே, கூட்டணி வேட்பாளர்களை ஆதரிக்குமாறு கேட்டுக்கொள்கின்றேன். மலையக மக்களை பாதுகாப்பதற்கு நானுஎம், மனோவும், ராதாகிருஷ்ணனும் இருக்கின்றோம். எனவே, எந்த கொம்பனுக்கும் அஞ்சவேண்டாம்.” – என்று தொழிலாளர் தேசிய சங்கத்தின் தலைவரும், ஐக்கிய மக்கள் சக்தியின் நுவரெலியா மாவட்ட வேட்பாளருமான பழனி திகாம்பரம் தெரிவித்தார்.

லிந்துலை மெராயா கௌலினா தோட்டத்தில் நேற்று (12) மாலை இடம்பெற்ற பிரச்சார கூட்டத்தில் கலந்து கொண்டு உரையாற்றும் போதே அவர் இவ்வாறு தெரிவித்தார்.

அவர் மேலும் தெரிவித்ததாவது,

” காணி உரிமை, தனிவீடு, உட்கட்டமைப்பு வசதிகள் மேம்பாடு என மலையக மக்களுக்கு பலசேவைகளை நான் கடந்த நான்கரை வருடங்களில் செய்திருந்தாலும், திகாம்பரம் ஒன்றுமே செய்யவில்லை என பொய்யுரைத்து சிலர் வாக்குகேட்பதை காணமுடிகின்றது. என்னை விமர்சித்தே சின்ன, சின்ன வாண்டுகளெல்லாம் ஓட்டு கேட்கின்றன. அதுமட்டுமல்ல மலையகத்தை ஒரே நாளில் மாற்றியமைக்கப்போவதாகவும் கொக்கரிக்கின்றனர்.

யார் என்ன சொன்னாலும், எனக்கு எனது மக்களே முக்கியம். நான் உங்களில் ஒருவன். எனது மக்களுக்கு எவராவது துரோகம் செய்தால் அவர் நிம்மதியாகவாழ முடியாத நிலை ஏற்படும் என்பதையும் கூறிவைக்கவிரும்புகின்றேன்.

எனக்கு நம்பிக்கை நிச்சயம் என்னை வெற்றிபெற வைப்பீர்கள். எனது வெற்றியே மலையகத்தின் வெற்றி. மாற்று அணியினரை வெற்றிபெறவைத்தால் அது மலையகத்துக்கு ஏற்படும் தோல்வியாகும்.

மலையக மக்களை காப்பாற்றுவதற்கு யாருமே இல்லையே என குமுறிவருகின்றனர். உங்களை நான் காப்பாற்றுவேன். தோட்டதுரையாக இருந்தாலும் எந்த கொம்பனாக இருந்தாலும் உங்களை சீண்டவிடமாட்டேன். எவருக்கும் பயப்படவேண்டாம்.

கொட்டகலை பகுதியில் இராணுவ முகாம் அமைக்கப்படவுள்ளது என தெரியவருகின்றது. இதனை தட்டிக்கேட்கமாட்டார்கள். ஆனால், துணைபோவார்கள். ” – என்றார்.

க.கிசாந்தன்

கடந்த 26 ஆம் திகதி முதல் தொடர் பிரச்சாரத்தில் ஈடுபட்டுவரும் இலங்கைத் தொழிலாளர் காங்கிரஸின் பொதுச்செயலாளர் ஜீவன் தொண்டமானுக்கு, நாளுக்கு நாள் மக்கள் மத்தியில் பேராதரவு பெருகிவருகின்றது.

இளைஞர் – யுவதிகள், மலையக புத்திஜீவிகள், சகோதர இனங்களைச் சேர்ந்த மக்கள், மாற்று கட்சிகளின் ஆதரவாளர்கள் என பலரும் ஜீவனின் கரங்களைப் பலப்படுத்துவதற்காக ஓரணியில் திரண்டுள்ள நிலையில் –  வடக்கு, கிழக்கில் வாழும் இந்திய வம்சாவளி மக்களும் தமது ஆதரவை வெளிப்படுத்தியுள்ளனர்.

“ பொதுத்தேர்தலில் நுவரெலியா, பதுளை மற்றும் கண்டி ஆகிய மாவட்டங்களில் ஜீவன் தொண்டமான் தலைமையில்  களமிறங்கியுள்ள காங்கிரஸ் வேட்பாளர்களை ஆதரித்து, மலையகத் தமிழர்களின் தாய்க்கட்சியான இலங்கைத் தொழிலாளர் காங்கிரஸ் ,தேசிய கட்சி என்பதற்கான அங்கீகாரத்தை வழங்குமாறு எமது சொந்தங்களிடம் உரிமையுடன் கேட்டுக்கொள்கின்றோம்.” – என்று வடக்கு, கிழக்கில் வாழும் இந்திய வம்சாவளி மக்கள் சிலர் கோரிக்கை விடுத்தனர்.

இது தொடர்பில் அவர்கள் மேலும் கூறியதாவது,

“ 87 இனக்கலவரம் உட்பட இதரகாரணங்களால் மலையகத்தில் இருந்து இடம்பெயறவேண்டிய நிலை எமக்கு ஏற்பட்டது. நாம் இங்கு வாழ்ந்தாலும் எமது அடையாளம் மலையகம்தான். எமக்கான அரசியல் அடையாளம் காங்கிரஸ்தான். ஏனெனில் அமரர் சௌமியமூர்த்தி தொண்டமான் ஐயா காலத்தில் எம்மையும் அரவணைத்தே அவர் பயணித்தார்.

மலையகத்தில் மட்டுமல்ல கொழும்பு, வடக்கு, கிழக்கு மாகாணங்களிலும் காங்கிரஸ் காலூன்றியிருந்தது. தேசிய கட்சி, தேசிய தலைவர் என்ற கட்டமைப்பு இருந்தது. 1974 இல் உருவான தமிழர் ஐக்கிய விடுதலை முன்னணியில்கூட சௌமியமூர்த்தி தொண்டமான் ஐயா உப தலைவராக செயற்பட்டார். அந்த நிலைமை மீண்டும் திரும்ப வேண்டும் என விரும்புகின்றோம். ஜீவனின் வருகை எமக்கு நம்பிக்கையை ஏற்படுத்தியுள்ளது. அதனால்தான் அவருக்கு ஆதரவை வழங்குமாறு எம் சொந்தங்களிடம் கேட்டுக்கொள்கின்றோம்.

அமரர் ஆறுமுகன் தொண்டமானும் எமக்கு பல சேவைகளை செய்துள்ளார். ஆனால், அவரை நுவரெலியா மாவட்டத்துக்குள்ளேயே சிலர் முடக்கியனர்.  எமக்கும் அவருக்கும் இடையிலான உறவை துண்டித்தனர். எனினும், கடந்த 6 மாதங்களில் அந்த உறவு புதுப்பிக்கப்பட்டது. அவர் அடிக்கடி வடக்குக்கு வந்தார். ஆனால், திடீரென எம்மை விட்டு பிரிந்துவிட்டார். அந்த இடைவெளியை ஜீவன் நிரப்பவேண்டும் என கேட்டுக்கொள்கின்றோம்.

இ.தொ.காவின் ஆசியுடன் வடக்கில் சில பகுதிகளில் சுயேட்சையாக போட்டியிடும் வேட்பாளர்களையும் நாம் நிச்சயம் ஆதரிப்போம். எல்லைகள்தாண்டி காங்கிரஸின் சேவை தொடரவேண்டும் என்பதுடன் தேசிய கட்சி, தேசிய தலைவர் என்ற கட்டமைப்பையும் புதுப்பித்துக்கொள்ளவேண்டும் என கோரிக்கை விடுக்கின்றோம்.” – என்றனர்.

உலகம் முழுவதும் கொரோனா வைரஸ் தாக்குதலுக்கு 5 லட்சத்து 71 ஆயிரத்து 574 பேர் உயிரிழந்துள்ளனர்.

சீனாவில் ஹூபேய் மாகாணம் வுகான் நகரில் கடந்த ஆண்டு டிசம்பர் மாதம் கொரோனா வைரஸ் கண்டுபிடிக்கப்பட்டது. இந்த வைரஸ் தற்போது உலகின் 213 நாடுகள், பிரதேசங்களுக்கு பரவி பெரும் மனித பேரழிவை ஏற்படுத்தி வருகிறது.

இந்த வைரசுக்கு தடுப்பு மருந்து கண்டுபிடிக்க விஞ்ஞானிகள் தீவிர முயற்சி மேற்கொண்டு வருகின்றனர். ஆனாலும் கொரோனாவின் தாக்கம் நாளுக்கு நாள் அதிகரித்துக்கொண்டே செல்கிறது.

இந்நிலையில், உலகம் முழுவதும் கொரோனாவால் உயிரிழந்தவர்களின் எண்ணிக்கை 5 லட்சத்து 71 ஆயிரத்தை கடந்துள்ளது.

தற்போதைய நிலவரப்படி, 1 கோடியே 30 லட்சத்து 36  ஆயிரத்து 550  பேருக்கு வைரஸ் தொற்று உறுதி செய்யப்பட்டுள்ளது.

கொரோனாவில் இருந்து 75 லட்சத்து 82 ஆயிரத்துக்கு அதிகமானோர் குணமடைந்துள்ளனர்.

இலங்கையில் கொரோனா வைரஸ் தொற்றுக்கு இலக்கானவர்களின் எண்ணிக்கை 2 ஆயிரத்து 617 ஆக அதிகரித்துள்ளது.

நாட்டில் நேற்று மாத்திரம்  106 புதிய கொரோனா தொற்றாளர்கள் அடையாளம் காணப்பட்டுள்ளனர்.

இவர்களில் பெரும்பாலானவர்கள் கந்தக்காடு போதைப்பொருள் புனர்வாழ்வு நிலையத்தில் உள்ளவர்கள் என்பதுடன் ஏனையவர்கள் அவர்களுடன் தொடர்பில் உள்ளவர்கள் என்பதுடன், மேலும் சிலர் வெளிநாடுகளில் இருந்து நாட்டுக்கு அழைத்துவரப்பட்டவர்கள் என அரச தகவல் திணைக்களம் தெரிவித்துள்ளது.

இவர்களில் ஆயிரத்து 981 பேர் பூரண குணமடைந்து வைத்தியசாலைகளில் இருந்து வெளியேறியுள்ளனர்.

நாடு முழுவதும் உள்ள வைத்தியசாலைகளில் 625 கொரோனா நோயாளிகள் தொடர்ந்தும் சிகிச்சைப் பெற்று வருகின்றனர்.

  வைரஸ் தொற்றினால் இலங்கையில் இதுவரையில் 11 பேர் உயிரிழந்துள்ளனர்.

மலையக மக்களுக்கு அரச நியமனங்களை கூட இலங்கைத் தொழிலாளர் காங்கிரஸே பெற்றுக்கொடுத்தது. எதிர்காலத்திலும் பல திட்டங்கள் உள்ளன. எனவே, அரச ஊழியர்கள் எமக்கே ஆதரவை வழங்குவார்கள் என்று இலங்கைத் தொழிலாளர் காங்கிரஸின் நிதிச்செயலாளர் மருதபாண்டி ராமேஷ்வரன் தெரிவித்தார்.

தலவாக்கலை பகுதியில் 12.07.2020 அன்று மாலை  ஊடகவியலாளர்கள் எழுப்பிய கேள்விகளுக்கு பதிலளிக்கும் போதே அவர் இவ்வாறு தெரிவித்தார்.

அவர் மேலும் தெரிவித்ததாவது,

தேர்தல் என்பதைவிடவும் நாடும், நாட்டு மக்களுமே எமக்கு முக்கியம். எனவே, சுகாதார நடைமுறைகளை பின்பற்றி மக்களுக்கு எவ்வித பாதிப்பும் ஏற்படாத வகையிலேயே பிரச்சாரம் முன்னெடுத்து வருகின்றோம்.

நாளை தபால்மூல வாக்களிப்பு ஆரம்பமாகின்றது. மலையக இளைஞர், யுவதிகளுக்கு காங்கிரஸே அரசாங்க வேலைகளை பெற்றுக்கொடுத்தது. எம்மவர்களுக்கு அரச நியமனங்கள் கிடைக்கவேண்டும் என்பதில் மறைந்த தலைவர் ஆறுமுகன் தொண்டமான் உறுதியாக இருந்தார். 3 ஆயிரத்துக்கும் மேற்பட்டோருக்கு ஆசிரியர் நியமனம், தபால் ஊழியர் நியமனம், தொடர்பாடல் அதிகாரிகள், மலையக உதவி ஆசிரியர்கள் என அந்த பட்டியல் நீள்கின்றது.

அதேபோல் பொதுத்தேர்தலில் பின்னர் மூன்றிலிரண்டு பெரும்பான்மையுடன் ஆட்சி மலரும். அந்த ஆட்சியில் இலங்கைத் தொழிலாளர் காங்கிஸ் பிரதான பங்காளியாக இருக்கும்.  அந்த ஆட்சியின்போது அரச துறை உட்பட பல்துறைகளிலும் எமது இளைஞர், யுவதிகளுக்கு நியமனங்கள் பெற்றுக்கொடுக்கப்படும்.

கடந்த ஐக்கிய தேசியக்கட்சி ஆட்சியின்போது மலையகத்தில் எந்தவொரு அரசாங்க நியமனமும் உரியவகையில் கிடைக்கவில்லை. எனவே, அரச ஊழியர்கள் தமது ஆதரவை காங்கிரஸ் வேட்பாளர்களுக்கு வழங்கவேண்டும். எமது வெற்றியில் அவர்களின் பங்களிப்பு இருக்கும் என உறுதியாக நம்புகின்றோம்.

அதேவேளை, 100 ரூபாவை வாங்கிக்கொடுக்கின்றோம் என தொழிலாளர்களுக்கு கிடைக்கவேண்டிய 88 ஆயிரம் ரூபாவை தடுத்தவர்களே இன்று ஆயிரம் ரூபா தொடர்பில் விமர்சனங்களை முன்வைக்கின்றனர். நிச்சயம் ஆயிரம் ரூபாவை எந்தவொரு நிபந்தனையும் இன்றி பெற்றுக்கொடுப்போம். தேர்தல், வாக்குகள் என்பதைவிடவும் எமக்கு மக்களே முக்கியம்.

நாட்டை இராணுவமயப்படுத்துவதற்கு நடவடிக்கை எடுத்து வரும் இந்த அரசாங்கம், கொட்டகலையிலும் இராணுவ முகாமொன்றை அமைப்பதற்கு நடவடிக்கை எடுத்துள்ளது. இது மக்களுக்கு பெரும் இடையூறாக அமையும் என்று மலையக மக்கள் முன்னணியின் தலைவரும், ஐக்கிய மக்கள் சக்தியின் நுவரெலியா மாவட்ட வேட்பாளருமான இராதாகிருஷ்ணன் தெரிவித்தார்.

கொட்டகலையில் இன்ற (12) மாலை நடைபெற்ற பிரச்சார கூட்டத்தில் கலந்து கொண்டு உரையாற்றும் போதே அவர் இவ்வாறு தெரிவித்தார்.அவர் மேலும் தெரிவித்ததாவது,

” ஜனாதிபதி தேர்தலின் போது நாம் சஜித் பிரேமதாசவுக்கு ஆதரவளித்தோம். எமது மலையக மக்களும் அவருக்கே வாக்களித்தனர். ஆனால், துரதிஷ்டவசமாக அவரால் வெற்றி பெற முடியாமல் போனது. பாதுகாப்பை முன்னிலைப்படுத்தி பிரச்சாரம்செய்தே மொட்டு தரப்பு வெற்றிபெற்றது.

பாதுகாப்பு பற்றி கதைத்தவர்கள் இன்று கொட்டகலையிலும் இராணுவ முகாமொன்றை அமைப்பதற்கு நடவடிக்கை எடுத்துள்ளனர். இவ்வாறு இராணுவ முகாம் அமையுமானால் அது மக்களுக்கு இடைஞ்சலாகவே அமையும். இரவில் நடமாடினால் உள்ளே போட்டுவிடுவார்கள். பொலிஸாரிடம் சரி, உணமையை எடுத்துகூறிவிட்டு வந்துவிடலாம். ஆனால், இராணுவம் வந்தால் அவ்வாறு செய்யமுடியாது. சிவில் நிர்வாகத்துக்கும், இராணுவ நிர்வாகத்துக்குமிடையிலான வேறுபாடு இதுதான்.

அத்துடன், அமைச்சுகளுக்கான செயலாளர்கள், திணைக்கள தலைவர்கள் என எல்லாப்பதவிகளுக்கும் இராணுவ அதிகாரிகள் நியமிக்கப்பட்டுவருகின்றனர். இவ்வாறு படிப்படியாக நாடு இராணுவ ஆட்சியை நோக்கி சென்றுக்கொண்டிருக்கின்றது. போதாகுறைக்கு மலையகத்துக்கும் முகாம்வரப்போகின்றது. இதனை தடுத்து நிறுத்தவேண்டுமானால் எமது ஆட்சி உருவாகவேண்டும். எனவே, சஜித் பிரேமதாச தலைமையிலான ஐக்கிய மக்கள் சக்திக்கு வாக்களிக்குமாறு கேட்டுக்கொள்கின்றோம்.

13ஆவது திருத்தச்சட்டம், 19ஆவது திருத்தச்சட்டம் ஆகியனவும் நீக்கப்படும் என்கின்றனர். இதனை தடுப்பதற்கு மொட்டு கட்சிக்கு வாக்களிக்ககூடாது.” – என்றார்.

க.கிசாந்தன்